Leksiyon 1

Kon sa Unsang Paagi Masayran Nimo Kon Unsay Gikinahanglan sa Diyos

Unsang hinungdanong impormasyon ang anaa sa Bibliya? (1)

Kinsa ang awtor sa Bibliya? (2)

Nganong angay nimong tun-an ang Bibliya? (3)

1. Ang Bibliya maoy bililhong gasa gikan sa Diyos. Sama kinig usa ka sulat gikan sa usa ka mahigugmaong amahan ngadto sa iyang mga anak. Mosugilon kini kanato sa kamatuoran mahitungod sa Diyos​—kon kinsa siya ug kon unsay iyang mga sukdanan. Mosaysay kini kon sa unsang paagi atubangon ang mga suliran ug kon sa unsang paagi makaplagan ang tinuod nga kalipay. Bibliya lamang ang mosugilon kanato kon unsa ang kinahanglan natong buhaton aron makapahimuot sa Diyos.​—Salmo 1:​1-3; Isaias 48:​17, 18.

2. Gisulat ang Bibliya sa mga 40 ka lainlaing tawo latas sa yugto nga 1,600 ka tuig, sugod sa 1513 W.K.P. Kini nalangkoban sa 66 ka gagmay nga mga basahon. Gidasig sa Diyos ang mga nagsulat sa Bibliya. Ilang gisulat ang iyang mga panghunahuna, dili ang ilang kaugalingon. Busa ang Diyos sa langit, dili si bisan kinsa nga tawo sa yuta, ang Awtor sa Bibliya.​—2 Timoteo 3:​16, 17; 2 Pedro 1:​20, 21.

3. Gitino sa Diyos nga makopya sa husto ug matipigan ang Bibliya. Mas daghang Bibliya ang naimprinta kay sa bisan unsang libro. Dili ang tanan malipay sa pagkakita nga nagtuon kag Bibliya, apan ayawg itugot nga kana makapugong kanimo. Ang imong walay-kataposan nga kaugmaon nag-agad sa imong pagkaila sa Diyos ug pagbuhat sa iyang kabubut-on bisan pa sa bisan unsang pagsupak.​—Mateo 5:​10-12; Juan 17:3.