Usa ka kasangkapan nga gigamit sa pagpuga sa bunga aron mogawas ang duga. Sanglit ang pag-ani sa mga olibo himoon human sa pag-ani sa mga ubas, ang samang pug-anan sagad gigamit aron sa pagpuga sa duga sa ubas ug sa lana sa olibo, bisan tuod nga dihay usa ka matang usab sa pug-anan nga samag haligi nga gigamit alang sa mga olibo.

Ang komon nga mga pug-anan kasagarang gilangkoban sa duha ka mabaw, samag-dulang nga mga lungag nga gikubkob gikan sa kinaiyanhong anapog, ang usa nga anaa sa ibabaw gikonektar pinaagi sa usa ka gamay nga agosanan ngadto sa ubos nga dulang. (Num 18:​27, 30; 2Ha 6:27) Ang mga ubas o mga olibo tamaktamakan o pigsaton diha sa ibabaw nga dulang (gath, Neh 13:15) maong ang duga moagos rag iya ngadto sa ubos nga pasong (yeʹqev, Huk 7:25; Pr 3:10; Joe 2:24; Hag 2:16). Sa Joel 3:13 kining duha ka termino makita: “Umari kamo, kanaog, kay ang mga pug-anan sa bino [gath] napuno na. Ang [mga] pasong sa pug-anan [ha·yeqa·vimʹ, plural sa yeʹqev] nagaawas.” Dayag nga ang terminong yeʹqev gigamit usab sa pagtumong sa mga pug-anan nga may usa lang ka dulang, diin diha himoon ang pagtamaktamak sa mga ubas ug ang pagsawod sa mga duga. (Job 24:11; Isa 5:2; 16:10; Jer 48:33) Ang mga salog niini nga mga pug-anan pahandag ug diyutay kay sa naandang pug-anan nga duhay dulang, aron matigom ang duga diha sa mas ubos nga kiliran niini. Kon ang pug-anan taas ug hiktin, sama sa usa ka  pasong, gitawag kini ug pu·rahʹ. (Isa 63:3; Hag 2:16) Ang Kristohanon Gregong Kasulatan naghisgot usab bahin sa pug-anan sa bino (le·nosʹ, Mat 21:33), maingon man sa “pasong alang sa pug-anan sa bino” (hy·po·leʹni·on, Mar 12:1).

Ang usa sa maong pug-anan sa bino nakaplagan, nga ang ibabaw nga dulang niini mosukod ug 2.4 m (8 p) kuwadrado ug 38 sm (15 pul.) ang giladmon. Ang mas gamay nga pasong, nga mas ubos ug mga 0.6 m (2 p) ang gihabogon, diin diha niini moagos ang duga, maoy 1.2 m (4 p) kuwadrado ug 0.9 m (3 p) ang giladmon. Ang sama niini nga pug-anan sa bino gigamit ni Gideon ingong giokanan sa iyang trigo.​—Huk 6:11.

Ang pagpigsat sa mga bunga diha niini nga mga pug-anan kasagarang gihimo pinaagig mga tiil o pinaagig bug-at nga mga bato. Gikan sa duha ngadto sa pito o kapin pa nga mga tigtamak ang magtrabaho ingong usa ka grupo diha sa pug-anan. Busa makaiikag nga si Isaias miingon nga ang Dakong Tigtamak, si Jehova, magatamak nga mag-inusara sa pasong sa bino. (Isa 63:3) Diha sa ibabaw sa mga ulo sa mga tigtamak mao ang usa ka balabag nga may mga pisi nga nagbitay nga gigamit ingong hawiranan sa mga tawo. Ang pagtuasik sa “dugo sa mga ubas” nakamansa sa pang-ibabaw nga mga besti sa mga tigtamak. (Gen 49:11; Isa 63:2) Bisan tuod nagkahulogan ug dakong kahago, ang panahon sa pagpuga kasagaran maoy usa ka panahon sa pagmaya; ang malipayong pagsinggit ug pag-awit nakatabang sa pagduyog sa kompas sa pagtamaktamak. (Huk 9:27; Jer 25:30; 48:33) Ang ekspresyon nga “sa Gittith” (gihubad nga “mga pug-anan sa bino” sa Gregong Septuagint ug sa Latin nga Vulgate) nga makita diha sa superskripsiyon sa tulo ka Salmo (8, 81, 84) lagmit nagpakita nga kini maoy mga awit nga nalangkit sa pag-ani sa mga paras.

Mahulagwayong Paggamit. Adunay ubay-ubayng mga teksto sa Kasulatan nga ang pug-anan sa bino gihisgotan sa mahulagwayong diwa. (Isa 63:​2, 3; Lam 1:15) Sa adlaw ni Jehova sa dihang ang mga panon sa katawhan magtigom sa ubos nga patag sa desisyon, ang sugo nagkanayon: “Ihagbas ninyo ang galab, kay ang alanihon hinog na. Umari kamo, kanaog, kay ang mga pug-anan sa bino napuno na. Ang pasong sa pug-anan nagaawas; kay ang ilang pagkadaotan dagaya.” (Joe 3:​13, 14) Sa susama, nakita ni Juan diha sa panan-awon nga “ang paras sa yuta” giitsa “ngadto sa dakong pug-anan sa bino sa kasuko sa Diyos,” diin kini gitamaktamakan hangtod nga “migula ang dugo gikan sa pug-anan sa bino sa gitas-on nga mosangko sa mga busal sa mga kabayo.” Ang usa nga gitawag nga “Matinumanon ug Matuod,” “Ang Pulong sa Diyos,” mao ang usa nga magtamaktamak niini nga pug-anan sa bino sa “kasuko sa kapungot sa Diyos nga Labing Gamhanan.”​—Pin 14:​19, 20; 19:11-16.