Usa ka ngalan nga gigamit sa paglarawan sa “hari sa Babilonya.” (Isa 14:​4, 12) Ang Hebreohanong ekspresyon nga gihubad (NW, Ro, Yg) naggikan sa lintunganayng pulong nga nagkahulogang “sidlak.” Ang hubad nga “Lucifer” (KJ, Da) gikuha gikan sa Latin nga Vulgate.

Ang “nagasidlak” gihubit nga nag-ingon diha sa iyang kasingkasing: “Ibabaw sa mga bituon sa Diyos akong ituboy ang akong trono, ug ako molingkod  sa bukid sa panagkatigom.” (Isa 14:13) Ang ebidensiya sa Bibliya nagpunting sa Bukid sa Zion ingong mao ang “bukid sa panagkatigom.” (Tan-awa ang BUKID SA PANAGKATIGOM.) Busa, sanglit ang mga bituon mahimong magtumong sa mga hari (Num 24:17; Pin 22:16), ang “mga bituon sa Diyos” mao ang mga hari sa linya ni David nga nagmando gikan sa Bukid sa Zion. Ang “hari sa Babilonya” (ang dinastiya sa mga hari sa Babilonya), nga nagpabanaag sa tinamdan ni Satanas nga diyos niini nga sistema sa mga butang, nagpakita sa iyang ambisyon sa pagtuboy sa iyang trono “ibabaw sa mga bituon sa Diyos” pinaagi sa pagtinguha nga himoong mga basalyo na lamang ang mga hari sa linya ni David ug sa kataposan tangtangon sa ilang trono. Sama sa mga bituon nga naghatag ug kahayag, ang “hari sa Babilonya” midan-ag diha sa karaang kalibotan ug mahimong tawgon nga “nagasidlak.”