[Hari sa Pagkamatarong].

Hari sa karaang Salem ug “saserdote sa Labing Hataas nga Diyos,” si Jehova. (Gen 14:​18, 22) Siya ang unang saserdote nga gihisgotan sa Kasulatan; siya naghupot niana nga posisyon sa wala pa ang 1933 W.K.P. Ingon nga hari sa Salem, nga nagkahulogang “Pakigdait,” si Melquisedek gipaila ni apostol Pablo ingong “Hari sa Pakigdait” ug, pinasukad sa iyang ngalan, ingong “Hari sa Pagkamatarong.” (Heb 7:​1, 2) Ang karaang Salem gituohan nga mao ang sentro sa ulahing siyudad sa Jerusalem, ug ang ngalan niini gilangkit sa Jerusalem, nga usahay gihisgotan nga “Salem.”​—Sal 76:2.

Human mapildi ni Abram (Abraham) si Kedorlaomer ug ang iyang kaabin nga mga hari, ang patriarka miadto sa Ubos nga Patag sa Saveh o “ang Ubos nga Patag sa hari.” Didto si Melquisedek “nagdalag tinapay ug bino” ug nagpanalangin kang Abraham, nga nag-ingon: “Dalayegon si Abram sa Labing Hataas nga Diyos, Magmumugna sa langit ug sa yuta; ug dalayegon ang Labing Hataas nga Diyos, kinsa nagtugyan sa imong mga tigpanglupig nganha sa imong kamot!” Niana si Abraham naghatag sa hari-saserdote ug “ikapulo sa tanang butang,” nga mao, sa “labing maayong mga inagaw sa gubat” nga iyang nabatonan sa iyang malamposong pakiggubat batok sa magkaalyadong mga hari.​—Gen 14:17-20; Heb 7:4.

Naghulagway sa Pagkasaserdote ni Kristo. Sa usa ka talagsaong tagna labot sa Mesiyas, ang panumpa ni Jehova sa “Ginoo” ni David mao: “Ikaw usa ka saserdote hangtod sa panahong walay tino sa paagi nga sama kang Melquisedek!” (Sal 110:​1, 4) Kini nga inspiradong salmo naghatag sa mga Hebreohanon ug katarongan nga ilhon ang gisaad nga Mesiyas ingong ang usa nga diha kaniya usahon ang katungdanan sa pagkasaserdote ug pagkahari. Sa iyang sulat ngadto sa mga Hebreohanon, giwagtang ni apostol Pablo ang bisan unsang pagduhaduha kon kinsa kining gitagna,  nga naghisgot kang “Jesus, nga nahimong hataas nga saserdote sa paagi nga sama kang Melquisedek hangtod sa kahangtoran.”​—Heb 6:20; 5:10; tan-awa ang PAKIGSAAD.

Direktang gitudlo. Dayag nga gitudlo ni Jehova si Melquisedek ingong saserdote. Sa paghisgot sa posisyon ni Jesus ingon nga dakong Hataas nga Saserdote, gipakita ni Pablo nga ang usa ka tawo dili makaangkon ug kadungganan pinaagi “sa iyang kaugalingong pagbuot, kondili kon siya tawgon lamang sa Diyos, ingon usab kang Aaron kaniadto.” Gipatin-aw usab niya nga “ang Kristo wala maghimaya sa iyang kaugalingon pinaagi sa pagkahimong hataas nga saserdote, apan gihimaya niya nga naghisgot may kalabotan kaniya: ‘Ikaw mao ang akong anak; ako, karong adlawa, ako nahimong imong amahan,’” ug unya gipadapat sa apostol ang matagnaong mga pulong sa Salmo 110:4 kang Jesu-Kristo.​—Heb 5:​1, 4-6.

‘Midawat ug mga ikapulo gikan kang Levi.’ Ang posisyon ni Melquisedek ingong saserdote wala malangkit sa pagkasaserdote sa Israel, ug ingon sa gipunting sa Kasulatan, mas hataas kini kay sa pagkasaserdote ni Aaron. Usa ka butang nga nagpamatuod niini mao ang pagtahod kang Melquisedek nga gipakita ni Abraham, ang katigulangan sa tibuok nasod sa Israel, lakip na ang saserdotehanong tribo ni Levi. Si Abraham, nga “higala ni Jehova,” kinsa nahimong “amahan sa tanan nga nagbatog pagtuo” (San 2:23; Rom 4:11), naghatag ug ikanapulong bahin, o “ikapulo,” ngadto niining saserdote sa Labing Hataas nga Diyos. Si Pablo nagpakita nga ang mga Levihanon nangolekta ug mga ikapulo gikan sa ilang mga igsoon, nga naggikan usab sa balat-ang ni Abraham. Apan siya nagpunting nga si Melquisedek “nga wala makasubay sa iyang kagikan gikan kanila nakadawat ug mga ikapulo gikan kang Abraham,” ug “pinaagi kang Abraham bisan si Levi nga magadawat ug mga ikapulo nagbayad ug mga ikapulo, kay siya didto pa man sa balat-ang sa iyang katigulangan sa dihang gisugat siya ni Melquisedek.” Busa, bisan tuod ang mga saserdote nga Levihanon nakadawat ug mga ikapulo gikan sa katawhan sa Israel, sila, ingong gihawasan sa ilang katigulangang si Abraham, nagbayad ug mga ikapulo ngadto kang Melquisedek. Dugang pa, ang pagkalabaw sa pagkasaserdote ni Melquisedek gipakita pinaagi sa pagpanalangin niya kang Abraham, nga labot niini giingon ni Pablo nga “ang usa nga ubos pagapanalanginan sa usa nga labaw kaniya.” Kini maoy lakip sa mga butang nga nakapahimo kang Melquisedek nga tukmang larawan sa dakong Hataas nga Saserdoteng si Jesu-Kristo.​—Heb 7:4-10.

Walay mga gisundan o mga manununod. Si Pablo tin-awng nagpakita nga ang pagkahingpit dili makab-ot pinaagi sa Levihanong pagkasaserdote, busa gikinahanglan ang pagtungha sa usa ka saserdote “sa paagi nga sama kang Melquisedek.” Siya nagpunting nga si Kristo naggikan sa Juda, usa ka dili-saserdotehanong tribo, apan sa paghisgot sa kaamgiran ni Jesus kang Melquisedek, iyang gipakita nga si Jesus nahimong saserdote, “dili sumala sa balaod sa usa ka sugo nga pinasukad sa unod, kondili sumala sa gahom sa kinabuhi nga dili malaglag.” Si Aaron ug ang iyang mga anak nahimong mga saserdote nga walay panumpa, apan ang pagkasaserdote nga gituga kang Kristo giordinahan pinaagi sa panumpa ni Jehova. Dugang pa, samtang ang mga saserdote nga Levihanon nangamatay ug nanginahanglan ug mga manununod, ang gibanhawng si Jesu-Kristo ‘tungod sa pagpadayong buhi hangtod sa kahangtoran naghupot sa iyang pagkasaserdote nga walay mga manununod’ ug, busa, makahimo “sa pagluwas sa bug-os kanilang nagaduol sa Diyos pinaagi kaniya, tungod kay siya buhi man kanunay aron sa pagpangamuyo alang kanila.”​—Heb 7:11-25.

Sa unsang paagi si Melquisedek ‘walay sinugdanan sa mga adlaw ni kataposan sa kinabuhi’?

Gipunting ni Pablo ang talagsaong kamatuoran labot kang Melquisedek, sa pag-ingon bahin kaniya: “Kay siya walay amahan, walay inahan, walay talaan sa kagikan, walay sinugdan sa mga adlaw ni kataposan sa kinabuhi, apan gihimong sama sa Anak sa Diyos, siya magpabilin nga saserdote hangtod sa kahangtoran.” (Heb 7:3) Sama sa ubang mga tawo, si Melquisedek natawo ug namatay. Hinunoa, ang mga ngalan sa iyang amahan ug inahan wala hisgoti, ang iyang kagikan ug mga kaliwat wala ibutyag, ug ang Kasulatan walay impormasyon bahin sa sinugdanan sa iyang mga adlaw o sa kataposan sa iyang kinabuhi. Busa, si Melquisedek haom nga maglandong kang Jesu-Kristo, nga nagbaton sa walay kataposang pagkasaserdote. Sama kang Melquisedek nga walay gitala nga gisundan o manununod sa iyang pagkasaserdote, mao man usab walay nauna kang Kristo nga hataas nga saserdote nga sama kaniya, ug ang Bibliya nagpakita nga wala gayoy mosunod puli kaniya. Dugang pa, bisan tuod si Jesus natawo sa tribo ni Juda ug sa harianong linya ni David, ang iyang unodnong kagikan walay kalabotan sa iyang pagkasaserdote, ni tungod sa tawhanong kagikan nga ang mga katungdanan ingong saserdote ug hari giusa diha kaniya. Kining mga butanga maoy resulta sa kaugalingong panumpa ni Jehova kaniya.

 Usa ka opinyon nga makaplagan diha sa mga Targum sa Jerusalem ug gidawat sa kadaghanan sa mga Hudiyo ug sa uban pa mao nga si Melquisedek mao si Sem nga anak ni Noe. Si Sem buhi pa niadto ug gani ulahing namatay kay kang Sara nga asawa ni Abraham. Dugang pa, si Noe espesipikong nagpanalangin kang Sem. (Gen 9:​26, 27) Apan kini nga panglantaw wala mapamatud-i. Nagpabilin ang kamatuoran nga ang nasyonalidad, linya sa kagikan, ug kaliwat ni Melquisedek nagpabiling wala ibutyag sa Kasulatan, ug kana may maayong hinungdan, aron sa ingon siya maghulagway kang Jesu-Kristo, kinsa pinaagi sa panumpa ni Jehova “nahimong hataas nga saserdote sa paagi nga sama kang Melquisedek hangtod sa kahangtoran.”​—Heb 6:20.