Leksiyon 14

Kon Giunsa Pag-organisar ang mga Saksi ni Jehova

Kanus-a ba ang modernong-adlawng sinugdanan sa mga Saksi ni Jehova? (1)

Sa unsang paagi ang mga tigom sa mga Saksi ni Jehova gidumala? (2)

Sa unsang paagi ang mga galastohan giatiman? (3)

Kinsa ang nagapanguna diha sa matag kongregasyon? (4)

Unsang mas dagkong mga tigom ang ginahimo matag tuig? (5)

Unsang buluhaton ang gihimo diha sa ilang hedkuwarter ug mga sangang buhatan? (6)

1. Ang modernong-adlawng sinugdanan sa mga Saksi ni Jehova maoy sa katuigang 1870. Sa sinugdan, sila ginganlang mga Estudyante sa Bibliya. Apan niadtong 1931 gisagop nila ang Kasulatanhong ngalan nga mga Saksi ni Jehova. (Isaias 43:10) Gikan sa ginagmayng mga sinugdanan ang organisasyon miuswag ngadto sa minilyong mga Saksi, kinsa puliki nga nagasangyaw diha sa kapin sa 230 ka nasod.

2. Ang kadaghanang kongregasyon sa mga Saksi ni Jehova adunay mga tigom katulo sa kada semana. Gidapit ka nga motambong sa bisan hain niini. (Hebreohanon 10:​24, 25) Ang Bibliya maoy pasikaranan sa kon unsay ginatudlo. Buksan ug tak-opan sa pag-ampo ang mga tigom. Ang kinasingkasing nga “espirituwal nga mga awit” ginaawit usab panahon sa kadaghanang tigom. (Efeso 5:​18, 19) Ang pagsulod walay bayad, ug walay pagpangolekta.​—Mateo 10:8.

3. Kadaghanang kongregasyon naghimo sa mga tigom diha sa usa ka Kingdom Hall. Sagad nga kini sila yanong mga estruktura nga tinukod sa boluntaryong mga Saksi. Dili ka makakita ug mga imahen, mga krusipiho, o susamang mga butang diha sa Kingdom Hall. Ang mga galastohan pagabayran sa boluntaryong mga donasyon. Alang  sa mga gustong modonar, anaay kahon alang sa amot.​—2 Corinto 9:7.

4. Sa matag kongregasyon, adunay mga ansiano, o mga magtatan-aw. Sila maoy nanguna sa pagpanudlo sa kongregasyon. (1 Timoteo 3:​1-7; 5:17) Sila gitabangan sa ministeryal nga mga alagad. (1 Timoteo 3:​8-10, 12, 13) Ang maong mga tawo wala bayawa nga labaw sa uban sa kongregasyon. (2 Corinto 1:24) Wala sila hatagig espesyal nga mga titulo. (Mateo 23:​8-10) Dili lahi sa uban ang ilang sinina. Ni gisuweldohan sila alang sa ilang trabaho. Ang mga ansiano kinabubut-ong nag-atiman sa espirituwal nga mga panginahanglan sa kongregasyon. Sila makataganag paghupay ug giya sa mga panahon sa suliran.​—Santiago 5:​14-16; 1 Pedro 5:​2, 3.

5. Ang mga Saksi ni Jehova maghimo usab ug dagkong mga asembliya o mga kombensiyon kada tuig. Nianang mga panahona magtigom ang daghang kongregasyon alang sa espesyal nga programa sa instruksiyon sa Bibliya. Ang pagbawtismo sa bag-ong mga tinun-an maoy regular nga bahin sa matag programa sa asembliya o kombensiyon.​—Mateo 3:​13-17; 28:​19, 20.

6. Ang tibuok-kalibotang hedkuwarter sa mga Saksi ni Jehova anaa sa New York. Atua didto ang Nagamandong Lawas, usa ka sentral nga pundok sa eksperyensiyadong mga ansiano nga nagdumala sa tibuok-kalibotang kongregasyon. Aduna usab ing kapin sa 100 ka sangang buhatan sa tibuok nga kalibotan. Nianang mga dapita, ang mga boluntaryo nagatabang sa pag-imprinta ug pagpadalag literatura sa Bibliya. Ginahatag usab ang direksiyon sa pag-organisar sa buluhatong pagsangyaw. Nganong dili magplano nga mobisita sa sangang buhatan nga kinadul-an ninyo?