Impormasyon, mga doktrina, o mga batasan nga gipasa sa mga ginikanan ngadto sa ilang mga anak o nahimo nang bahin sa ilang paagi sa paghunahuna o paglihok. Ang Gregong pulong nga pa·raʹdo·sis sa literal nagkahulogang “usa ka butang nga gipiyal” ug busa “mao kanang gipasa nga binaba o sinulat.” (1Co 11:​2, Int) Ingon sa pagkagamit niini diha sa Kristohanon Gregong Kasulatan, kining pulonga gipadapat ngadto sa mga tradisyon nga husto o dalawaton sa matuod nga pagsimba, ingon man usab sa mga tradisyon nga sayop o gisunod o giisip nga makadaot o dili dalawaton.

Latas sa kasiglohan napanunod sa mga Hudiyo ang daghang tradisyon. Kini naglakip sa mga paagi sa pagpamesti ug sa pagdumalag sosyal nga mga kalihokan sama sa mga kasal ug mga paglubong. (Ju 2:​1, 2; 19:40) Dugang pa, ang pipila ka aspekto sa Hudiyohanong pagsimba sa unang siglo K.P. maoy nabatasan na o nahimong tradisyon, sama sa paggamit ug bino panahon sa pagkaon sa Paskuwa ug sa pagsaulog sa pagpahinungod pag-usab sa templo. (Luc 22:14-18; Ju 10:22) Si Jesus ug ang iyang mga apostoles wala mosupak niini, bisan tuod sila nahibalo nga kining mga butanga wala kinahanglana sa Balaod. Sa dihang ang sinagoga mao ang nahimong naandang dapit sa Hudiyohanong pagsimba, nahimong kostumbre o tradisyon ang pagsimba didto sa matag Igpapahulay. Si Lucas miingon nga si Jesus usab mitambong, “sumala sa iyang nabatasan.”​—Luc 4:16.

Wala Uyoni nga mga Tradisyon. Bisan pa niana, ang Hudiyong relihiyosong mga pangulo nagdugang sa sinulat nga Pulong ug daghang binaba nga mga tradisyon nga ilang gilantaw nga hinungdanon sa matuod nga pagsimba. Sa wala pa makabig sa Kristiyanidad, si Pablo (Saulo) ingong usa ka Pariseo masiboton gayod sa pagsunod sa mga tradisyon sa Judaismo. Siyempre, lakip niini ang dalawaton ug dili-dalawatong mga tradisyon. Apan pinaagi sa pagsunod sa “mga sugo sa mga tawo ingon nga mga doktrina,” siya nahimong usa ka maglulutos sa mga Kristohanon. (Mat 15:9) Pananglitan, sila “dili mokaon gawas kon makapanghunaw sila sa ilang mga kamot hangtod sa siko, nga nangupot pag-ayo sa tradisyon sa mga tawo sa kanhing mga panahon.” (Mar 7:3) Alang kanila, ang pagkahinlo dili maoy hinungdan sa pagsunod niini nga batasan kondili kini maoy usa ka rituwal nga seremonyas nga giisip nilang may relihiyosong bili. (Tan-awa ang PAGHUGAS SA MGA KAMOT, PAGHUNAW.) Gipakita ni Kristo nga sila walay basehanan sa pagsaway sa iyang mga tinun-an tungod sa dili pagsunod niana ug sa ubang wala kinahanglanang “mga sugo sa mga tawo.” (Mat 15:​1, 2, 7-11; Mar 7:4-8; Isa 29:13) Dugang pa, tungod sa ilang tradisyon maylabot sa “korban” (usa ka gasa nga gipahinungod sa Diyos), ang relihiyosong mga pangulo naghimo sa Pulong sa Diyos nga walay pulos, sa ingon naglapas sa sugo sa Diyos.​—Ex 20:12; 21:17; Mat 15:3-6; Mar 7:9-15; tan-awa ang KORBAN.

Si Jesus ug ang iyang mga tinun-an wala gayod mokutlo sa binaba nga Hudiyohanong tradisyon aron paluyohan ang ilang mga pagtulon-an, hinunoa, ilang gigamit ang sinulat nga Pulong sa Diyos. (Mat 4:4-10; Rom 15:4; 2Ti 3:15-17) Sa dihang ang Kristohanong kongregasyon natukod na, ang pagsunod sa dili-kasulatanhon nga Hudiyohanong mga tradisyon nahisamag “walay-pulos nga matang sa panggawi” nga ‘napanunod sa mga Hudiyo pinaagi sa tradisyon gikan sa ilang mga katigulangan [Gr., pa·tro·pa·ra·doʹtou, “gihatag gikan sa mga amahan”].’ (1Pe 1:18) Sa dihang nahimong mga Kristohanon, gibiyaan sa maong mga Hudiyo kadto nga mga tradisyon. Sa dihang gidasig sa pipila ka bakak nga mga magtutudlo sa Colosas ang pagsunod sa maong matang sa pagsimba, si Pablo nagpasidaan batok “sa pilosopiya ug walay-pulos nga panglimbong sumala sa tradisyon sa mga tawo.” Dayag nga ang iyang gipasabot mao ang mga tradisyon sa Judaismo.​—Col 2:​8, 13-17.

Kristohanong mga Tradisyon. Kon isipon ang tradisyon ingong mga lagda nga gipasa sa binaba o pinaagi sa panig-ingnan, ang impormasyon nga direktang nadawat ni apostol Pablo gikan kang Jesus mahimong tukmang ikapasa ngadto sa Kristohanong mga kongregasyon ingong dalawaton  nga Kristohanong tradisyon. Pananglitan, tinuod kini bahin sa pagsaulog sa Panihapon sa Ginoo. (1Co 11:​2, 23) Ang mga pagtulon-an ug panig-ingnan nga gihatag sa mga apostoles maoy mapuslanong tradisyon. Busa, tungod kay si Pablo personal man nga nagbudlay pinaagi sa iyang mga kamot aron dili mabug-atan ang iyang mga igsoon sa pinansiyal nga paagi (Buh 18:3; 20:34; 1Co 9:15; 1Te 2:9), siya makaagda gayod sa mga Kristohanon sa Tesalonica ‘sa pagpahilayo gikan sa tanang igsoon nga nagalakaw nga badlonganon ug dili sumala sa tradisyon [pa·raʹdo·sin]’ nga ilang nadawat. Ang usa nga dili motrabaho dayag nga wala mosunod sa maayong panig-ingnan o tradisyon sa mga apostoles.​—2Te 3:6-11.

Sa ulahi ang “mga tradisyon” nga gikinahanglan alang sa mahinlo ug wala mahugawi nga pagsimba sa Diyos gilakip ingong bahin sa inspiradong Kasulatan. Busa, ang mga tradisyon o mga lagda nga gipasa ni Jesus ug sa mga apostoles nga hinungdanon alang sa kinabuhi wala pasagding magpabilin ingong binaba ug matuis lamang sa paglabay sa panahon, hinunoa, kini tukmang girekord diha sa Bibliya alang sa kaayohan sa mga Kristohanon nga nagkinabuhi sa ulahing mga yugto.​—Ju 20:​30, 31; Pin 22:18.