ANG tanan maayong mga butang atong nabatonan nagagikan sa Diyos. Gibuhat niya ang adlaw aron sa paghatag kanatog kahayag kon maadlaw, ug ang bulan ug mga bituon sa paghatag kanatog kahayag sa gabii. Ug ang Diyos mibuhat sa yuta aron atong pagapuy-an.

Apan kini dili maoy unang mga butang nga gihimo sa Diyos. Nahibalo ba ikaw kon unsa ang una? Ang Diyos mibuhat pag-una sa mga manulunda. Dili kita makakita sa mga manulunda, maingon nga kita dili makakita sa Diyos. Ang Diyos mihimo sa mga manulunda nga magpuyo uban kaniya sa langit.

Ang unang manulunda nga nahimo sa Diyos maoy talagsaon. Nagbuhat siya uban sa Diyos ug nagtabang kaniya sa paghimo sa tanan ubang mga butang, lakip ang atong yuta.

Nan sama sa unsa man ang yuta? Sa sinugdan walay bisan usang makapuyo sa ibabaw sa yuta. Ang tanan natabonan sa daghan kaayong tubig. Busa ang Diyos misugod sa pag-andam sa yuta alang kanato. Unsay iyang gibuhat?

Buweno, una gipahinabo sa Diyos ang kahayag gikan sa adlaw sa pagdan-ag sa ibabaw sa yuta. Unya mahimong adunay kagabhion ug adlaw. Pagkatapos ang Diyos mipahinabo nga ang yuta motungha sa ibabaw sa tubig sa dagat.

Sa sinugdan walay sulod ang ibabaw sa yuta. Kadto nahisama sa hulagway nga imong makita dinhi. Walay mga bulak, mga kahoy o mga mananap. Walay bisan unsang isda sa dagat. Ang Diyos may daghan pang pagahimoon.