Samtang didto sa Efeso niadtong mga 55 K.P., si Pablo misulat ngadto sa mga taga-Corinto: “Karon mahitungod sa pagpangolekta alang sa mga balaan, ingon sa akong gisugo sa [mga] kongregasyon sa Galacia, nianang  paagiha usab buhata ninyo.” (1Co 16:​1, 2) Ang Gregong pulong nga lo·giʹa (“pagpangolekta”) gigamit na sukad pa sa ikatulong siglo W.K.P. Kini makita lamang niining duha ka bersikulo sa Bibliya.

Ang Mateo 17:24 naghisgot ug “mga tawong nangolekta sa duha ka drakma nga buhis,” apan gigamit dinhi ang usa ka laing pulong (lam·baʹno), nga nagkahulogang “nagadawat.” (Itandi ang Int.) Sa susama, ang ekspresyong “pagkolekta ug ikapulo” sa Hebreohanon 7:5 naggikan sa laing pulong (a·po·de·ka·toʹo) nga lahi kaayo sa lo·giʹa.

Apan, ang mga pulong nga gigamit ni Pablo nagpakita nga ang gikolekta lagmit mga salapi ug dili mga pagkaon o mga sapot, ug sa dihang siya miingon ‘ang pagpangolekta,’ kini nagpunting sa usa ka linaing pagpangolekta ug nasayod na niini ang mga taga-Corinto. Ang mga instruksiyon ni Pablo maoy maylabot lamang sa kon sa unsang paagi himoon ang pagpangolekta. Kini himoon sa pribadong paagi diha sa “kaugalingong balay” sa matag usa, nga kinabubut-on segun sa “pag-uswag” sa matag usa, sama sa gihimo sa “[mga] kongregasyon sa Galacia.”​—1Co 16:​1, 2.

Si Pablo naghatag ug ‘mga sugo,’ dili pinaagig binuotbuot, mapugsanong mga sugo, kondili ingong usa nga nanguna ug nagdumala niining tibuok nga kahikayan, nga naglakip sa ubay-ubayng mga kongregasyon. (1Co 16:1) Giplano pag-ayo ni Pablo ug sa iyang mga kaubanan kini nga kahikayan. Gawas nga mabalak-on sa espirituwal nga mga panginahanglan sa mga kongregasyon, si Pablo kanunayng naghunahuna sa pisikal nga mga panginahanglan sa kabos nga mga Kristohanon, ug mopatim-aw nga kini nga pagpangolekta gihimo ilabina alang sa mga Kristohanon sa Judea nga nakaagom ug kapit-osan nianang panahona. (Gal 2:10) Sa ubang mga teksto si Pablo naghisgot niini nga pagpangolekta pinaagi sa mga ekspresyong sama sa “amot ngadto sa mga kabos sa mga balaan sa Jerusalem” (Rom 15:26), “ministeryo . . . alang sa mga balaan” (2Co 9:1), “ang dagayang gasa nga gisaad sa miagi,” “niini nga publikong pag-alagad” (2Co 9:​5, 12), “mga gasa sa kaluoy” (Buh 24:17). Ang maong mahigugmaong kabalaka alang sa mga panginahanglan sa mga isigka-Kristohanon maoy usa sa mga ilhanan sa unang-siglong Kristiyanidad.​—Ju 13:35; tan-awa ang AMOT.