Leksiyon 16

Imong Desisyon sa Pag-alagad sa Diyos

Unsay kinahanglan nimong himoon aron mahimong usa ka higala sa Diyos? (1, 2)

Sa unsang paagi makapahinungod ka ngadto sa Diyos? (1)

Kanus-a ka angayng mabawtismohan? (2)

Sa unsang paagi makabaton kag kusog aron magpabiling matinumanon ngadto sa Diyos? (3)

1. Aron mahimong usa ka higala sa Diyos, kinahanglang ikaw makabaton ug dakong kahibalo sa kamatuoran sa Bibliya (1 Timoteo 2:​3, 4), magtuo sa mga butang nga imong nakat-onan (Hebreohanon 11:6), maghinulsol sa imong mga sala (Buhat 17:​30, 31), ug magbag-o sa imong pagkinabuhi. (Buhat 3:19) Unya ang imong gugma sa Diyos kinahanglang magpalihok kanimo sa pagpahinungod sa imong kaugalingon ngadto kaniya. Kini nagkahulogan nga diha sa personal, pribadong pag-ampo imo siyang sultihan nga imong gitugyan ang imong kaugalingon ngadto kaniya sa pagbuhat sa iyang kabubut-on.​—Mateo 16:24; 22:37.

2. Human ka makahimo sa imong pagpahinungod sa Diyos, ikaw angay nga mabawtismohan. (Mateo 28:​19, 20) Ang bawtismo nagpahibalo sa tanan nga imong gipahinungod ang imong kaugalingon ngadto kang Jehova. Busa ang bawtismo maoy alang lamang niadtong may igong edad nga makadesisyon sa pag-alagad sa Diyos. Sa dihang bawtismohan ang usa ka tawo, sa kadiyot ituslob ang tibuok niyang lawas sa tubig. a​—Marcos 1:​9, 10; Buhat 8:36.

3. Human sa imong paghimo sa pahinungod, dahomon ni Jehova nga magkinabuhi ka sumala sa imong panaad. (Salmo 50:14; Ecclesiastes 5:​4, 5) Mosulay ang Yawa sa pagpugong kanimo sa pag-alagad kang Jehova. (1 Pedro 5:8) Apan magpaduol sa Diyos pinaagi sa pag-ampo. (Filipos 4:​6, 7) Tun-i ang iyang Pulong matag adlaw. (Salmo 1:​1-3) Magpabiling suod sa kongregasyon. (Hebreohanon 13:17) Pinaagi sa pagbuhat niining tanan, makabaton kag kusog sa pagpabiling matinumanon ngadto sa Diyos. Sa ingon makabuhat ka sa mga butang nga gikinahanglan sa Diyos kanimo hangtod sa kahangtoran!

[Footnote]