Naningkamot nga Mahimong mga Mananaog
Kapitulo 8
Naningkamot nga Mahimong mga Mananaog
SMIRNA
1. (a) Unsang kongregasyona ang sunod nga nakadawat ug mensahe gikan sa hinimayang Jesus? (b) Pinaagi sa pagtawag sa iyang kaugalingon ingong “ang Una ug ang Ulahi,” unsay gipahinumdom ni Jesus sa mga Kristohanon nianang kongregasyona?
KARON, ang karaang Efeso nagun-ob na. Apan ang dapit nga gipadad-an ni Jesus sa iyang ikaduhang mensahe maoy usa gihapon ka puliking siyudad. Mga 55 kilometros amihanan sa kagun-oban sa Efeso mao ang siyudad sa Izmir, Turkey, diin makaplagan bisan karon ang upat ka madasigong mga kongregasyon sa mga Saksi ni Jehova. Kini ang nahimutangan sa Smirna sa unang siglo. Tagda karon ang sunod nga mga pulong ni Jesus: “Ug ngadto sa manulonda sa kongregasyon sa Smirna isulat kini: Mao kini ang mga butang nga iyang ginaingon, ‘ang Una ug ang Ulahi,’ kinsa namatay ug nabuhi pag-usab.” (Pinadayag 2:8) Pinaagi sa iyang pagsulti niini ngadto sa mga Kristohanon sa Smirna, si Jesus nagpahinumdom kanila nga siya mao ang unang tighupot ug integridad nga direktang gibanhaw ni Jehova ngadto sa imortal nga espirituhanong kinabuhi ug ang kataposang gibanhaw niining paagiha. Si Jesus mismo ang magbanhaw sa tanang uban pang dinihogan nga mga Kristohanon. Busa may katakos gayod siya sa pagtambag sa iyang mga igsoon, kinsa naglaom nga makabaton ug imortal nga kinabuhi sa langit uban kaniya.
2. Nganong ang mga pulong sa Usa nga “namatay ug nabuhi pag-usab” makapahupay sa tanang Kristohanon?
2 Si Jesus maoy maayong panig-ingnan sa paglahutay sa paglutos alang sa pagkamatarong, ug iyang nadawat ang nahiangayng ganti. Ang iyang pagkamatinumanon hangtod sa kamatayon ug pagkabanhaw mao ang pasukaranan sa paglaom sa tanang Kristohanon. (Buhat 17:31) Ang ‘pagkamatay ug pagkabuhi pag-usab’ ni Jesus nagpamatuod nga ang bisan unsang pag-antos nga maagoman tungod sa kamatuoran dili makawang. Ang pagkabanhaw ni Jesus makapadasig gayod sa tanang Kristohanon, ilabina kon sila kinahanglang mag-antos tungod sa ilang pagtuo. Mao ba kanay imong kahimtang? Nan madasig ka usab sa sunod nga mga pulong ni Jesus sa kongregasyon sa Smirna:
3. (a) Unsang makapadasig nga mga pulong ang gisulti ni Jesus sa mga Kristohanon sa Smirna? (b) Bisan pag pobre ang mga Kristohanon sa Smirna, nganong si Jesus nag-ingon nga sila “dato”?
3 “Nahibalo ako sa imong kasakitan ug kakabos—apan ikaw dato—ug sa pasipala nilang nagaingon nga sila mga Hudiyo, apan dili diay, hinunoa sinagoga sila ni Satanas.” (Pinadayag 2:9) Si Jesus walay ikasaway sa iyang mga igsoon sa Smirna, kondili lunlon mainitong komendasyon lamang. Sila nag-antos ug daghang kasakitan tungod sa ilang pagtuo. Sila pobre sa materyal, malagmit tungod sa ilang pagkamatinumanon. (Hebreohanon 10:34) Apan, ang ilang gihatagan ug importansiya mao ang espirituwal nga mga butang, ug sila nagtigom ug mga bahandi sa langit, ingon sa gitambag ni Jesus. (Mateo 6:19, 20) Busa, ang Pangulong Magbalantay nag-isip kanila ingong “dato.”—Itandi ang Santiago 2:5.
4. Ang mga Kristohanon sa Smirna nag-antos ug grabeng pagsupak sa mga kamot ni kinsa, ug unsay paglantaw ni Jesus sa maong mga magsusupak?
4 Si Jesus nakamatikod ilabina sa pag-antos sa mga Kristohanon sa Smirna sa grabeng pagsupak sa unodnong mga Hudiyo. Una pa niana, daghang membro niini nga relihiyon supak kaayo sa pagkaylap sa Kristiyanidad. (Buhat 13:44, 45; 14:19) Niining higayona, pipila pa lang ka dekada human mapukan ang Jerusalem, ang mga Hudiyo sa Smirna nagpakita na ug samang satanasnong espiritu. Dili ikahibulong nga gilantaw sila ni Jesus ingong ‘sinagoga ni Satanas’! a
5. Unsang mga pagsulay ang pagaantoson sa mga Kristohanon sa Smirna?
5 Kay gidumtan pag-ayo, ang mga Kristohanon sa Smirna gipalig-on ni Jesus: “Ayaw kahadlok sa mga butang nga hapit na nimong antoson. Tan-awa! Ang Yawa padayong magabalhog sa pipila KANINYO sa bilanggoan aron KAMO bug-os mabutang sa pagsulay, ug aron KAMO makaagom ug kasakitan sulod sa napulo ka adlaw. Pamatud-i ang imong kaugalingon nga matinumanon bisan hangtod sa kamatayon, ug igahatag ko kanimo ang purongpurong sa kinabuhi.” (Pinadayag 2:10) Dinhi si Jesus tulo ka beses nga migamit ug Gregong pulong nga nagkahulogang “kamo” o “kaninyo,” nga nagpakita nga ang iyang mga pulong nagtumong sa tibuok kongregasyon. Si Jesus wala magsaad nga ang mga pagsulay sa mga Kristohanon sa Smirna matapos na sa dili madugay. Ang uban kanila padayon nga pagalutoson ug ibalhog sa bilanggoan. Sila makaagom ug kasakitan sulod sa “napulo ka adlaw.” Ang napulo maoy numero nga nagsimbolo sa yutan-ong pagkakompleto o pagkabug-os. Bisan kadtong mga tighupot ug integridad nga dato sa espirituwal bug-os nga pagasulayan samtang unodnon pa.
6. (a) Nganong ang mga Kristohanon sa Smirna dili angayng mahadlok? (b) Sa unsang paagi gitapos ni Jesus ang iyang mensahe sa kongregasyon sa Smirna?
6 Bisan pa niana, ang mga Kristohanon sa Smirna dili angayng mahadlok o mokompromiso. Kon sila magpabiling matinumanon hangtod sa kataposan, dunay giandam alang kanila nga ganti nga “purongpurong sa kinabuhi,” nga sa ilang bahin maoy imortal nga kinabuhi sa mga langit. (1 Corinto 9:25; 2 Timoteo 4:6-8) Alang kang apostol Pablo, takos nga isakripisyo ang bisan unsa, bisan ang iyang yutan-ong kinabuhi alang lamang niining hamiling ganti. (Filipos 3:8) Dayag nga sama usab niini ang gibati sa mga matinumanon sa Smirna. Si Jesus nagtapos sa iyang mensahe pinaagi sa pag-ingon: “Ang adunay igdulungog magpatalinghog sa ginaingon sa espiritu ngadto sa mga kongregasyon: Siya nga magmadaogon, ang ikaduhang kamatayon dili gayod makahimo sa pagdaot kaniya.” (Pinadayag 2:11) Ang mga mananaog gipasaligan ug imortal nga kinabuhi sa langit nga dili matandog sa kamatayon.—1 Corinto 15:53, 54.
“Kasakitan Sulod sa Napulo ka Adlaw”
7, 8. Sama sa kongregasyon sa Smirna, sa unsang paagi ang Kristohanong kongregasyon ‘gisulayan sa bug-os’ niadtong 1918?
7 Sama gayod sa mga Kristohanon sa Smirna, ang Juan nga matang ug ang ilang mga kauban karon padayong ‘gisulayan sa bug-os.’ Ang ilang pagkamatinumanon ubos sa pagsulay nagpaila kanila nga sila katawhan gayod sa Diyos. (Marcos 13:9, 10) Wala madugay human magsugod ang adlaw sa Ginoo, ang mga pulong ni Jesus sa mga Kristohanon sa Smirna nakahatag gayod ug kahupayan sa gamayng internasyonal nga grupo sa katawhan ni Jehova. (Pinadayag 1:10) Sukad niadtong 1879, sila padayon nga nagkalot ug espirituwal nga mga bahandi gikan sa Pulong sa Diyos nga kinabubut-on nilang gipaambit sa uban. Apan sa panahon sa Gubat sa Kalibotan I, sila nag-antos ug hilabihang pagdumot ug pagsupak, tungod kay sila wala makiglambigit sa kagubot sa gubat ug tungod kay walay kokahadlok nga giyagyag nila ang mga sala sa Kakristiyanohan. Ang paglutos nga ilang naagoman tungod sa paghulhog sa ubang mga lider sa Kakristiyanohan misamot niadtong 1918 ug sama kini sa naagoman sa mga Kristohanon sa Smirna sa mga kamot sa Hudiyohanong komunidad didto.
8 Ang dakong paglutos nga nahitabo sa Tinipong Bansa sa Amerika nakadangat sa kinapungkayan niini sa dihang ang bag-ong presidente sa Watch Tower Society, nga si Joseph F. Rutherford, ug ang iyang pito ka kauban gibalhog sa bilanggoan niadtong Hunyo 22, 1918, nga ang kadaghanan kanila gisentensiyahan ug 20 ka tuig. Human sa pagbayad ug piyansa, sila gibuhian paglabay sa siyam ka bulan. Niadtong Mayo 14, 1919, gibali sa korte sa apelasyon ang ilang sayop nga desisyon; dihay nakita nga 130 ka sayop sa bista. Si Huwes Manton, nga usa ka Romano Katoliko ug kabalyero sa orden ni San Gregorio nga Bantogan, kinsa niadtong 1918 midumili sa piyansa niining maong mga Kristohanon, sa ulahi gisentensiyahan niadtong 1939 ug duha ka tuig nga pagkabilanggo ug multa nga $10,000 sa unom ka sumbong nga pagpangayo ug pagdawat ug mga hiphip.
9. Giunsa pagtratar ni Hitler ang mga Saksi ni Jehova sa Nazi nga Alemanya, ug unsay reaksiyon sa klero?
9 Sa panahon sa pagmando sa Nazi sa Alemanya, si Hitler bug-os nga nagdili sa buluhatong pagsangyaw sa mga Saksi ni Jehova. Sulod sa daghang katuigan, libolibong Saksi ang mapintasong gibalhog sa mga kampo konsentrasyon ug mga bilanggoan, diin daghan ang nangamatay, samtang 200 ka batan-ong mga lalaki nga midumili sa pagkahimong mga sundalo ni Hitler ang gipamatay. Ang pagpaluyo sa klero niining tanan gipamatud-an diha sa mga pulong sa usa ka Katolikong pari, nga gipatik sa mantalaang The German Way sa Mayo 29, 1938. Matod pa niya: “Karon aduna nay usa ka nasod sa yuta diin ang gitawag nga . . . mga Estudyante sa Bibliya [mga Saksi ni Jehova] gidid-an. Kana mao ang Alemanya! . . . Sa dihang nagmando si Adolph Hitler, ug sa dihang ang Katolikong Kaobispohan sa Alemanya mihangyo na usab kaniya, si Hitler miingon: ‘Kining gitawag nga Earnest Bible Students [mga Saksi ni Jehova] mga samokan; . . . giisip nako sila nga mga mini; dili ako motugot nga ang mga Katolikong Aleman maduhigan niining Amerikanong Huwes Rutherford; papason ko [ang mga Saksi ni Jehova] sa Alemanya.’” Niini, ang pari miingon: “Maayo!”
10. (a) Samtang nagpadayon ang adlaw sa Ginoo, unsang paglutos ang giatubang sa mga Saksi ni Jehova? (b) Unsay kasagarang resulta sa dihang magpasaka ug sumbong ang mga Kristohanon alang sa relihiyosong kagawasan diha sa mga korte?
10 Samtang nagpadayon ang adlaw sa Ginoo, ang Halas ug ang iyang binhi wala gayod mohunong sa pagpakig-away batok sa dinihogang mga Kristohanon ug sa ilang mga kauban. Daghan kanila ang gibilanggo ug grabeng gidagmalan. (Pinadayag 12:17) Ang maong mga kaaway nagpadayon sa ‘pagmugnag kadaot pinaagi sa balaod,’ apan ang katawhan ni Jehova lig-ong miinsistir: “Kinahanglang among sugton ang Diyos ingong magmamando inay ang mga tawo.” (Salmo 94:20, King James Version; Buhat 5:29) Niadtong 1954 ang magasing Watchtower mitaho: “Sa nagkalainlaing panahon sulod sa milabayng kap-atan ka tuig, kapin sa kapitoan ka nasod nagpakanaog ug mapig-otong mga balaod ug naglutos sa mga saksi ni Jehova.” Ang mga Kristohanon nagpasaka ug sumbong alang sa relihiyosong kagawasan diha sa mga korte, diin kini posible, ug sila nakadaog diha sa daghang nasod. Sa Korte Suprema sa Tinipong Bansa lamang, 50 ka kaso na ang nadaog sa mga Saksi ni Jehova.
11. Unsang tagna ni Jesus mahitungod sa ilhanan sa iyang presensiya ang natuman diha sa mga Saksi ni Jehova panahon sa adlaw sa Ginoo?
11 Walay laing grupo ang matinumanong nagtuman sa sugo ni Jesus sa pagbayad kang Cesar sa mga butang nga iya ni Cesar. (Lucas 20:25; Roma 13:1, 7) Bisan pa niana, walay laing grupo nga ang mga membro niini gibilanggo diha sa daghan kaayong kayutaan ubos sa daghang nagkalainlaing matang sa kagamhanan, ug kini nagpadayon hangtod karon diha sa kanasoran sa Amerika, Uropa, Aprika, ug Asia. Ang dakong tagna ni Jesus mahitungod sa ilhanan sa iyang presensiya naglakip niining mga pulonga: “Unya itugyan kamo sa mga tawo ngadto sa kasakitan ug pagapatyon kamo, ug kamo pagadumtan sa tanang kanasoran tungod sa akong ngalan.” (Mateo 24:3, 9) Kini natuman gayod diha sa Kristohanong mga Saksi ni Jehova panahon sa adlaw sa Ginoo.
12. Sa unsang paagi ang Juan nga matang nagpalig-on sa katawhan sa Diyos batok sa paglutos?
12 Sa pagpalig-on sa katawhan sa Diyos batok sa kasakitan, ang Juan nga matang kanunayng nagpahinumdom kanila sa diwa sa mga pulong ni Jesus ngadto sa mga Kristohanon sa Smirna. Pananglitan, sa dihang nagsugod sa pagpanglutos ang Nazi, ang The Watchtower sa 1933 ug 1934 nagpatik ug mga artikulo sama sa “Ayaw Kahadlok Kanila,” nga naghisgot sa Mateo 10:26-33; “Ang Grabeng Pagsulay,” nga gibase sa Daniel 3:17, 18; ug “Ang mga Baba sa mga Leyon,” nga ang yawing teksto mao ang Daniel 6:22. Sa katuigan sa 1980, nga niining maong dekada unang gipatik kining libro nga Pinadayag ug ang mga Saksi ni Jehova mapintas nga gilutos diha sa kapin sa 40 ka kayutaan, Ang Bantayanang Torre nagpalig-on sa katawhan sa Diyos pinaagi sa mga artikulong sama sa “Malipayon Bisag Gilutos!” ug “Mga Kristohanon Nagaatubang sa Paglutos Uban ang Pagkamainantoson.” b
13. Sama sa mga Kristohanon sa Smirna, nganong ang Kristohanong mga Saksi ni Jehova dili mahadlok sa paglutos?
13 Oo, ang Kristohanong mga Saksi ni Jehova nag-antos ug pisikal nga paglutos ug ubang mga pagsulay sulod sa simbolikong napulo ka adlaw. Sama sa mga Kristohanon sa Smirna kaniadto, sila dili mahadlok; ug dili angayng mahadlok ang si bisan kinsa kanato samtang magkagrabe pa ang mga problema dinhi sa yuta. Kita andam sa pag-antos ug sa pagkalipay bisan pag ‘agawon ang atong mga gipanag-iya.’ (Hebreohanon 10:32-34) Pinaagi sa pagtuon sa Pulong sa Diyos ug sa pagpadapat niini, kita masangkapan sa pagbarog nga malig-on sa pagtuo. Magmasaligon nga si Jehova makapanalipod ug magapanalipod kanimo sa imong integridad. “Itugyan kaniya ang tanan ninyong mga kabalaka, kay siya may kahingawa kaninyo.”—1 Pedro 5:6-11.
[Mga footnote]
a Mga 60 ka tuig human mamatay si Juan, ang 86-anyos nga si Polycarp gisunog hangtod namatay didto sa Smirna kay wala niya isalikway ang iyang pagtuo kang Jesus. Ang The Martyrdom of Polycarp, usa ka basahon nga gituohang gisulat dungan niini nga panghitabo, nag-ingon nga sa dihang nagtigom ug kahoyng gamiton sa pagsunog, “ang mga Hudiyo nagpakitag dakong kakugi niining buluhatona, nga maoy ilang kinaiya”—bisag kini nga pagpatay gihimo sa “dakong adlaw nga Igpapahulay.”
b Tan-awa Ang Bantayanang Torre sa Nobyembre 1, 1933; Oktubre 1 ug 15, Disyembre 1 ug 15, 1934 sa Iningles; Nobyembre 1, 1983.
[Mga Pangutana sa Pagtuon]
[Kahon/Hulagway sa panid 39]
Sa daghang tuig, ang mga historyano naghatag ug pamatuod bahin sa integridad sa mga Saksi ni Jehova sa Alemanya panahon sa pagmando sa Nazi. Ang librong Mothers in the Fatherland, sa historyanong si Claudia Koonz, nga gipatik sa 1986, nag-ingon: “Kadaghanan sa mga Aleman nga dili Nazi nakakaplag ug mga paagi sa pagkinabuhi ubos sa pamunoan nga ilang gitamay. . . . Sa laing bahin, gipakita sa estadistika bahin sa mga tawong lainlain ug ideolohiya nga dihay 20,000 ka Saksi ni Jehova kinsa, halos matag usa kanila, lig-ong midumili sa pagsugot sa estado sa mga Nazi sa bisan unsang paagi. . . . Ang labing nahiusa nga grupo sa mga magsusupak nakalahutay tungod sa ilang relihiyon. Sukad sa sinugdan, ang mga Saksi ni Jehova wala makigkooperar sa bisan unsang bahin sa estado sa mga Nazi. Bisag giguba sa Gestapo ang ilang hedkuwarter sa nasod niadtong 1933 ug gidili ang sekta niadtong 1935, sila midumili bisan na lang sa pag-ingon ug ‘Heil Hitler.’ Halos katunga (kadaghanan mga lalaki) sa mga Saksi ni Jehova gibalhog ngadto sa mga kampo konsentrasyon, usa ka libo kanila ang gipamatay, ug laing usa ka libo ang namatay gikan sa 1933 hangtod 1945. . . . Ang mga Katoliko ug mga Protestante nakadungog sa ilang klero nga nag-awhag kanila sa pagkooperar kang Hitler. Kon sila mosupak, sama ra nga ilang gisupak ang balaod sa simbahan ug estado.”
