Usa ka pisi o kordon nga gigamit alang sa pagsukod. (1Ha 7:​15, 23; Am 7:17; Zac 2:​1, 2) Ang ubang mga pising igsusukod dayag nga gibahin ngadto sa mga maniko. (2Cr 4:2) Ang sukod sa usa ka partikular nga yuta matino pinaagi sa paglugway o paglatid ug pising igsusukod diha niana. (Itandi ang Job 38:​4, 5; Sal 78:55; Miq 2:​4, 5.) Gamiton kini sa mga magtutukod, sama sa pagsukod sa luna nga tukoran sa usa ka siyudad (Jer 31:​38, 39; Zac 1:16), ug ang usa ka maglililok sa kahoy lagmit mogamit niini sa pagsukod sa usa ka butang nga himoon. (Isa 44:13) Sa usa ka okasyon si Haring David mopatim-aw nga nagsukod sa nabuntog nga mga Moabihanon nga angayng pamatyon gikan niadtong pagatipigang buhi.​—2Sa 8:2.

Mahulagwayong Paggamit. Sa usa ka mahulagwayong diwa, ang “pising igsusukod” magpaila sa usa ka lagda, o sukdanan, sa pagbuhat. (Isa 28:​10, 13) Pananglitan, si Jehova naghimo sa “hustisya ingong pising igsusukod” sa dihang nakiglabot sa iyang dili-matinumanong katawhan. (Isa 28:17) Ang iyang paggamit sa samang pising igsusukod ngadto sa Jerusalem sama sa iyang paggamit niini sa Samaria nagpunting sa samang kalaglagan alang sa Jerusalem. (2Ha 21:13; Lam 2:8) Ang iyang paglatid sa “pisi nga igsusukod sa kawalay-sulod” diha sa Edom nagpaila usab ug kalaglagan, ug ang paggamit niining pisi nga igsusukod nagpasabot sa pag-apod-apod sa yuta ngadto sa mga hayop nga mopuyo diha sa naawaaw nga mga dapit sa Edom.​—Isa 34:5-17.

Giisip ni David ang iyang relasyon kang Jehova ingong iyang bahin sa kinabuhi. Kini maoy usa ka labing makapatagbaw nga panulondon, nga nagtukmod kaniya sa pag-ingon: “Alang kanako ang mga pising igsusukod nabutang sa mga dapit nga maanindot.”​—Sal 16:​5, 6; itandi ang Num 18:20.

Ang langitnong mga butang magpamatuod sa mga buhat sa paglalang sa Diyos, ug sanglit ang ilang hilom nga testimonya milukop sa yuta, ang salmista nakaingon labot kanila: “Sa tibuok nga yuta ang ilang pising igsusukod nakaabot.”​—Sal 19:1-4; Rom 1:20.

Tan-awa ang TANGBO.