Usa ka pagbulag o paglain alang sa usa ka sagradong katuyoan. Ang Hebreohanong berbo nga na·zarʹ (pahinungod) adunay pangunang kahulogan nga “ipabilin nga bulag; mabulag; mobiya.” (Lev 15:31; 22:2; Eze 14:7; itandi ang Os 9:​10, ftn sa Rbi8.) Ang kaamgid nga Hebreohanong pulong nga neʹzer nagtumong sa ilhanan o simbolo sa balaang pagpahinungod nga gisul-ob ingong korona diha sa gibalaang ulo sa usa ka hataas nga saserdote o diha sa ulo sa usa ka dinihogang hari; kini nagtumong usab sa pagka-Nazareo.​—Num 6:4-6; itandi ang Gen 49:​26, ftn sa Rbi8.

Sa pagpahiluna-sa-katungdanan ni Aaron ingong hataas nga saserdote, ang usa ka purong nga gama sa pinong lino gibutang diha sa iyang ulo. Kini gitaod sa usa ka kordon nga gama sa asul nga hilo, nga sa atubangan niini nga purong makita sa tanan ang balaang “ilhanan sa pagpahinungod [neʹzer],” usa ka sinawng plaka nga gama sa lunsayng bulawan nga gikulitan ingong timbre sa mga pulong nga Hebreohanon, “Ang pagkabalaan iya ni Jehova.” Dayon ang balaang igdidihog nga lana ibubo nganha sa hataas nga saserdote panahon sa seremonyas sa pagpahiluna-sa-katungdanan. (Ex 29:​6, 7; 39:​30, 31, ftn sa Rbi8; Lev 8:​9, 12) Ang hataas nga saserdote kinahanglang mag-amping kanunay aron dili makabuhat ug bisan unsa nga makahugaw sa sangtuwaryo, “tungod kay ang ilhanan sa pahinungod, ang igdidihog nga lana sa iyang Diyos, anaa man kaniya.”​—Lev 21:12.

Sa susama, ang pulong nga neʹzer nagtumong sa “diadema,” usa ka opisyal nga purong nga isul-ob sa dinihogang mga hari sa Israel ingong simbolo sa ilang balaang katungdanan.​—2Sa 1:10; 2Ha 11:12; 2Cr 23:11; Sal 89:39; 132:18; Pr 27:24.

Sa dihang ang usa ka tawo mihimog panaad sa pagka-Nazareo ngadto kang Jehova, dili niya putlan ang iyang buhok o balbasan ang iyang bungot  samtang siya nailalom pa sa maong panaad. Sa ingon ang iyang taas nga buhok nahimong purongpurong nga ilhanan sa iyang pagka-Nazareo (neʹzer). (Num 6:4-21) Sa pagpersonipikar sa Jerusalem ingong usa nga mibungkag sa iyang sagradong mga panaad sa pagkabalaan ngadto kang Jehova, ang manalagnang si Jeremias mipatugbaw: “Putla ang imong wala-maputling buhok [o “gipahinungod nga buhok”; niz·rekhʹ, usa ka porma sa neʹzer] ug isalibay kini.” (Jer 7:29) Pinaagi sa laing manalagna, si Jehova naghubit kon sa unsang paagi ang sukihan nga Israel ‘nangadto kang Baal sa Peor, ug ilang gipahinungod ang ilang kaugalingon [wai·yin·na·zeruʹ, usa ka porma sa berbong na·zarʹ] sa makauulaw nga butang.’​—Os 9:10.

Sa Kristohanon Gregong Kasulatan gihisgotan ang pipila ka gipahinungod nga mga butang. Ang “pista sa pagpahinungod” (en·kaiʹni·a) nga gisaulog sa tingtugnaw gihisgotan maylabot sa yutan-ong ministeryo ni Jesus. (Ju 10:22; tan-awa ang PISTA SA PAGPAHINUNGOD.) Kining Gregong pulong nga en·kaiʹni·a parehog lintunganayng pulong sa en·kai·niʹzo, nga diha sa Hebreohanon 9:18 gihubad sa pipila ka hubad nga “pahinungod” (AS, KJ, Dy, Sp), apan gihubad nga “gisugdan sa pagpatuman o giinagurahan” sa ubang mga hubad. (CC, Mo, NE, NW, We) Sa susama, sa Hebreohanon 10:20 ang pipila naghubad niini nga “pahinungod” (AS, Dy, Sp), ang uban, “gisugdan sa pagpatuman o giinagurahan.” (CC, Mo, NW) Si Jesus naghatag ug pagtagad sa tradisyonal nga mga pagtulon-an sa mga Pariseo bahin sa “korban,” nga mao, usa ka gasa nga gipahinungod ngadto sa Diyos. (Mar 7:11; Mat 15:5; tan-awa ang KORBAN.) Si Jesus nagpasidaan usab nga moabot ang panahon sa dihang ang templo ni Herodes, lakip ang ‘maanindot nga mga bato ug ang napahinungod nga mga butang [a·na·theʹma·sin]’ niini, pagatumpagon.​—Luc 21:​5, 6.