Ang terminong “Rabbi” gigamit sa aktuwal nga diwa ingong “magtutudlo.” (Ju 1:38) Apan taliwala sa mga Hudiyo, wala madugay una pa matawo si Jesus, kini gigamit usab ingong usa ka paagi sa pagtawag ug ingong usa ka titulo sa pagtahod ug kadungganan nga nagkahulogang “akong bantogang usa; akong hamiling usa.” Ang pipila ka makinaadmanong mga tawo, mga eskriba, ug mga magtutudlo sa Balaod nagpatawag niini nga titulo. Sila malipay nga tawgong “Rabbi” ingong titulo sa pasidungog. Gikondenar ni Jesu-Kristo ang maong pagtinguhag titulo ug gibaoran ang iyang mga sumusunod nga dili magpatawag ug “Rabbi,” sanglit siya mao ang ilang magtutudlo.​—Mat 23:6-8.

Sa Bibliya ang terminong “Rabbi” gigamit lamang diha sa Kristohanon Gregong Kasulatan. Gigamit kini sa 12 ka beses maylabot kang Jesus, diha sa aktuwal nga diwa ingong “Magtutudlo”: kaduha gigamit ni Pedro (Mar 9:5; 11:21), kas-a sa duha ka tinun-an ni Juan (Ju 1:38), kas-a ni Natanael (Ju 1:49), kas-a ni Nicodemo (Ju 3:2), tulo ka beses sa mga tinun-an ni Jesus kansang mga ngalan wala hisgoti (Ju 4:31; 9:2; 11:8), kas-a sa panon sa mga tawo (Ju 6:25), ug duha ka beses ni Judas (usa ka higayon gisubli) (Mat 26:​25, 49; Mar 14:45). Si Jesus gitawag ni Maria Magdalena ingong “Rabboni” (Akong Magtutudlo), usab sa tawong buta nga giayo niya. Ang personal nga pronombre nga “akong” maoy usa ka suffix dinhi, apan tungod sa kanunayng paggamit, kini daw nawad-an sa kahulogan niini, sama sa Pranses nga Monsieur, nga sa orihinal nagkahulogang “akong ginoo.” (Ju 20:16; Mar 10:51) Si Juan nga Tigbawtismo kas-a gitawag nga Rabbi.​—Ju 3:26.