Usa ka tawo nga gitugyanan sa panimalay o sa kabtangan sa laing tawo. Ang Hebreohanong pulong nga so·khenʹ gihubad nga “piniyalan” (Isa 22:15); ang mo·shelʹ, nga nagkahulogang “usa nga nagdumala,” nagpasabot usab sa usa ka piniyalan. (Gen 24:​2, ftn sa Rbi8) Ang Gregong oi·ko·noʹmos (piniyalan) mahimong hubaron usab nga “tagdumala sa balay.”​—Luc 12:​42, ftn sa Rbi8.

Ang usa ka piniyalan mahimong maoy usa ka tawong gawasnon o usa ka sinaligang ulipon. Ang ‘dili-matarong nga piniyalan’ nga gihisgotan ni Jesus sa usa sa iyang mga sambingay daw gihulagway ingong usa ka tawong gawasnon. (Luc 16:​1, 2, 4) Ang mga hari, ug ang daghang ubang mga tawo nga adunahan o inila, adunay piniyalan, ug ang mga tawo dili managsama labot sa gidak-on sa  awtoridad nga ilang ihatag ngadto sa ilang mga piniyalan. Ang Gregong pulong nga e·piʹtro·pos, “tawong sinaligan,” halos parehog kahulogan, sanglit ang usa ka piniyalan sagad nga maoy nagdumala sa balay ingon man sa ubang mga sulugoon ug sa kabtangan, ug usahay sa mga kalihokan sa negosyo.​—Gal 4:1-3; Luc 16:1-3.

Si Abraham adunay matinumanong sulugoon, si Eliezer nga taga-Damasco, nga sinaligan sa iyang daghang gipanag-iya, nga naglakip sa daghan kaayong binuhing kahayopan ug, sa usa ka panahon, sa daghang ulipon, bisan tuod si Abraham walay gipanag-iyang mga yuta gawas sa usa ka lubnganan. (Gen 13:2; 14:14; 15:2; 23:17-20; Buh 7:​4, 5) Si Jose, ingong usa ka ulipon sa Ehipto, nahimong sinaligan sa balay ni Potipar. (Gen 39:1-4, 8, 9) Sa ulahi, siya usab nakabaton ug piniyalan. (Gen 44:4) Si Haring Elah sa Israel nagbaton ug usa ka tagdumala sa iyang panimalay sa Tirza. Lagmit nga kini batasan usab sa ubang mga hari sa karaang panahon. (1Ha 16:9) Si Sebna maoy piniyalan sa balay sa hari sa mga adlaw ni Haring Ezequias sa Juda, apan siya dili matinumanon ug gipulihan ni Eliakim nga anak nga lalaki ni Hilkias.​—Isa 22:​15, 20, 21.

Sa Kristohanon Gregong Kasulatan atong makita nga si Herodes Antipas nagbaton ug usa ka sinaligang tawo sa iyang balay; ang asawa niining tawhana mialagad kang Jesus pinaagi sa iyang mga kabtangan. (Luc 8:3) Si Jesus, sa usa ka sambingay, naghisgot sa usa ka sinaligan nga nagdumala sa mga trabahador sa usa ka parasan nga nagbayad kanila pagkatapos sa maong adlaw.​—Mat 20:8.

Ang mga responsibilidad ug mga katungdanan sa pagdumala sa usa ka piniyalan haom nga naghulagway sa ministeryo nga gitugyan ni Jehova nga Diyos sa usa ka Kristohanon. Sa tagna ni Jesus bahin sa kataposang mga adlaw, siya miingon nga “ang matinumanon ug maalamong ulipon,” kinsa nag-alagad sab ingong iyang piniyalan, usa ka tigdumala sa panimalay sa pagtuo, maghatag ug espirituwal nga “pagkaon sa hustong panahon.” (Mat 24:45; Luc 12:42-44) Ang mga magtatan-aw sa Kristohanong kongregasyon maoy “mga piniyalan,” ug gikinahanglan gayod nga sila magmatinumanon. (Tit 1:7; 1Co 4:​1, 2) Si Pablo, ingong usa ka apostol, ilabina ingong apostol ngadto sa mga Hentil, naghupot ug linaing pagkapiniyalan nga gitugyan kaniya. (1Co 9:17; Efe 3:​1, 2) Gipunting ni Pedro sa tanang Kristohanon, mga magtatan-aw ug uban pa, nga sila maoy mga piniyalan sa dili-takos nga kalulot sa Diyos nga gipahayag sa lainlaing paagi, ug iyang gipakita nga ang matag usa adunay usa ka luna, o usa ka dapit, diha sa kahikayan sa Diyos nga niana iyang matuman ang pagkapiniyalan sa matinumanong paagi.​—1Pe 4:10.