1, 2. Sa unsang paagi gisulayan pagdaot ni Balaam ang katawhan ni Jehova?

ANG usa ka mangingisda miadto sa dapit diin didto makuha ang klase sa isda nga gusto niyang mabingwit. Namili siyag paon ug giitsa sa tubig ang pasol. Naghulat siya, ug dihang mikubit ang isda, iya kining gibitad.

² Sa susama, puwede pong makubit ang mga tawo. Pananglitan, ang mga Israelinhon hapit nang makaabot sa Yutang Saad dihang nagkampo sila sa Kapatagan sa Moab. Ang hari sa Moab misaad nga hatagan si Balaam ug daghang kuwarta kon tunglohon niya ang Israel. Sa ulahi, nakakitag paagi si Balaam aron mahimong tinunglo ang mga Israelinhon. Gipili niyag maayo ang paon. Iyang gipaadtoan ug batan-on nga mga babayeng Moabihanon ang mga Israelinhon aron tentalon ang mga lalaki.​—Numeros 22:1-7; 31:15, 16; Pinadayag 2:14.

3. Sa unsang paagi mikubit ang mga Israelinhon sa paon ni Balaam?

³ Misaler ba ang paon ni Balaam? Oo. Linibo ka Israelinhong mga lalaki ang nakahimog “seksuwal nga  imoralidad uban sa mga babaye sa Moab.” Misimba pod sila sa bakak nga mga diyos, apil sa makaluod nga diyos sa sekso, ang Baal sa Peor. Ingong resulta, 24,000 ka Israelinhon ang namatay diha mismo sa utlanan sa Yutang Saad.​—Numeros 25:1-9.

4. Nganong nakahimog imoralidad ang linibo ka Israelinhon?

⁴ Nganong daghan kaayong Israelinhon ang nabitik sa plano ni Balaam? Kaugalingong kalipay lang ang ilang gihunahuna, ug nakalimot sila sa tanang gihimo ni Jehova para nila. Daghan unta silag rason nga magmaunongon sa Diyos. Iyang gipahigawas sila gikan sa pagkaulipon sa Ehipto, gipakaon didto sa kamingawan, ug gipanalipdan sila hangtod sa utlanan sa Yutang Saad. (Hebreohanon 3:12) Bisan pa niana, natental sila sa seksuwal nga imoralidad. Si apostol Pablo misulat: “[Dili ta] maghimog seksuwal nga imoralidad, sama sa gihimo sa pipila kanila, mao nga [sila] nangapukan.”​—1 Corinto 10:8.

5, 6. Unsay atong makat-onan sa nahitabo didto sa Kapatagan sa Moab?

⁵ Duol na kaayo ang bag-ong kalibotan. Busa sama ta sa mga Israelinhon nga naa na sa utlanan sa Yutang Saad. (1 Corinto 10:11) Ang kalibotan karon mas nabuang sa sekso kay sa mga Moabihanon. Kini dali rang makaapektar sa katawhan ni Jehova. Gani, ang labing epektibong paon nga gigamit sa Yawa mao ang seksuwal nga imoralidad.​—Numeros 25:6, 14; 2 Corinto 2:11; Judas 4.

⁶ Hunahunaa kini, ‘Mas pilion ba nako ang kaugalingong kalipay nga dali ra kaayong mohupas, o mas gusto nakong mabuhi nga malipayon sa walay kataposan diha sa bag-ong kalibotan?’ Takos gyod sa atong  paningkamot ang pagsunod sa sugo sa Diyos: “Kalagiw gikan sa seksuwal nga imoralidad”!​—1 Corinto 6:18.

7, 8. Unsa ang seksuwal nga imoralidad? Nganong seryoso kini?

⁷ Daghang tawo karon ang walay kaulaw ug dili mahadlok nga mosupak sa mga balaod sa Diyos bahin sa sekso. Sa Bibliya, ang seksuwal nga imoralidad nagtumong sa seksuwal nga buhat tali sa mga tawong dili minyo o kansang kaminyoon dili subay sa Kasulatan. Apil niini ang seksuwal nga buhat tali sa parehong lalaki o parehong babaye ug tali sa tawo ug hayop. Ang seksuwal nga buhat naglakip sa seksuwal nga relasyon, pagpakigsekso pinaagi sa baba o kaha sa lubot, o paghikap sa kinatawo sa uban sa seksuwal nga paagi.​—Tan-awa ang Endnote 23.

⁸ Ang Bibliya klarong nag-ingon nga kadtong padayong naghimog seksuwal nga imoralidad dili makapabiling membro sa kongregasyon. (1 Corinto 6:9; Pinadayag 22:15) Dugang pa, ang imoral nga tawo mawad-ag pagtahod sa kaugalingon ug ang uban dili na mosalig niya. Ang imoralidad kanunayng magdalag problema. Sagad moresulta ni nga ang usa hasolon sa konsensiya, makapamabdos, o mapaangkan. Moresulta sab nig problema sa kaminyoon, sakit, o kamatayon. (Basaha ang Galacia 6:7, 8.) Kon hunahunaon pag-ayo sa usa ka tawo ang mahimong resulta sa imoralidad, lagmit dili gyod niya kini himoon. Pero sagad naghunahuna lang siya sa pagtagbaw sa kaugalingong tinguha dihang himoon niya ang unang tikang nga moresultag imoralidad. Kini nga tikang sagad naglakip sa pornograpiya.

9. Nganong peligroso ang pornograpiya?

⁹ Ang katuyoan sa pornograpiya mao ang pagpukaw sa seksuwal nga mga tinguha. Karon, kaylap kaayo ang pornograpiya​—sa magasin, libro, musika, salida sa TV, ug sa Internet. Para sa daghan dili ra ni makadaot, pero ang tinuod peligroso kaayo ni. Tungod niini, maadik ang tawo sa sekso ug makaugmad ug sayop nga mga tinguha. Dihang maadik na siya sa pornograpiya, mahimong moresulta ni sa masturbasyon, mga problema sa kaminyoon, ug diborsiyo.​—Roma 1:24-27; Efeso 4:19; tan-awa ang Endnote 24.

10. Sa unsang paagi ang prinsipyo sa Santiago 1:14, 15 makatabang nga malikayan ang imoralidad?

¹⁰ Importanteng masabtan nato kon sa unsang paagi mahaylo ta sa seksuwal nga imoralidad. Matikdi ang pasidaan sa Santiago 1:14, 15: “Ang matag usa masulayan dihang siya ginadani ug ginahaylo sa iyang kaugalingong tinguha. Unya ang tinguha, dihang kini manamkon na, manganak ug sala; unya ang sala, dihang kini mabuhat na, manganak ug kamatayon.” Busa dihang makahunahuna kag daotan, wad-a dayon kini. Kon wala tuyoang makakita kag hilas nga mga hulagway, lingiw dayon! Patya ang computer, o ibalhin ang channel. Likayi ang sayop nga mga tinguha. Kay kon dili, ang imong sayop nga mga tinguha mograbe ug lisod na kontrolahon.​—Basaha ang Mateo 5:29, 30.

11. Unsaon ta pagtabang ni Jehova dihang naa tay sayop nga mga hunahuna?

¹¹ Mas nakaila si Jehova kanato. Nahibalo siya nga dili ta hingpit. Pero nahibalo sab siya nga madaog  nato ang sayop nga mga tinguha. Siya miingon: “Patya ang mga parte sa inyong lawas maylabot sa seksuwal nga imoralidad, kahugawan, pagpatuyang sa gana sa sekso, makadaot nga tinguha, ug kahakog, nga maoy idolatriya.” (Colosas 3:5) Dili ni sayon himoon, pero si Jehova mapailobon nato ug tabangan ta niya. (Salmo 68:19) Usa ka batan-ong brader ang naadik sa pornograpiya ug masturbasyon. Para sa iyang mga higala sa eskuwelahan, normal lang ni samtang nagdako, pero siya miingon: “Nakadaot ni sa akong konsensiya, ug nahimo kong imoral.” Iyang naamgohan nga kinahanglan niyang kontrolahon ang iyang mga tinguha, ug sa tabang ni Jehova, naundang niya ang maong bisyo. Kon duna kay imoral nga mga hunahuna, hangyo kang Jehova alang sa “gahom nga labaw sa kasarangan” aron magpabiling hinlo ang imong hunahuna.​—2 Corinto 4:7; 1 Corinto 9:27.

12. Nganong kinahanglan natong ‘bantayan ang atong kasingkasing’?

 ¹² Si Solomon misulat: “Labaw sa tanan nga imong bantayan, bantayi ang imong kasingkasing, kay nagdepende niini ang imong kinabuhi.” (Proverbio 4:23) Ang atong “kasingkasing” mao ang sulod natong pagkatawo, nga maoy ginatan-aw ni Jehova. Dakog impluwensiya ang atong ginatan-aw. Ang matinumanong si Job miingon: “Nakigsaad ko sa akong mga mata. Busa nganong hatagan man nakog atensiyon ang laing babaye uban ang sayop nga motibo?” (Job 31:1) Sama kang Job, kinahanglan natong kontrolahon ang atong ginatan-aw ug ginahunahuna. Ug sama sa salmista, moampo ta: “Ilikay ang akong mga mata sa pagtan-aw sa butang nga walay pulos.”​—Salmo 119:37.

13. Unsang matanga sa mga higala ang gipili ni Dina?

¹³ Dakog impluwensiya nato ang atong mga higala, sa maayo man o sa daotang paagi. Kon makighigala ka niadtong nagsunod sa sukdanan sa Diyos, maimpluwensiyahan ka nila. (Proverbio 13:20; basaha ang 1 Corinto 15:33.) Makita nato sa nahitabo kang Dina kon unsa ka importante nga pilion nato ang atong mga higala. Usa siya sa mga anak ni Jacob, busa nagdako siya sa pamilya nga nagsimba kang Jehova. Dili siya imoral, pero nakigsuod siya sa Canaanhong mga babaye nga wala magsimba kang Jehova. Ang mga Canaanhon nailhang imoral ug ang ilang panghunahuna bahin sa sekso lahi kaayo kay sa katawhan sa Diyos. (Levitico 18:6-25) Samtang kauban ni Dina ang iyang mga amiga, iyang nakaila si Sekem, usa ka batan-ong lalaki nga Canaanhon nga naibog niya. Si Sekem  giisip ingong “labing tinahod” nga batan-on sa ilang panimalay. Pero wala siya mahigugma kang Jehova.​—Genesis 34:18, 19.

14. Unsay nahitabo kang Dina?

¹⁴ Gihimo ni Sekem ang butang nga para niya dili sayop. Kay naibog siya kang Dina, “iyang gidala siya ug gilugos.” (Basaha ang Genesis 34:1-4.) Tungod ani nga panghitabo, nagsunodsunod ang mga problema nga miresultag trahedya kang Dina ug sa iyang tibuok pamilya.​—Genesis 34:7, 25-31; Galacia 6:7, 8.

15, 16. Sa unsang paagi ka mahimong maalamon?

¹⁵ Dili kinahanglang makahimo tag sayop nga susama sa kang Dina ayha nato maamgohan nga ang mga sukdanan ni Jehova sa moralidad makaayo nato. “Ang naglakaw uban sa mga maalamon mahimong maalamon, apan ang makig-uban sa mga buangbuang masugamak sa kadaot.” (Proverbio 13:20) Himoang tumong nga masabtan nimo “ang katibuk-ang dalan sa kon unsay maayo,” ug malikayan nimo ang kasakit ug pag-antos.​—Proverbio 2:6-9; Salmo 1:1-3.

¹⁶ Mahimo tang maalamon kon magtuon ta sa Pulong sa Diyos, mag-ampo kaniya sa dili pa mohimog desisyon, ug mosunod sa maayong tambag sa matinumanon ug maalamong ulipon. (Mateo 24:45; Santiago 1:5) Siyempre, nahibalo ka nga kitang tanan huyang ug dili hingpit. (Jeremias 17:9) Pero unsay imong himoon kon naay mopasidaan nimo nga gamay na lag ligas makahimo na kag imoralidad? Malain ba ka, o mapainubsanon nimong dawaton ang tabang?​—2 Hari 22:18, 19.

17. Paghatag ug pananglitan kon sa unsang paagi makatabang nato ang tambag sa isigka-Kristohanon.

¹⁷ Pananglitan, sa trabahoan sa usa ka sister, naay lalaki  nga maayo kaayog tinagdan ug gustong makigdeyt niya. Dili siya alagad ni Jehova, pero buotan. Dunay laing sister nga nakakita nila nga nagdeyt ug unya nagpasidaan niya. Unsay himoon sa sister nga nakigdeyt? Mangatarongan ba siya, o maminaw sa pasidaan? Lagmit gihigugma niya si Jehova ug gusto niyang himoon kon unsay husto. Pero kon padayon siyang makigdeyt sa maong tawo, ‘mikalagiw ba siya sa seksuwal nga imoralidad’ o ‘nagasalig siya sa iyang kasingkasing’?​—Proverbio 22:3; 28:26; Mateo 6:13; 26:41.

18, 19. Sa unsang paagi mikalagiw si Jose gikan sa imoralidad?

¹⁸ Batan-on pa si Jose dihang nahimo siyang ulipon didto sa Ehipto. Ang asawa sa iyang agalon kada adlaw nga manghagad niya nga makigsekso, pero nahibalo si Jose nga sayop kadto. Gihigugma ni Jose si  Jehova ug gusto niyang mapalipay Siya. Busa sa matag higayon nga tentalon siya, mobalibad siya. Kay ulipon man siya, dili niya basta mabiyaan ang iyang agalon. Usa ka adlaw dihang gipugos siya sa asawa sa iyang agalon sa pagpakigsekso, ‘midagan siya sa gawas.’​—Basaha ang Genesis 39:7-12.

¹⁹ Tingali dili ingon ato ang himoon ni Jose kon naghunahuna siyag imoral o nagpantasya bahin sa babaye. Para niya, mas importante ang iyang relasyon kang Jehova. Iyang giingnan ang babaye: “Ang akong agalon walay . . . gidili kanako gawas kanimo, kay asawa ka niya. Dili ko makaako sa pagbuhat niining dakong pagkadaotan ug magpakasala sa Diyos!”​—Genesis 39:8, 9.

20. Nganong nahibalo ta nga nalipay si Jehova kang Jose?

²⁰ Bisag layo si Jose sa iyang pamilya, nagmaunongon siya kanunay sa Diyos, ug gipanalanginan siya ni Jehova. (Genesis 41:39-49) Nalipay si Jehova sa pagkamaunongon ni Jose. (Proverbio 27:11) Lisod suklan ang imoralidad. Pero hinumdomi kini: “Oh kamong nahigugma kang Jehova, dumti ninyo ang daotan. Iyang ginapanalipdan ang kinabuhi sa mga maunongon kaniya; iyang ginaluwas sila gikan sa kamot sa daotan.”​—Salmo 97:10.

21. Giunsa pagsundog sa usa ka brader si Jose?

²¹ Kada adlaw, maisogong gipakita sa katawhan ni Jehova nga ilang ‘gidumtan ang daotan ug gihigugma ang maayo.’ (Amos 5:15) Bisag pila may imong edad, makapabilin kang matinumanon kang Jehova. Nasulayan ang pagtuo sa usa ka batan-ong brader diha sa eskuwelahan. Dihay babaye nga miingon niya: ‘Kon tabangan ko nimo sa eksam sa math, makigsekso  ko nimo.’ Unsay gihimo sa brader? Gisundog niya si Jose. Siya miingon: “Gibalibaran dayon nako siya. Kay nagpabilin kong matinumanon, wala madaot ang akong dignidad ug pagtahod sa kaugalingon.” Ang bisan unsang “temporaryong kalipay” tungod sa imoralidad sagad moresultag kasakit ug kaguol. (Hebreohanon 11:25) Ang pagsunod kang Jehova kanunayng moresultag dumalayong kalipay.​—Proverbio 10:22.

22, 23. Unsaon ta pagtabang ni Jehova kon makahimo tag seryosong sala?

²² Gamiton ni Satanas ang seksuwal nga imoralidad aron makubit ta, ug dili sayon ang pagsukol niini. Tingali kitang tanan dunay sayop nga mga hunahuna usahay. (Roma 7:21-25) Makasabot niini si Jehova ug ginahinumdoman niya nga “kita abog.” (Salmo 103:14) Pero komosta kon ang usa ka Kristohanon makahimog imoralidad, nga usa ka seryosong sala? Wala na ba siyay paglaom? Naa. Kon kinasingkasing siyang maghinulsol, tabangan siya ni Jehova. Ang Diyos “andam sa pagpasaylo.”​—Salmo 86:5; Santiago 5:16; basaha ang Proverbio 28:13.

²³ Gihatagan sab ta ni Jehova ug “gasa nga mga lalaki”​—mahigugmaong mga ansiyano nga nag-atiman kanato. (Efeso 4:8, 12; Santiago 5:14, 15) Iya silang gitagana aron tabangan ta nga mapasig-uli ang atong relasyon kaniya.​—Proverbio 15:32.

24, 25. Sa unsang paagi ang “pagsabot” makatabang nato nga malikayan ang imoralidad?

²⁴ Aron kita makahimo ug maayong mga desisyon,  kinahanglang mahibaloan nato ang kaayohan sa mga balaod ni Jehova. Dili ta gustong mahisama sa batan-ong lalaki diha sa Proverbio 7:6-23. Kulang siyag “pagsabot,” maong mikubit siya sa paon nga seksuwal nga imoralidad. Ang pagsabot dili lang kay daghan kag nahibaloan. Kon duna ta niini, maningkamot tang masabtan ang panghunahuna sa Diyos ug ipadapat kini. Hinumdomi kini: “Kadtong nakabaton ug maalamong kasingkasing [“pagsabot,” footnote] nahigugma sa iyang kaugalingon. Kadtong nagpabili sa katakos sa pag-ila molampos.”​—Proverbio 19:8.

²⁵ Kombinsido ba gyod ka nga matarong ang sukdanan sa Diyos? Nagtuo ba gyod ka nga makapalipay ang pagsunod niini? (Salmo 19:7-10; Isaias 48:17, 18) Kon dili pa ka segurado, hinumdomi ang tanang maayong butang nga gihimo ni Jehova kanimo. “Tilawi ug tan-awa nga si Jehova maayo.” (Salmo 34:8) Imong makita nga samtang maningkamot ka sa paghimo niana, molalom ang imong gugma sa Diyos. Higugmaa ang iyang gihigugma, ug dumti ang iyang gidumtan. Pun-a ang imong hunahuna sa maayong mga butang​—mga butang nga tinuod, matarong, putli, hiligugmaon, ug maayo. (Filipos 4:8, 9) Mahisama kita kang Jose, kinsa nakabenepisyo sa kaalam ni Jehova.​—Isaias 64:8.

26. Unsay sunod natong hisgotan?

²⁶ Minyo man ka o dili, gusto ni Jehova nga magmalipayon ka. Ang sunod nga duha ka kapitulo dunay impormasyon nga makatabang aron magmalamposon ang kaminyoon.