SA PAGBALIK ni Moises sa Ehipto, iyang gisuginlan ang iyang igsoong lalaki si Aaron bahin sa mga milagro. Sa gipakita ni Moises ug Aaron kining mga milagro sa mga Israelita, ang tanang katawhan mituo nga si Jehova uban kanila.

Unya si Moises ug si Aaron miadto sa pakigkita kang Paraon. Ilang gisultihan siya nga si Jehova buot ang mga Israelita mobiya sa Ehipto sa tulo ka adlaw ug magsimba kang Jehova sa kamingawan. Apan si Paraon miingon: ‘Dili ako motuo kang Jehova. Ug dili ako motugot nga molakaw ang Israel.’

Gipugos ni Paraon ang mga Israelita sa pagtrabaho gayod tungod kay gusto nilang hatagan ug panahon sa pag-alagad kang Jehova. Gibasol sa mga Israelita si Moises niini ug si Moises nasubo. Apan si Jehova misulti kaniya: ‘Pasugton ko si Paraon nga tugtan ang akong katawhan sa paglakaw.’

Si Moises ug Aaron nakigkita pag-usab kang Paraon. Ning higayona naghimo sila sa usa ka milagro. Si Aaron miitsa sa iyang sungkod, ug kini nahimong usa ka dakong bitin. Apan ang maalam mga tawo ni Paraon miitsa usab sa mga sungkod, ug mga bitin mitungha. Apan tan-awa! Ang bitin ni Aaron milamoy sa ubang mga bitin. Sa gihapon wala palakta ni Paraon ang mga Israelita.

Busa gikinahanglan ni Jehova nga leksiyonon si Paraon. Nahibalo ka ba unsay iyang gihimo? Iyang gipahamtang ang 10 ka hampak, o dagkong kadaot, ibabaw sa Ehipto.

Tapos sa daghang hampak, si Paraon miingon: ‘Hunonga ang hampak ug tugotan kong molakaw ang Israel.’ Apan sa mihunong ang hampak, giusab niya ang iyang hunahuna. Hinuon, sa kataposan, human sa ika-10 nga hampak, si Paraon mipalakaw sa mga Israelita.

Nahibalo ka ba sa matag usa sa 10 ka hampak? Paklia ang panid ug magtuon kita bahin kanila.