Kini maoy usa ka yugto diin naandang gihimo ang usa ka espesipikong matang sa agrikultural nga buluhaton o yugto sa usa ka partikular nga klima; usa ka nahiangay o tinudlong panahon alang sa usa ka butang.

Samtang ang yuta motuyok palibot sa adlaw, ang anggulo sa pagkiling niini nagpatunghag usa ka siklo sa mga klima. Ingong mga timaan sa paglabay sa panahon, ang langitnong mga butang nagsilbing mga tigpaila sa mga yugto sa panahon. (Gen 1:14) Ang Genesis 8:22 nag-ingon nga ang mga yugto sa panahon sa yuta “dili gayod mohunong.” Aron makita ang kalangkitan sa mga bulan sa Hudiyohanon ug Gregorian nga mga kalendaryo ug sa mga pista, sa klima, ug sa agrikultural nga mga yugto sa panahon, tan-awa ang KALENDARYO.

Suod nga nalangkit sa agrikultural nga mga yugto sa panahon mao ang tinuig nga “mga panahon sa pista” sa dihang gisaulog ang mga pista nga giestablisar sa Moisesnong Balaod. (1Cr 23:31; 2Cr 31:3) Busa, sa dihang si Pablo nagtambag sa pipila ka Hudiyong mga Kristohanon kinsa “makutihong nagabantay sa mga adlaw ug mga bulan ug mga yugto sa panahon,” iyang gipasabot ang mga kapistahan nga maoy bahin sa Balaod, dili kay basta lamang ang klima o agrikultural nga mga yugto sa panahon.​—Gal 4:10.

Busa ang “yugto sa panahon” mahimong magtumong sa usa ka tino o tinudlo nga panahon nga adunay partikular nga kinaiyahan. (Buh 3:​19, ftn sa Rbi8; Rom 8:18; Gal 6:9) Sa paglabay sa panahon ang naglangkob sa makapahimsog nga pagtulon-an ug hustong panggawi gipatin-aw pag-ayo ngadto sa mga Kristohanon. Sa pagkatinuod, kini mao ang “panahon” nga magmata. (Rom 13:11-14) Ang “mga panahon o mga yugto sa panahon,” sa dihang mahitabo ang kabubut-on ni Jehova sa pipila ka butang, makapainteres gayod sa iyang mga magsisimba (Buh 1:7), nga nakasabot niini samtang kini inanay nga gipadayag.​—1Te 5:1.

Labot sa pagpuyo sa katawhan sa mga nasod dinhi sa yuta, “gilatid [sa Diyos] ang tinudlong mga panahon” (Buh 17:26; “gitino ang mga panahon sa ilang kasaysayan,” NE) nga niana iyang gitino kon kanus-a kinahanglang mahitabo ang mga kausaban, sama sa kon kanus-a miabot ang tinudlong panahon sa Diyos sa pagluka sa Canaanhong mga molupyo sa Yutang Saad.​—Gen 15:13-21; Jer 25:8-11; Dan 2:21; 7:12; tan-awa ang TINUDLONG MGA PANAHON SA MGA NASOD.