1. Usa ka habog nga bukid diha sa teritoryo sa Isacar nga anaa sa amihanang utlanan niini. (Jos 19:​17, 22) Sa Arabiko kini gitawag ug Jebel et-Tur; sa Hebreohanon, Har Tavor. Kini nahimutang mga 20 km (12 mi) sa K sa habagatang tumoy sa Dagat sa Galilea ug mga 8 km (5 mi) sa SHS sa siyudad sa Nasaret.

Nahilain gikan sa ubang mga bukid, ang Tabor titip nga nagtuybo gikan sa Walog sa Jezreel sa gihabogon nga mga 562 m (1,844 p) ibabaw sa lebel sa dagat. Gikan sa KAK kini samag usa ka kono nga pinutlan ug tumoy, ug gikan sa HK kini samag bahin sa usa ka lingin. Gikan sa tayuktok niini, nga usa ka lapad nga luna nga samag itlog ug porma nga mga 0.4 km (0.25 mi) ang gilapdon gikan sa A ngadto sa H ug doble niana ang gitas-on gikan sa S ngadto sa K, tataw kaayo ang tanang talan-awon sa palibot. Ang talagsaong kahabog niining bukira lagmit mao ang hinungdan kon nganong ang salmista dungang naghisgot sa Tabor ug sa Bukid sa Hermon ingong talagsaong mga pananglitan sa halangdong kabatid sa Maglalalang. (Sal 89:12) Si Jehova naggamit usab sa talagsaong gidak-on sa Tabor​—nga mao lamang ang nagbuntaog sa Walog sa Jezreel​—aron iilustrar ang pagkatalagsaon ni Nabucodonosor sa dihang siya misulod sa Ehipto uban ang usa ka gamhanang kasundalohan.​—Jer 46:​13, 18.

Ang Tabor ilabinang nabantog sa dihang si Barak, nga gisugo sa Diyos, nagtigom ug 10,000 ka tawo gikan sa mga tribo ni Neptali ug Zabulon batok kang Sisera ug sa iyang kasundalohan, nga naglakip sa 900 ka karo nga tinaoran ug “puthawng mga sanggot.” Sa dihang gihatag ang timailhan, si Barak ug ang iyang kasundalohan midali paglugsong sa mga bakilid sa Tabor, ug human ipahinabo ni Jehova nga magkaguliyang ang mga Canaanhon, naangkon sa mga Israelinhon ang bug-os nga kadaogan batok sa mikalagiw nga kasundalohan ni Sisera.​—Huk 4:4-16.

Pipila ka tuig sa ulahi, didto sa Tabor gipatay ni Zeba ug Zalmuna nga mga hari sa Midian ang mga igsoong lalaki ni Gideon. (Huk 8:​18, 19) Sa tungatunga sa ikawalong siglo W.K.P., ang mga banay sa dili-matinumanong mga saserdote ug sa mga harianon sa Israel maoy “ingon sa pukot nga gibuklad ibabaw sa Tabor,” tingali gigamit ang maong bukid dapit sa K sa Jordan ingong sentro sa idolatriya aron sa paglit-ag sa mga Israelinhon; ang Mizpa lagmit nga gigamit usab sa ingon dapit sa S sa Jordan.​—Os 5:1.

Ang tayuktok sa Tabor maoy usa ka bantaaw nga dapit ug angayan kaayo alang sa usa ka kinutaang siyudad. Ang mga kagun-oban nagpakita nga ang ingon niana nga siyudad naglungtad sa wala pa ug human sa unang siglo K.P. Tungod niini, gikaduhaduhaan ang tradisyon nga didto sa Tabor nahitabo ang pagkausab sa dagway ni Jesus, kay ang mga asoy nag-ingon nga si Jesus ug ang iyang tulo ka kauban didto sa bukid nga “silasila ra.” Ang Bukid sa Hermon lagmit mao kining “hataas nga bukid,” ug  duol kini sa Cesarea Filipos dapit sa mga tinubdan sa Jordan, diin miadto si Jesus sa dayong mahitabo ang pagkausab sa dagway.​—Mat 17:​1, 2; Mar 8:27; 9:2.

2. Usa sa mga siyudad sa teritoryo sa Zabulon nga gihatag ngadto sa Levihanong mga anak ni Merari. Ang nahimutangan niini wala mahibaloi karong adlawa.​—1Cr 6:​1, 77.

3. Ang “dakong kahoy sa Tabor” lagmit nga nahimutang sa teritoryo sa Benjamin. Usa kini ka ilhanan nga gihisgotan ni Samuel sa iyang mga instruksiyon kang Saul human sa pagdihog kang Saul, diin iyang mahibalag ang tulo ka tawo nga nagpaingon sa Bethel. Ang dapit wala mahibaloi karong adlawa.​—1Sa 10:1-3.