Ang Hebreohanong porma sa Marduk, ang labing ilado nga diyos sa Babilonya, kansang pagkapukan gitagna nga maatol usab sa pagkapukan sa Babilonya.​—Jer 50:2.

Ang mga Babilonyanhon nga si Haring Merodak-baladan (Isa 39:1) ug si Haring Evil-Merodak (2Ha 25:27) sa walay duhaduha ginganlan pinasukad sa ngalan niini nga diyos. Sa dihang nailado ang siyudad sa Babilonya tungod kay gihimo kini ni Haring Hammurabi nga kaulohan sa imperyo sa Babilonya, si Merodak nailado usab. Ang mga hiyas sa naunang mga diyos gipasidungog kaniya, ug gituohan nga ang mga saserdote sa Babilonya nag-usab sa mitolohikanhong mga asoy aron himoon si Merodak nga mao ang nagpatay kang Tiamat ug ang maglalalang sa kalibotan ug sa tawo. Ang Babilonyanhong mga sinulat nagpaila kang Marduk (Merodak) ingong anak nga lalaki ni Ea (ang diyos nga nagdumala sa katubigan), ang bana ni Sarpanitu, ug ang amahan ni Nebo.

Ang pagmando ibabaw sa Babilonya suod nga nalangkit sa larawan ni Merodak diha sa iyang templo, ang Esagila, kay ang mga magmamando sa Babilonya wala ipahiluna sa gahom pinaagig pagkorona apan nahimong mga hari pinaagi sa pagkupot sa kamot ni Merodak. Ang seremonyas sublisublion matag tuig sa panahon sa kasaulogan sa Bag-ong Tuig. Bisan sa panahon nga gigamhan sa Asirya ang Babilonya, ang mga hari sa Asirya gikinahanglan nga moadto sa siyudad sa Babilonya sa matag tuig alang sa kasaulogan sa Bag-ong Tuig ug himoong legal ang ilang pagbaton sa trono pinaagi sa pagkupot sa kamot ni Merodak.

Maylabot sa pagkapukan sa Babilonya, si Jeremias nga manalagna nagtagna nga si Merodak ‘malisang.’ Natuman kini diha sa diwa nga si Merodak wala makahimo sa pagtipig sa dignidad sa Babilonyanhong Gahom sa Kalibotan, ug sanglit ang mga magpupukan sa Babilonya maoy mga magsisimba sa ubang mga bathala, ang iyang umalabot nahimong dili gayod tino, puno sa kahadlok sa daotang mahitabo.​—Jer 50:2; tan-awa ang BEL; DIYOS UG MGA DIYOSA, MGA (Babilonyanhong mga Bathala).