Nahibalo ka ba ngano kining tawhana naggisigisi sa iyang sapot? Si Jehova nagsugo kaniya sa pagbuhat niini. Kining tawhana mao ang manalagna sa Diyos si Ahias. Nahibalo ka ba kon unsa ang usa ka manalagna? Siya mao ang usa ka tawo nga tug-anan sa Diyos sa abante sa hitabo una pa sa panahon sa pag-abot.

Si Ahias dinhi nakigsulti kang Jeroboam. Si Jeroboam mao ang tawo nga gipiyalan ni Solomon sa pagdumala sa pipila ka pagpanukod nga buluhaton. Sa dihang si Ahias nakatagbo kang Jeroboam, iyang gihubo ang iyang bag-ong sapot ug naggisi niini ngadto sa 12 ka peraso. Matod niya kang Jeroboam: ‘Kuhaa kining 10 ka buok alang sa imong kaugalingon.’ Nahibalo ka kon ngano?

Si Ahias nagsaysay nga si Jehova magkuha sa gingharian gikan kang Solomon. Si Jehova maghatag sa 10 ka tribo ngadto kang Jeroboam, ug magbilin lamang sa duha ka tribo alang sa anak lalaki ni Solomon nga si Rehoboam.

Si Solomon nasuko kaayo sa dihang nakabati siya niini. Misulay siya sa pagpatay kang Jeroboam. Apan si Jeroboam mikalagiw ngadto sa Ehipto. Sa wala madugay si Solomon namatay, ug ang iyang anak lalaki si Rehoboam maoy gihimong hari. Sa pagkabati ni Jeroboam nga si Solomon namatay na, mibalik siya sa Israel.

Si Rehoboam dili usa ka maayong hari. Mabangis siya ngadto sa katawhan. Si Jeroboam ug ang pipila pa ka tawo miadto sa hari ug mihangyo kaniya sa pagmaluluy-on, apan siya nahimong labing mabangis pa. Busa ang katawhan naghimo kang Jeroboam nga hari ibabaw sa 10 ka tribo, apan ang duha ka tribo ni Benjamin ug Juda mipabilin kang Rehoboam ingon nga ilang hari.

Si Jeroboam dili gusto nga ang iyang katawhan magsimba sa templo sa Jerusalem, busa siya naghimog duha ka bulawang nating baka ug gidala ang katawhan sa pagsimba kanila. Busa ang yuta napuno sa pagkadaotan.

Usab, adunay kasamok sa duha-tribong gingharian. Wala madugay sa pagkahimong hari ni Rehoboam, ang hari sa Ehipto misulong sa pakiggubat batok sa Jerusalem. Iyang naagaw ang daghang mga bahandi sa templo ni Jehova.