Kapitulo Desisayis

Usa ka Mensahe sa Paglaom Alang sa Naminghoy nga mga Binihag

Isaias 55:1-13

1. Batbata ang kahimtang sa Hudiyong mga destiyero sa Babilonya.

 KADTO usa ka mangiob nga yugto sa kasaysayan sa Juda. Ang katawhang may pakigsaad sa Diyos pinugos nga gikuha gikan sa ilang yutang-natawhan ug karon nag-antos sa pagkabinihag sa Babilonya. Tinuod, sila gitugotan ug gamayng kagawasan sa paghimo sa ilang inadlawng mga buluhaton. (Jeremias 29:4-7) Ang pipila nakakat-on ug propesyonal nga mga kahanas o nagpahigayon ug mga negosyo. a (Nehemias 3:8, 31, 32) Bisan pa niana, ang kinabuhi sa Hudiyong mga binihag dili sayon. Naulipon sila, sa lawasnon ug espirituwal nga paagi. Tan-awon nato kon sa unsang paagi.

2, 3. Sa unsang paagi ang pagkadestiyero nakaapektar sa pagsimba sa mga Hudiyo kang Jehova?

² Sa dihang ang Babilonyanhong kasundalohan naglaglag sa Jerusalem sa 607 W.K.P., dili lang usa ka nasod ang ilang gilaglag; gidaot usab nila ang matuod nga pagsimba. Gilungkab nila ang templo ni Jehova ug giguba kana, nga gidaot ang kahikayan sa mga saserdote pinaagi sa pagbihag sa pipila ka sakop sa tribo ni Levi ug sa pagpatay sa uban. Kay wala nay balay sa pagsimba, wala nay halaran, ug wala nay organisadong mga saserdote, ang mga Hudiyo dili na makatanyag ug mga halad ngadto sa matuod nga Diyos sumala sa gilagda sa Balaod.

³ Natipigan pa sa matinumanong mga Hudiyo ang ilang relihiyosong ilhanan pinaagi sa pagtuman sa sirkunsisyon ug pagsunod  sa Balaod kutob sa maarangan. Pananglitan, sila naglikay sa gidiling mga pagkaon ug nagbantay sa Igpapahulay. Apan sa pagbuhat sa ingon, nameligro nga tamayon sila sa ilang mga magbibihag, kay giisip sa mga Babilonyanhon nga binuang ang relihiyosong mga rituwal sa mga Hudiyo. Ang naminghoy nga kahimtang sa mga destiyero masabtan diha sa mga pulong sa salmista: “Sa daplin sa mga suba sa Babilonya—didto kami nanglingkod. Kami nanghilak usab sa dihang nahinumdom kami sa Zion. Sa mga kahoyng alamo sa taliwala niya gibitay namo ang among mga alpa. Kay kadtong nagbihag kanamo didto nangayo kanamog mga pulong sa usa ka awit, ug kadtong nagyagayaga kanamo—sa paglipay: ‘Awiti kami ug usa sa mga awit sa Zion.’”—Salmo 137:1-3.

4. Nganong walay kapuslanan nga ang mga Hudiyo mosalig sa ubang mga nasod alang sa kaluwasan, apan kang kinsa sila makadangop alang sa tabang?

⁴ Nan, kinsa bay kadangpan sa Hudiyong mga binihag alang sa kahupayan? Gikan diin ba unya ang ilang kaluwasan? Tino nga dili magagikan sa bisan hain sa naglibot nga mga nasod! Kadtong tanan walay gahom batok sa kasundalohan sa Babilonya, ug daghan ang masupakon sa mga Hudiyo. Apan dili kay walay paglaom ang kahimtang. Si Jehova, nga gisuklan nila sa dihang sila maoy gawasnong katawhan, sa kamadasigon nagdapit kanila bisan pag nadestiyero pa sila.

“Umari Kamo sa Tubig”

5. Unsay kahulogan sa pamulong “umari kamo sa tubig”?

⁵ Pinaagi ni Isaias, si Jehova matagnaong nakigsulti sa Hudiyong mga binihag sa Babilonya: “Hoy, kamong tanan nga ginauhaw! Umari kamo sa tubig. Ug ang mga walay salapi! Umari kamo, palit ug kaon. Oo, umari kamo, palit ug bino ug gatas bisag walay salapi ug walay bayad.” (Isaias 55:1) Daghan ug simbolismo kining mga pulonga. Pananglitan, tagda ang pagdapit: “Umari kamo sa tubig.” Kon walay tubig, imposible ang kinabuhi. Kon wala kanang bililhong likido, kitang mga tawo mabuhi lang sa mga usa ka semana. Busa, haom nga gamiton ni Jehova  ang tubig ingong pasumbingay alang sa epekto unya niini diha sa Hudiyong mga binihag. Ang iyang mensahe makapabaskog kanila, samag mabugnawng ilimnon sa init nga adlaw. Kana magwagtang sa ilang masulub-ong panghunahuna, nga magtagbaw sa ilang kauhaw alang sa kamatuoran ug sa pagkamatarong. Ug kana maghatag kanila ug paglaom sa kagawasan gikan sa pagkabihag. Bisan pa niana, aron makapahimulos niana, ang Hudiyong mga destiyero kinahanglang modawat sa mensahe sa Diyos, magpatalinghog niana, ug molihok pinasukad niana.

6. Sa unsang paagi ang mga Hudiyo makabatog kaayohan kon sila mopalit ug “bino ug gatas”?

⁶ Si Jehova nagtanyag usab ug “bino ug gatas.” Ang gatas makapabaskog sa linghod nga mga lawas ug motabang nga motubo ang mga bata. Sa susama, ang mga pulong ni Jehova makapalig-on sa iyang katawhan sa espirituwal nga paagi ug makapaarang kanila sa pagpalig-on sa ilang relasyon uban niya. Apan, unsa  na man ang bahin sa bino? Ang bino sagad gamiton sa masadyaong mga okasyon. Sa Bibliya, kini gilangkit sa kauswagan ug pagsadya. (Salmo 104:15) Pinaagi sa pagsugo sa iyang katawhan nga “palit ug bino,” si Jehova nagpasalig kanila nga ang bug-os-kasingkasing nga pagbalik sa matuod nga pagsimba maghimo kanila nga “magmalipayon gayod.”—Deuteronomio 16:15; Salmo 19:8; Proverbio 10:22.

7. Nganong talagsaon ang kahangawa ni Jehova alang sa mga nadestiyero, ug unsay ginatudlo niini kanato bahin kaniya?

⁷ Pagkamaluluy-on ni Jehova sa pagtanyag nianang espirituwal nga pagpalagsik alang sa nadestiyerong mga Hudiyo! Ang iyang kahangawa labi pang talagsaon sa dihang mahinumdom kita sa kasaysayan sa pagkamasupilon ug pagkarebelyoso sa mga Hudiyo. Dili ingon nga takos sila sa pag-uyon ni Jehova. Bisan pa niana, ang salmistang si David misulat kasiglohan nga sayosayo: “Si Jehova maluluy-on ug mapuangoron, mahinay sa kasuko ug dagaya sa mahigugmaong-kalulot. Siya dili mangitag sayop sa tanang panahon, ni mayugot siya hangtod sa panahong walay tino.” (Salmo 103:8, 9) Halayo sa pagbugto sa iyang relasyon uban sa iyang katawhan, si Jehova naghimo sa unang tikang padulong sa pagkapasig-uli kaniya. Sa tinuoray, siya maoy Diyos nga “nahimuot sa mahigugmaong-kalulot.”—Miqueas 7:18.

Sayop-Pagkabutang nga Pagsalig

8. Diin ibutang sa daghang Hudiyo ang ilang pagsalig, bisan pa sa unsang pasidaan?

⁸ Hangtod karong adlawa daghang Hudiyo wala magbutang sa ilang bug-os nga pagsalig kang Jehova alang sa kaluwasan. Pananglitan, una pa sa pagkapukan sa Jerusalem, ang mga magmamando niini misalig sa gamhanang mga nasod alang sa suportar, nga nagpakighilawas, ingnon ta, sa Ehipto ug sa Babilonya. (Ezequiel 16:26-29; 23:14) Nga may maayong katarongan, si Jeremias nagpasidaan kanila: “Tinunglo ang tawo nga lig-on ug lawas nga nagbutang sa iyang pagsalig sa yutan-ong tawo ug sa tinuod nagahimo sa unod nga maoy iyang bukton, ug kansang kasingkasing  nagpahilayo kang Jehova.” (Jeremias 17:5) Bisan pa, mao gayod kanay gihimo sa katawhan sa Diyos!

9. Sa unsang paagi ang daghang Hudiyo mahimong “nagbayad ug salapi alang sa dili tinapay”?

⁹ Karon sila naulipon sa usa sa mga nasod nga ilang gisaligan. Naleksiyon ba sila? Mahimong ang daghan wala, kay si Jehova nangutana: “Nganong kamo nagbayad ug salapi alang sa dili tinapay, ug nganong kamo nagbudlay alang nianang dili makapatagbaw?” (Isaias 55:2a) Kon ang binihag nga mga Hudiyo nagsalig kang bisan kinsa gawas kang Jehova, sila “nagbayad ug salapi alang sa dili tinapay.” Sila seguradong dili makabaton ug kagawasan gikan sa Babilonya tungod sa polisa niini nga ang mga binihag dili gayod tugotan nga mobalik sa ilang kaugalingong dapit. Sa pagkatinuod, ang Babilonya, uban sa imperyalismo, komersiyalismo, ug bakak nga pagsimba niini, walay ikatanyag sa nadestiyerong mga Hudiyo.

10. (a) Sa unsang paagi gantihan ni Jehova ang nadestiyerong mga Hudiyo kon sila magpatalinghog kaniya? (b) Unsang pakigsaad ang gihimo ni Jehova uban kang David?

¹⁰ Si Jehova mihangyo sa iyang katawhan: “Pamati pag-ayo kanako, ug kaon kon unsay maayo, ug tugoting makakaplag ang inyong kalag sa tumang kalipay niini diha sa katambok mismo. Ikiling ang inyong igdulungog ug ari kanako. Pamati kamo, ug ang inyong kalag magpadayong buhi, ug andam kong himoon uban kaninyo ang usa ka pakigsaad nga mohangtod sa panahong walay tino maylabot sa kasaligan nga mga mahigugmaong-kalulot kang David.” (Isaias 55:2b, 3) Ang bugtong paglaom alang sa maong katawhan nga kulang ug espirituwal nga pagkaon nahasandig kang Jehova, kinsa niadtong panahona matagnaong nakigsulti kanila pinaagi ni Isaias. Ang ilang kinabuhi nagdepende sa pagpatalinghog sa mensahe sa Diyos, kay siya nag-ingon nga pinaagi sa ilang paghimo niana, ang ilang “kalag magpadayong buhi.” Apan, unsa man ang “pakigsaad nga mohangtod sa panahong walay tino” nga gihimo ni Jehova uban niadtong mosanong kaniya? Ang maong pakigsaad maoy “maylabot sa kasaligan nga mga mahigugmaong-kalulot kang David?” Kasiglohan nga sayosayo, si Jehova misaad kang David nga ang  iyang trono “matukod nga malig-on hangtod sa panahong walay tino.” (2 Samuel 7:16) Busa, ang “pakigsaad nga mohangtod sa panahong walay tino” nga gihisgotan dinhi maoy maylabot sa pagmando.

Usa ka Permanenteng Manununod sa Walay-Kataposang Gingharian

11. Nganong ang katumanan sa saad sa Diyos kang David maorag dili posible alang sa mga destiyero sa Babilonya?

¹¹ Tinuod, ang ideya sa pagmando sa kaliwatan ni David maorag dili posible alang niadtong Hudiyong mga destiyero. Nawad-an na sila sa ilang yuta ug bisan sa ilang pagkanasod! Apan kadto temporaryo lamang. Si Jehova wala malimot sa iyang pakigsaad kang David. Bisan kon unsa ka lagmit dili mahitabo kana gikan sa tawhanong panglantaw, ang katuyoan sa Diyos mahitungod sa walay-kataposang Gingharian diha sa kaliwatan ni David molampos gayod. Apan sa unsang paagi ug kanus-a? Sa 537 W.K.P., gipagawas ni Jehova ang iyang katawhan gikan sa pagkabihag sa Babilonya ug gipasig-uli sila ngadto sa ilang yutang-natawhan. Misangpot ba kadto sa pagkatukod sa usa ka gingharian nga mohangtod sa panahong walay tino? Wala, kay sila nagpadayong sakop sa laing paganong imperyo, ang Medo-Persia. “Ang tinudlong mga panahon” aron ang mga nasod maoy magamando wala pa matapos. (Lucas 21:24) Kay walay hari sa Israel, ang saad nga gihatag ni Jehova kang David magpabiling dili-matuman sa umaabot nga kasiglohan.

12. Unsang tikang ang gihimo ni Jehova padulong sa pagkatuman sa iyang pakigsaad sa Gingharian nga gihimo kang David?

¹² Kapig 500 ka tuig pagkagawas sa Israel gikan sa pagkabihag sa Babilonya, si Jehova mihimog laing dakong tikang padulong sa pagkatuman sa pakigsaad sa Gingharian sa dihang gibalhin niya ang kinabuhi sa iyang panganay nga Anak, ang sinugdan sa iyang mga gilalang, gikan sa langitnong himaya ngadto sa tagoangkan sa Hudiyang ulay nga si Maria. (Colosas 1:15-17) Sa dihang gipahibalo ang maong hitabo, ang manulonda ni Jehova miingon kang Maria: “Kini siya mahimong bantogan ug pagatawgong  Anak sa Labing Hataas; ug ihatag kaniya ni Jehova nga Diyos ang trono ni David nga iyang amahan, ug magamando siya ingon nga hari sa balay ni Jacob hangtod sa kahangtoran, ug walay pagkatapos ang iyang gingharian.” (Lucas 1:32, 33) Busa si Jesus natawo sa harianong kaliwatan ni David ug nakapanunod sa katungod sa pagkahari. Sa dihang makalingkod na sa trono, si Jesus magamando “hangtod sa panahong walay tino.” (Isaias 9:7; Daniel 7:14) Sa ingon ang dalan nabuksan na karon aron matuman ang kasiglohan-ug-edad nga saad ni Jehova nga hatagan si Haring David ug permanenteng manununod.

“Komandante Ngadto sa Nasodnong mga Pundok”

13. Sa unsang paagi si Jesus maoy “saksi ngadto sa nasodnong mga pundok” panahon sa iyang ministeryo ug human sa iyang pagkayab?

¹³ Unsay himoon sa maong umaabot nga hari? Si Jehova nag-ingon: “Tan-awa! Ingong saksi ngadto sa nasodnong mga pundok akong gihatag siya, ingong pangulo ug komandante ngadto sa nasodnong mga pundok.” (Isaias 55:4) Sa dihang si Jesus nahingkod na, siya ang hawas ni Jehova sa yuta, ang saksi sa Diyos ngadto sa mga nasod. Panahon sa iyang tawhanong pagkinabuhi, ang iyang ministeryo gitumong ngadto sa “nawalang mga karnero sa balay sa Israel.” Bisan pa niana, sa dayon na niyang pagkayab sa langit, si Jesus miingon sa iyang mga sumusunod: “Busa panglakaw kamo ug paghimog mga tinun-an sa katawhan sa tanang kanasoran . . . Tan-awa! ako magauban kaninyo sa tanang adlaw hangtod sa kataposan sa sistema sa mga butang.” (Mateo 10:5, 6; 15:24; 28:19, 20) Busa, sa nahaigong panahon, ang mensahe sa Gingharian gidala ngadto sa mga dili-Hudiyo, ug ang pipila kanila nakigbahin sa pagkatuman sa pakigsaad nga gihimo uban kang David. (Buhat 13:46) Niining paagiha, bisan human sa iyang pagkamatay, pagkabanhaw, ug pagkayab ngadto sa langit, si Jesus nagpadayon nga “saksi [ni Jehova] ngadto sa nasodnong mga pundok.”

14, 15. (a) Sa unsang paagi gipamatud-an ni Jesus nga siya “pangulo ug komandante”? (b) Unsang palaaboton ang gihambin sa unang-siglo nga mga sumusunod ni Jesus?

 ¹⁴ Si Jesus mahimo usab nga usa ka “pangulo ug komandante.” Sa pagtuman niining matagnaong kahubitan, sa dinhi sa yuta bug-os nga gidawat ni Jesus ang mga responsabilidad sa iyang pagkaulo ug nanguna sa tanang bahin, nga nakadanig dagko kaayong mga panon sa katawhan, nga nagtudlo kanila sa mga pulong sa kamatuoran, ug nagpaila sa mga kaayohan nga modangat niadtong mosunod sa iyang pagpangulo. (Mateo 4:24; 7:28, 29; 11:5) Gibansay niya sa epektibong paagi ang iyang mga tinun-an, nga giandam sila sa pagtuman sa buluhatong pagsangyaw nga diha sa unahan. (Lucas 10:1-12; Buhat 1:8; Colosas 1:23) Sa tulo ug tunga ka tuig lamang, gipahimutang ni Jesus ang patukoranan alang sa nahiusa, internasyonal nga kongregasyon uban ang linibong mga membro nga kinuha gikan sa daghang rasa! Ang usa ka matuod lamang nga “pangulo ug komandante” ang makahimo sa maong labihan ka dakong tahas. b

¹⁵ Kadtong natigom sa unang-siglo nga Kristohanong kongregasyon gidihogan sa balaang espiritu sa Diyos, ug sila mahimong umaabot nga kaubang mga magmamando ni Jesus sa iyang langitnong Gingharian. (Pinadayag 14:1) Bisan pa niana, ang tagna ni Isaias mosaylo pa sa mga adlaw sa unang Kristiyanidad. Gipakita sa ebidensiya nga si Jesu-Kristo nagsugod lamang sa pagmando ingong Hari sa Gingharian sa Diyos niadtong 1914. Wala madugay human niadto, naugmad ang usa ka kahimtang taliwala sa dinihogang mga Kristohanon sa yuta nga may daghang kasamahan sa kahimtang sa nadestiyerong mga Hudiyo sa ikaunom nga siglo W.K.P. Sa pagkatinuod, kon unsay nahitabo sa maong mga Kristohanon maoy dakong katumanan sa tagna ni Isaias.

 Modernong-Adlaw nga Pagkabihag ug Pagkagawas

16. Unsang kasakitan ang misunod sa paglingkod ni Jesus sa trono sa 1914?

¹⁶ Ang paglingkod ni Jesus sa trono ingong Hari sa 1914 natiman-an sa way-ingon nga kasakitan sa kalibotan. Ngano man? Kay sa pagkahimong Hari, gipalagpot ni Jesus si Satanas ug ang ubang daotang espiritung mga linalang gikan sa langit. Sa dihang gilimitehan na lang sa yuta, si Satanas nagsugod sa pagpakiggubat batok sa nahibiling mga balaan, ang nahibilin sa dinihogang mga Kristohanon. (Pinadayag 12:7-12, 17) Ang tayuktok nahitabo sa 1918 sa dihang ang publikong buluhaton sa pagsangyaw halos nahunong ug gibilanggo ang may-katungdanang mga opisyales sa Watch Tower Society pinasukad sa mga sumbong nga rebelyon. Sa maong paagi, ang modernong-adlawng mga alagad ni Jehova nahiagom sa espirituwal nga pagkabihag, nga makapahinumdom sa lawasnong pagkabihag sa karaang mga Hudiyo. Nagkaduol ang dakong pagpakaulaw kanila.

17. Sa unsang paagi ang kahimtang sa mga dinihogan nabalit-ad sa 1919, ug sa unsang paagi sila napalig-on niadtong panahona?

¹⁷ Bisan pa niana, wala magdugay ang pagkabihag sa dinihogang mga alagad sa Diyos. Sa Marso 26, 1919, gipagawas ang nabilanggong mga opisyales, ug sa ulahi gidismis ang tanang sumbong batok kanila. Gibubo ni Jehova ang balaang espiritu diha sa iyang napagawas nga katawhan, nga nagpalagsik kanila alang sa buluhaton sa unahan. Sa pagkamalipayon, ilang gidawat ang pagdapit nga ‘moinom sa tubig sa kinabuhi nga walay bayad.’ (Pinadayag 22:17) Sila mipalit ug “bino ug gatas bisag walay salapi ug walay bayad” ug nalig-on sa espirituwal alang sa kahibulongang pag-uswag nga diha sa unahan, pag-uswag nga wala makita daan sa dinihogang nahibilin.

Usa ka Dakong Panon Nagdagan Paingon sa mga Dinihogan sa Diyos

18. Unsang duha ka pundok ang makaplagan taliwala sa mga tinun-an ni Jesu-Kristo, ug naporma sila nga unsa karong adlawa?

¹⁸ Gihambin sa mga tinun-an ni Jesus ang usa sa duha ka paglaom. Una, natigom na ang “gamayng panon” nga mokabat ug  144,000—ang dinihogang mga Kristohanon nga Hudiyohanon ug Hentil ang mga kagikan nga mao ang “Israel sa Diyos” ug nakabaton sa paglaom nga magmando kauban ni Jesus sa iyang langitnong Gingharian. (Lucas 12:32; Galacia 6:16; Pinadayag 14:1) Ikaduha, sa kataposang mga adlaw, ang “usa ka dakong panon” sa “ubang mga karnero” nagpadayag sa ilang kaugalingon. Kini sila nakabaton sa paglaom nga mabuhing walay kataposan sa usa ka paraisong yuta. Sa dili pa moulbo ang dakong kasakitan, ang maong dakong panon—kansang gidaghanon wala matino daan—nag-alagad kauban sa gamayng panon, ug ang duha ka pundok nahimong “usa ka panon” ilalom sa “usa ka magbalantay.”—Pinadayag 7:9, 10; Juan 10:16.

19. Sa unsang paagi ang “usa ka nasod” nga sa nangagi wala mailhi sa Israel sa Diyos misanong sa awhag sa maong espirituwal nga nasod?

¹⁹ Ang pagtigom niining dakong panon masabtan sa mosunod nga mga pulong sa tagna ni Isaias: “Tan-awa! Usa ka nasod nga wala mo mailhi imong pagatawgon, ug silang iya sa usa ka nasod nga wala makaila kanimo modagan nganha kanimo, tungod kang Jehova nga imong Diyos, ug alang sa Balaang Usa sa Israel, tungod kay siya magpatahom kanimo.” (Isaias 55:5) Sa mga tuig human sa ilang pagkagawas sa espirituwal nga pagkabihag, ang dinihogang nahibilin sa sinugdan wala makasabot nga una pa sa Armagedon gamiton sila aron tawgon ang usa ka dakong “nasod” alang sa pagsimba ni Jehova. Bisan pa niana, sa pag-aginod sa panahon, daghang matarong-ug-kasingkasing nga mga tawong wala makabaton ug langitnong paglaom nagsugod sa pagpakig-uban sa mga dinihogan ug nag-alagad kang Jehova uban ang samang kadasig sa iya sa mga dinihogan. Ang maong mga bag-ohan nagmatikod sa gipatahom nga kahimtang sa katawhan sa Diyos, nga nag-ila nga si Jehova nag-uban kanila. (Zacarias 8:23) Sa katuigang 1930, ang mga dinihogan nakasabot sa tinuod nga ilhanan sa maong pundok, kansang gidaghanon nag-uswag sa ilang taliwala. Ilang nasabtan nga ang dakong buluhaton sa pagpanigom diha pa sa unahan. Ang dakong panon nagdali sa pagpakig-uban sa katawhang may pakigsaad sa Diyos, ug tungod sa maayong katarongan.

20. (a) Sa atong adlaw, nganong dinalian nga ‘mangita kang Jehova,’ ug giunsa kini paghimo? (b) Unsay sanong ni Jehova ngadto niadtong mangita kaniya?

 ²⁰ Sa adlaw ni Isaias, ang awhag gipagula: “Pangitaa ninyo si Jehova samtang siya makaplagan pa. Sangpita siya samtang siya anaa pa sa duol.” (Isaias 55:6) Sa atong adlaw, kining mga pulonga nahiangay, alang niadtong nahimong Israel sa Diyos ug alang sa nagauswag nga dakong panon. Dili kay walay kondisyon ang panalangin ni Jehova, ni ang iyang pagdapit lugwayan sa panahong walay tino. Karon na ang panahon sa pagpangita sa pag-uyon sa Diyos. Inig-abot sa tinudlong panahon alang sa paghukom ni Jehova, kana ulahi na unya kaayo. Busa, si Isaias nag-ingon: “Pabiyaa ang tawong daotan sa iyang dalan, ug ang tawong madaoton sa iyang mga hunahuna; ug pabalika siya kang Jehova, nga maluoy kaniya, ug ngadto sa atong Diyos, kay siya magpasaylo sa madagayaon gayod.”—Isaias 55:7.

21. Sa unsang paagi ang nasod sa Israel nahimong dili-matinumanon sa pahayag nga gihimo sa ilang mga katigulangan?

²¹ Ang pamulong nga “pabalika siya kang Jehova” nagpasabot nga kadtong kinahanglang maghinulsol may relasyon sa Diyos sa nangagi. Ang pamulong magpahinumdom kanato nga daghang bahin niining bahina sa tagna ni Isaias unang napadapat sa Hudiyong mga binihag sa Babilonya. Kasiglohan nga nangagi, ang mga katigulangan niining maong mga binihag nagpahayag sa ilang determinasyon nga magmasinugtanon kang Jehova sa dihang sila nagpahayag: “Halayo ra alang kanamo nga mobiya kang Jehova aron moalagad sa ubang mga diyos.” (Josue 24:16) Gipakita sa kasaysayan nga ang “halayo ra” nahitabo—nga balikbalik! Ang kawalay-pagtuo sa bahin sa katawhan sa Diyos mao ang hinungdan kon nganong sila mga destiyero sa Babilonya.

22. Nganong si Jehova nag-ingon nga ang iyang mga hunahuna ug mga dalan mas hataas kay sa iya sa mga tawo?

²² Unsay mahitabo kon sila maghinulsol? Pinaagi ni Isaias, si Jehova nagsaad nga siya “magpasaylo sa madagayaon gayod.” Ug siya nagdugang: “‘Kay ang inyong mga hunahuna dili akong mga hunahuna, ni ang akong mga dalan inyong mga dalan,’ mao ang giingon ni Jehova. ‘Kay ingon nga ang mga langit mas  taas kay sa yuta, mao man usab ang akong mga dalan mas taas kay sa inyong mga dalan, ug ang akong mga hunahuna kay sa inyong mga hunahuna.’” (Isaias 55:8, 9) Si Jehova hingpit, ug ang iyang mga hunahuna ug mga dalan hataas kaayo. Bisan ang iyang kaluoy anaa sa usa ka sukod nga kitang mga tawo dili gayod makalaom nga makakab-ot. Palandonga: Sa dihang magpasaylo kita sa isigkatawo, kini maoy usa ka hitabo nga ang usa ka makasasala nagapasaylo sa usa ka makasasala. Makaamgo kita nga sa madugay o madali magkinahanglan kita nga ang usa ka isigkatawo magpasaylo kanato. (Mateo 6:12) Apan si Jehova, bisan pag siya dili gayod kinahanglang pasayloon, magpasaylo “sa madagayaon gayod”! Sa pagkatinuod, siya maoy Diyos sa dakong mahigugmaong-kalulot. Ug tungod sa iyang kaluoy, buksan ni Jehova ang mga ganghaan sa mga langit, nga magpaulan ug mga panalangin niadtong mobalik kaniya uban sa bug-os nilang mga kasingkasing.—Malaquias 3:10.

Mga Panalangin Alang Niadtong Mobalik Kang Jehova

23. Giunsa pag-ilustrar ni Jehova ang pagkasegurado sa katumanan sa iyang pulong?

²³ Si Jehova nagsaad sa iyang katawhan: “Ingon nga ang ulan mobunok, ug ang niyebe, gikan sa mga langit ug dili mobalik sa maong dapit, gawas kon  ang yuta matumog gayod niini ug magpabunga niini ug magpasalingsing, ug ang binhi igahatag gayod ngadto sa magpupugas ug ang tinapay ngadto sa kumakaon, maingon niana ang akong pulong nga mogula gikan sa akong baba. Kini dili mobalik kanako nga walay sangpotanan, apan kini tinong magbuhat nianang akong gikahimut-an, ug kini tinong magpalampos sa butang nga tungod niana kini akong gipadala.” (Isaias 55:10, 11) Ang tanang butang nga isulti ni Jehova matuman gayod. Ingon nga ang ulan ug ang niyebe nga motulo gikan sa mga langit magatuman sa katuyoan niini nga ang yuta matumog ug mamunga, maingon usab ang pulong nga mogula gikan sa baba ni Jehova maoy bug-os nga kasaligan. Kon unsay iyang isaad, iyang pagatumanon—nga segurado gayod.—Numeros 23:19.

24, 25. Unsang mga panalangin ang gitagana alang sa Hudiyong mga destiyero nga molihok pinasukad sa mensahe ni Jehova pinaagi ni Isaias?

²⁴ Busa, kon patalinghogan sa mga Hudiyo ang mga pulong nga matagnaong gipahayag alang kanila pinaagi ni Isaias, sila walay pakyas nga makadawat sa kaluwasan nga gisaad kanila ni Jehova. Ingong resulta, sila mobatig dakong kalipay. Si Jehova nag-ingon: “Uban sa pagmaya kamo manggula, ug uban sa pakigdait kamo isulod. Ang kabukiran ug ang kabungtoran magmaya  sa inyong atubangan uban ang hugyaw sa kalipay, ug ang kakahoyan sa kapatagan mopakpak sa ilang mga kamot. Imbes nga kalibonan sa mga tunok, ang kahoyng junipero motubo. Imbes nga dapawong tanom, ang kahoyng mirto motubo. Ug kini mahimong butang nga bantog alang kang Jehova, usa ka ilhanan hangtod sa panahong walay tino nga dili pagaputlon.”—Isaias 55:12, 13.

²⁵ Sa 537 W.K.P., ang Hudiyong mga destiyero nanggula gayod sa Babilonya uban ang pagmaya. (Salmo 126:1, 2) Sa pag-abot nila sa Jerusalem, ilang nakita ang usa ka yuta nga punog kalibonan sa mga tunok ug mga dapawong tanom—hinumdomi, ang yuta nagpabiling kamingawan sulod sa daghang katuigan. Apan ang nahibalik nga katawhan sa Diyos karon makatabang sa pagpatunghag maanindot nga kausaban! Ang dagkong mga kahoy, sama sa junipero ug mirto, mopuli sa mga tunok ug mga dapawong tanom. Ang panalangin ni Jehova daling madayag samtang ang iyang katawhan magaalagad kaniya “uban ang hugyaw sa kalipay.” Nahisama kadtog ang yuta mismo nagmaya.

26. Unsang bulahang kahimtang ang gipahimuslan sa katawhan sa Diyos karon?

²⁶ Sa 1919 ang nahibilin sa dinihogang mga Kristohanon napagawas gikan sa ilang espirituwal nga pagkabihag. (Isaias 66:8) Duyog sa dakong panon sa ubang mga karnero, sila karon nagaalagad sa Diyos uban ang pagmaya diha sa espirituwal nga paraiso. Kay wala mahugawi sa Babilonyanhong impluwensiya, sila nagpahimulos ug inuyonang kahimtang, nga alang kang Jehova nahimong “butang nga bantog.” Ang ilang espirituwal nga kauswagan naghimaya sa iyang ngalan ug nagbayaw kaniya ingong ang Diyos sa matuod nga tagna. Ang nahimo ni Jehova alang kanila nagpasundayag sa iyang pagka-Diyos ug maoy ebidensiya sa iyang pagkakasaligan sa iyang pulong ug sa iyang kaluoy ngadto sa mga mahinulsolon. Hinaot ang tanan nga magpadayon sa ‘pagpalit ug bino ug gatas bisag walay salapi ug walay bayad’ magmaya sa pag-alagad kaniya sa walay kataposan!

[Mga footnote]

[Mga Pangutana sa Pagtuon]

[Hulagway sa panid 234]

Ang mga Hudiyo nga giuhaw sa espirituwal gidapit nga “umari kamo sa tubig” ug “palit ug bino ug gatas”

 [Hulagway sa panid 239]

Si Jesus nagpamatuod nga siya maoy “pangulo ug komandante” sa nasodnong mga pundok

[Mga hulagway sa panid 244, 245]

“Pabiyaa ang tawong daotan sa iyang dalan”