Ang butang nga wala mahiuyon sa sukdanan sa Diyos sa moral nga pagkamaayo maoy daotan, dili-maayo, ngil-ad, o walay pulos. Sama sa Gregong pulong nga po·ne·riʹa (Mat 22:18; Mar 7:22; Luc 11:39; Buh 3:26; Rom 1:29; 1Co 5:8; Efe 6:12), ang Hebreohanong berbo nga ra·shaʽʹ ug ang kaamgid nga mga porma niini nagpaila sa butang nga daotan. (Gen 18:23; 2Sa 22:22; 2Cr 20:35; Job 34:8; Sal 37:10; Isa 26:10) Ang po·ne·rosʹ (kaamgid sa po·ne·riʹa) sagad nagpasabot sa butang nga mangil-ad o daotan sa moral nga diwa (Luc 6:45) ug mahimong mapadapat sa usa ka butang nga daotan o walay pulos sa pisikal nga diwa, sama sa dihang si Jesu-Kristo naghisgot bahin sa “walay pulos nga bunga.” (Mat 7:​17, 18) Kining pulonga mahimong maghubit usab sa usa ka butang nga makadaot ug, sa Pinadayag 16:​2, gihubad ingong “masakit” (AT, TEV) ug ‘grabe.’​—NE, NW.

Nganong gitugotan sa Diyos ang pagkadaotan?

Si Satanas nga Yawa, nga maoy nag-aghat sa unang lalaki ug babaye nga si Adan ug Eva sa pagrebelde sa Diyos, misupak sa matarong nga sukdanan sa Diyos ug siya haom nga gitawag nga “usa nga daotan.” (Mat 6:13; 13:​19, 38; 1Ju 2:​13, 14; 5:19) Ang pagrebelde nga gisugdan ni Satanas nagkuwestiyon sa katungod ug sa pagkamatarong sa pagkasoberano sa Diyos, nga mao, kon gimandoan ba sa Diyos ang iyang mga linalang sa matarong nga paagi ug sa ilang kinalabwang mga kaayohan. Ang kamatuoran nga si Adan ug Eva mirebelde usab nagpatunghag laing isyu: Ang tanan bang ubang intelihenteng mga linalang mahimong dili matinumanon ug dili maunongon sa Diyos kon ang pagkamasinugtanon mopatim-awng dili makahatag ug materyal nga mga kaayohan? Ang pangangkon ni Satanas labot sa matinumanong si Job daw nagpakita nga kana maoy ilang buhaton. Si Satanas miingon: “Panit alang sa panit, ug ang tanang butang nga anaa sa usa ka tawo iyang ihatag tungod sa iyang kalag. Ingon nga kausaban, palihog bakyawa ang imong kamot, ug tandoga hangtod ang iyang bukog ug ang iyang unod ug tan-awa kon dili ka ba niya tunglohon sa imong nawong mismo.”​—Job 2:​4, 5; tan-awa ang PAGKASOBERANO.

Gikinahanglan ang panahon aron sa paghusay sa mga isyu nga gipatungha. Busa, si Jehova nga Diyos, pinaagi sa pagtugot sa mga tawong daotan nga magpadayong buhi, nagtugot sa uban nga makigbahin sa pagpamatuod nga bakak ang pangangkon ni Satanas pinaagi sa pag-alagad sa Diyos nga matinumanon ubos sa dili-maayo ug masulayong mga kahimtang. Ang pagtugot sa Diyos sa pagkadaotan naghatag usab ug higayon sa mga tawo nga talikdan ang sayop nga dalan ug magpasakop nga kinabubut-on sa matarong nga mga balaod sa Diyos. (Isa 55:7; Eze 33:11) Busa ang pagpugong sa Diyos nga wala niya laglaga ang mga daotan sulod sa usa ka panahon naghatag ug kaluwasan sa mga tawo nga nakiling sa pagkamatarong pinaagi sa paghatag kanila ug panahon aron pamatud-an ang ilang gugma ug pagkamahinalaron kang Jehova.​—Rom 9:17-26.

Dugang pa, gigamit ni Jehova nga Diyos ang mga kahimtang sa paaging ang mga daotan walay kalibotan nga nag-alagad sa iyang katuyoan. Bisan tuod sila misupak sa Diyos, siya makapugong kanila kon gikinahanglan aron sa pagpreserbar sa iyang mga alagad tungod sa ilang integridad, ug makapahinabo nga bisan gani ang mga buhat sa maong mga tawo magtuboy sa iyang pagkamatarong. (Rom 3:3-5, 23-26; 8:35-39; Sal 76:10) Gipahayag kining hunahunaa diha sa Proverbio 16:4: “Ang tanang butang gihimo ni Jehova alang sa iyang katuyoan, oo, bisan ang daotan alang sa adlaw nga daotan.”

Ang usa ka pananglitan niini mao si Paraon, nga pinaagi ni Moises ug Aaron, si Jehova nagsugo nga pagulaon ang naulipon nga mga Israelinhon. Wala ipahinabo sa Diyos nga mahimong daotan kining Ehiptohanong magmamando, apan siya nagtugot  kang Paraon nga magpadayong buhi ug nagpahinabo usab ug mga kahimtang nga mapadayag ang iyang pagkadaotan ug sa ingon takos sa kamatayon. Ang katuyoan ni Jehova sa pagbuhat niini gipadayag sa Exodo 9:16: “Tungod niini nga hinungdan nga gipapadayon ko ikaw sa paglungtad, aron ipakita kanimo ang akong gahom ug aron ang akong ngalan ikapahayag sa tibuok yuta.”

Ang Napulo ka Hampak nga gipadangat sa Ehipto, nga misangko sa pagkalaglag ni Paraon ug sa iyang kasundalohan didto sa Pulang Dagat, maoy talagsaong kapahayagan sa gahom ni Jehova. (Ex 7:14–​12:30; Sal 78:43-51; 136:15) Katuigan human niana ang mga nasod sa palibot naghisgotay gihapon bahin niini, ug ang ngalan sa Diyos namantala gayod sa tibuok yuta. (Jos 2:​10, 11; 1Sa 4:8) Kon gipatay pa dayon ni Jehova si Paraon, dili unta makita kining dakong pagpasundayag sa gahom sa Diyos alang sa Iyang himaya ug sa kaluwasan sa Iyang katawhan.

Ang Kasulatan nagpasalig nga moabot ang panahon sa dihang ang pagkadaotan dili na maglungtad, sanglit kadtong tanang mosupak sa Maglalalang pagalaglagon sa dihang matuman na ang katuyoan sa iyang pagtugot sa pagkadaotan.​—2Pe 3:9-13; Pin 18:20-24; 19:11–​20:​3, 7-10.