[lagmit, Lungsod sa Turok].

Usa ka siyudad sa Ubos nga Galilea diin gigugol ni Jesus ang dakong bahin sa iyang yutan-ong kinabuhi, uban sa iyang mga igsoong lalaki ug mga igsoong babaye sa inahan. (Luc 2:​51, 52; Mat 13:54-56) Si Jose ug Maria maoy parehong mga molupyo sa Nasaret sa dihang gipahibalo ni Gabriel ang umaabot nga pagkatawo ni Jesus. (Luc 1:​26, 27; 2:​4, 39) Sa ulahi, human sa ilang pagbalik gikan sa Ehipto, sila mipuyo pag-usab sa Nasaret.​—Mat 2:19-23; Luc 2:39.

Lokasyon. Gituohan sa kadaghanang eskolar nga ang Nasaret mao ang En Nasira (Nazerat) sa Galilea. (MGA HULAGWAY, Tomo 2, p. 539) Kon husto kini nga panglantaw, ang Nasaret nahimutang sa ubos nga kabukiran nga A mismo sa Walog sa Jezreel ug mga tungatunga tali sa H nga tumoy sa Dagat sa Galilea ug sa Kabaybayonan sa Mediteranyo. Nahimutang kini sa usa ka dal-as sa bukid nga may mga bungtod nga ang gihabogon moabot ug 120 ngadto sa 150 m (400 ngadto sa 500 p) sa ibabaw niini. Daghay nagpuyo niini nga lugar, nga may ubay-ubayng mga siyudad ug mga lungsod duol sa Nasaret. Dugang pa, gibanabana nga mahimong baktason sa usa ka tawo sulod sa pito ka oras ang Nasaret paingon sa Tolemaida sa daplin sa Kabaybayonan sa Mediteranyo, sulod sa lima ka oras paingon sa Tiberias daplin sa Dagat sa Galilea, ug sulod sa tulo ka adlaw paingon sa Jerusalem.

Sa usa ka higayon ang katawhan sa Nasaret misulay sa paghulog kang Jesus gikan sa “tumoy sa bukid nga gitukoran sa ilang siyudad.” (Luc 4:29) Wala kini magpasabot nga ang Nasaret nahimutang sa pangpang o sa ngilit kaayo, apan kini nahimutang sa usa ka bukid nga may pangpang nga gikan niana buot nilang ihulog si Jesus. Gituohan sa pipila nga mao kini ang usa ka pangpang nga bato nga mga 12 m (40 p) ang gihabogon diha sa HK sa siyudad.

Ang Pagkaprominente sa Nasaret. Lisod matino kon unsa ka prominente ang Nasaret niadtong unang siglo. Sagad gituohan sa mga  komentarista nga ang Nasaret kaniadto medyo hilit ug dili ilado nga balangay. Ang pangunang Biblikanhong asoy nga gigamit aron paluyohan kini nga panglantaw mao ang giingon ni Natanael sa dihang iyang nadungog nga si Jesus naggikan didto: “Aduna bay maayo nga gikan sa Nasaret?” (Ju 1:46) Gisabot kini sa daghan nga ang Nasaret maoy tinamay, bisan sa mga tawo sa Galilea. (Ju 21:2) Ang Nasaret haduol sa mga ruta sa negosyo sa maong dapit apan dili maoy direktang ruta niana. Wala kini hisgoti ni Josephus, bisan tuod iyang gihisgotan ang kasikbit nga Japia ingong ang kinadak-ang kinutaan nga balangay sa tibuok Galilea, nga nagpakitang ang Nasaret nalabwan pa sa silingan niini.

Sa laing bahin, si Natanael lagmit nagpahayag lamang sa iyang kahibulong nga si Felipe miingon nga ang usa ka tawong naggikan sa kasikbit nga siyudad sa Nasaret sa Galilea mao ang sinaad nga Mesiyas, kay ang Kasulatan nagtagna nga kini siya maggikan sa Betlehem sa Juda. (Miq 5:2) Wala maghisgot si Josephus ug daghang kabalangayan sa Galilea, busa ang wala niya paghisgot sa Nasaret tingali dili kaayo hinungdanon. Angayng matikdan nga ang Bibliya wala magtawag sa Nasaret nga usa ka balangay, apan kanunayng nagtawag niini nga usa ka “siyudad.” (Luc 1:26; 2:​4, 39) Dugang pa, kasikbit sa Seporis mao ang usa ka importante ug kinutaang siyudad nga may usa ka distritong korte sa Sanhedrin. Bisan pa niana, bisan unsa pa ang gidak-on ug pagkaprominente niini, ang Nasaret maoy kombenyente sa hinungdanong mga ruta sa negosyo ug sa dagkong mga siyudad, ug busa ang mga molupyo niini aduna nay mga impormasyon bahin sa sosyal, relihiyoso, ug politikanhong mga kalihokan sa maong panahon.​—Itandi ang Luc 4:23.

Tinamdan sa Katawhan. Samtang nagdako si Jesus, siya nag-uswag “sa pabor sa Diyos ug sa mga tawo.” (Luc 2:52) Siya ug ang iyang mga igsoong lalaki ug mga igsoong babaye sa inahan nailhan sa mga tawo sa Nasaret, ug maoy iyang “nabatasan” ang pagtambong sa mga lokal nga sinagoga matag semana. (Mat 13:​55, 56; Luc 4:16) Sa hapit na siyang mag-30 anyos, si Jesus mibiya sa Nasaret ug gibawtismohan ni Juan. (Mar 1:9; Luc 3:23) Pipila ka bulan sa ulahi, sa hapit nang magsugod ang iyang ministeryo sa Galilea, si Jesus mibalik sa Nasaret ug didto sa sinagoga gibasa niya sa makusog ang Isaias 61:​1, 2, nga nagpadapat niini sa iyang kaugalingon. Ang katawhan wala motuo ug misulay sa pagpatay kaniya, “apan siya miagi sa ilang taliwala ug mipadayon sa iyang lakaw,” ug mipuyo didto sa Capernaum.​—Luc 4:16-30; Mat 4:13.

Kapin sa usa ka tuig sa ulahi, si Kristo miduaw pag-usab sa Nasaret. (Mat 13:54-58; Mar 6:1-6) Bisan tuod nga gihunahuna sa pipila nga mao ra usab kining hitaboa ang gihisgotan sa Lucas 4:16-30, ang han-ay sa mga panghitabo diha sa Mateo, Marcos, ug Lucas nagpakita nga lahi kini, sanglit ang mga kalihokan ni Jesus ug ang mga resulta daw dili managsama. Ang iyang kabantog tingali mikaylap na niining panahona mao nga mas arang-arang ang pagdawat kaniya. Bisan tuod daghan ang nangapandol tungod kay siya usa lamang ka ordinaryong tawo sa maong lugar, wala hisgoti nga ang katawhan nagtinguha sa pagpatay kaniya niining higayona. Siya mihimog gamhanang mga buhat apan dili kaayo daghan tungod sa kawalay pagtuo sa katawhan. (Mat 13:​57, 58) Unya si Jesus mibiya ug misugod sa iyang ikatulong paglibot sa Galilea.​—Mar 6:6.