MOBALIK kita pipila ka tuig una pa si Esdras miadto sa Jerusalem. Si Mardocheo ug si Ester mao ang labing hinugdanong mga Israelita sa gingharian sa Persia. Si Ester mao ang rayna, ug ang iyang ig-agaw si Mardocheo mao ang ikaduha lamang sa hari. Sa unsang paagi kini nahitabo?

Ang mga ginikanan ni Ester namatay sa gamay pa siya, busa si Mardocheo ang nagpadako kaniya. Si Assuero, ang hari sa Persia, may usa ka palasyo sa siyudad sa Susan, ug si Mardocheo mao ang usa sa iyang mga alagad. Usa ka adlaw ang asawa sa hari si Vasthi wala mosugot kaniya, busa nahibalo ka ba kon kinsa ang gipili sa hari nga mahimong iyang bag-ong asawa? Oo, ang matahom batan-ong Ester.

Kining mapahitas-ong tawo sa hulagway mao si Aman. Siya inila kaayong tawo, ug ang tanan moyukbo kaniya. Apan, tan-awa! Si Mardocheo wala moyukbo kaniya. Iyang nahunahuna nga maoy sayop ang pagyukbo sa maong daotang tawo. Kini nakapasuko kaayo kang Aman.

Si Aman misugilon sa hari ug mga bakak mahitungod sa mga Israelita ug misugyot nga kinahanglan silang pahamtangan sa kamatayon. Si Assuero wala mahibalo nga si Ester usa ka Israelita. Busa siya mihimog usa ka balaod nga sa usa ka tinong adlaw ang tanang mga Israelita pagapatyon.

Sa pagkabati ni Mardocheo bahin sa balaod, naguol kaayo siya. Mipadala siyag usa ka mensahe ngadto kang Ester: ‘Magpakiluoy ka sa hari sa pagluwas kanato.’ Si Ester nagdapit sa hari ug kang Aman sa usa ka dakong kombira. Dinhi ang hari nangutana kang Ester kon unsang pabor ang gitinguha niini gikan kaniya. Si Ester mipahayag nga motug-an siya kaniya kon siya ug si Aman moanha sa laing pangaon sa sunod adlaw.

Sa kan-anan, si Ester mitug-an sa hari: ‘Ang akong katawhan ug ako pagapatyon.’ Ang hari nasuko. ‘Kinsa ang nagtinguha sa pagbuhat niana?’ nangutana siya.

‘Kining daotang Aman!’ tug-an ni Ester.

Ang nasukong hari mimando nga patyon si Aman. Tapos niini, ang hari naghimo kang Mardocheo nga ikaduha sa gahom gawas sa iyang kaugalingon. Ang usa ka bag-ong balaod gihimo sa pagtugot sa mga Israelita nga makiggubat alang sa ilang kinabuhi sa adlaw nga gitakda nga sila unta patyon. Tungod kay si Mardocheo nahimong usa ka inilang tawo karon, daghang katawhan mitabang sa mga Israelita, ug sila naluwas gikan sa ilang mga kaaway.