1, 2. (a) Kang kinsang giya ang angay natong sundon? (b) Unsang mga pangutana ang hisgotan nato niining kapituloha?

TINGALI sa bata pa ka, naay mga sugo ang imong ginikanan nga supak sa imong buot. Gihigugma nimo sila ug nahibalo ka nga angay nimo silang sundon. Pero tingali dili sa tanang panahon nga gusto nimo silang sundon.

² Nahibalo ta nga gihigugma ta sa atong Amahan nga si Jehova. Gipangga ta niya ug gihatagan sa tanan natong gikinahanglan aron magmalipayon. Gigiyahan ta niya aron magmalamposon. Usahay, gamiton niya ang uban sa paggiya nato. Kinahanglan natong tahoron ang awtoridad ni Jehova. (Proverbio 24:21) Pero nganong lisod usahay ang pagdawat ug giya? Nganong gusto ni Jehova nga mosunod ta sa iyang giya? Ug unsaon nato pagpakita nga gitahod nato ang iyang awtoridad?​—Tan-awa ang Endnote 9.

3, 4. Nganong nahimong dili hingpit ang mga tawo? Nganong maglisod ta sa pagdawat ug giya gikan sa uban?

³ Ingong tawo, duna tay tendensiya nga morebelde.  Tinuod kana sukad nakasala ang unang lalaki ug babaye, si Adan ug Eva. Bisag gilalang sila nga hingpit, mirebelde sila sa awtoridad sa Diyos. Sukad adto, ang tanang tawo gipanganak nga dili hingpit. Kay dili ta hingpit, maglisod ta sa pagdawat ug giya gikan kang Jehova ug sa uban. Gawas pa, ang mga tawong gigamit ni Jehova sa paggiya nato dili sab hingpit.​—Genesis 2:15-17; 3:1-7; Salmo 51:5; Roma 5:12.

⁴ Kay dili hingpit, may tendensiya ta nga mahimong garboso. Tungod sa garbo, maglisod ta sa pagdawat ug giya. Pananglitan, sa karaang Israel, gipili ni Jehova si Moises nga manguna sa iyang katawhan. Si Kore, nga dugay nang alagad ni Jehova, nahimong garboso ug wala gyod motahod kang Moises. Bisag si Moises ang nanguna sa katawhan sa Diyos, dili siya garboso. Gani, gitawag siya nga labing mapainubsanong tawo niadtong panahona. Pero dili gustong sundon ni Kore ang giya ni Moises. Daghan pa gani siyag giaghat nga moduyog niya sa pagrebelde kang Moises. Unsay nahitabo kang Kore ug sa mga rebelde? Gipamatay sila. (Numeros 12:3; 16:1-3, 31-35) Sa Bibliya, daghang pananglitan ang nagpakita nga peligroso ang garbo.​—2 Cronicas 26:16-21; tan-awa ang Endnote 10.

5. Giunsa pag-abusar sa uban ang ilang awtoridad?

⁵ Sukad sa una, daghan ang nag-abusar sa ilang awtoridad. (Basaha ang Ecclesiastes 8:9.) Pananglitan, si Saul buotan ug mapainubsanon dihang gipili siya ni Jehova nga mahimong hari sa Israel. Pero gitugotan niya ang garbo ug kasina nga motubo sa iyang kasingkasing, ug tungod niana iyang gilutos ang inosenteng si David. (1 Samuel 9:20, 21; 10:20-22; 18:7-11)  Sa ulahi si David nahimong hari, ug usa siya sa kinamaayohang mga hari sa Israel. Pero dihay panahon nga giabusohan ni David ang iyang awtoridad. Nakigsekso siya kang Bat-seba nga asawa ni Urias ug gitago ang iyang sala pinaagi sa pagpadala kang Urias ngadto sa gubat aron mamatay.​—2 Samuel 11:1-17.

6, 7. (a) Tungod sa atong gugma kang Jehova, unsay atong himoon? (b) Unsay makatabang nato nga magmasinundanon bisan pag dili kini sayon?

⁶ Atong sundon ang giya ni Jehova kay gihigugma nato siya labaw sa tanan, ug gusto natong malipay siya. (Basaha ang Proverbio 27:11; Marcos 12:29, 30.) Sukad sa pagpuyo sa unang magtiayon sa tanaman sa Eden, gusto na ni Satanas nga kuwestiyonon sa mga tawo ang awtoridad ni Jehova. Gusto niyang maghunahuna ta nga walay katungod si Jehova nga mosulti nato kon unsay himoon. Pero nahibalo ta nga bakak na. Mouyon ta sa giingon sa Pinadayag 4:11: “Takos ka, Jehova nga among Diyos, nga modawat sa himaya ug sa dungog ug sa gahom, kay gilalang nimo ang tanang butang.”

⁷ Tingali sa bata pa ka, gitudloan ka nga mosunod sa imong ginikanan bisan pag supak sa imong buot. Sa susama, ingong mga alagad ni Jehova, tingali naay mga panahon nga maglisod ta sa pagsunod. Pero gihigugma ug gitahod nato si Jehova, maong buhaton nato ang tanan aron sundon siya. Maayong panig-ingnan si Jesus. Iyang gisunod si Jehova bisag dili sayon. Busa nakaingon siya sa iyang Amahan: “Dili ang  akong kabubut-on ang matuman, kondili ang imoha.”​—Lucas 22:42; tan-awa ang Endnote 11.

8. Unsa ang pipila ka paagi nga gigiyahan ta ni Jehova? (Tan-awa ang kahon nga “Pamati sa Tambag.”)

⁸ Karon, gigiyahan ta ni Jehova sa lainlaing paagi. Pananglitan, gihatag niya kanato ang Bibliya ug ang mga ansiyano sa kongregasyon. Atong gitahod ang awtoridad ni Jehova kon tahoron nato ang iyang mga gigamit sa paggiya nato. Kon atong isalikway ang ilang tabang, sama rag si Jehova ang atong gisalikway. Dihang gisalikway sa mga Israelinhon si Moises, dako kaayo ning butang para kang Jehova. Para niya, siya ang ilang gisalikway.​—Numeros 14:26, 27; tan-awa ang Endnote 12.

9. Sa unsang paagi ang gugma magpalihok nato nga magmasinundanon?

⁹ Ang atong pagtahod sa awtoridad nagpakita nga gihigugma sab nato ang atong mga igsoon. Hunahunaa kini: Kon dunay katalagman, magtinabangay ang rescue team aron mas daghan silag maluwas. Para mahimo kana, kinahanglang dunay moorganisar nila ug sundon sa matag membro sa team ang mga instruksiyon. Pero unsay mahitabo kon balewalaon sa usa ka membro ang instruksiyon ug magbuotbuot? Bisag maayo siyag motibo, ang iyang pagbalewala maghatag ug problema sa iyang mga kauban, tingali makadisgrasya pa nila. Sa susama, kon dili nato sundon si Jehova ug kadtong gihatagan niyag awtoridad, basig mag-antos ang uban. Pero kon sundon nato si Jehova, gipakita nato nga atong gihigugma ang mga igsoon ug gitahod ang kahikayan ni Jehova.​—1 Corinto 12:14, 25, 26.

10, 11. Unsay atong hisgotan?

 ¹⁰ Ang tanang sugo ni Jehova makahatag natog kaayohan. Kon magpakita tag pagtahod sa awtoridad diha sa atong pamilya, sa kongregasyon, ug sa pagpakiglabot sa mga opisyales sa gobyerno, makabenepisyo ang tanan.​—Deuteronomio 5:16; Roma 13:4; Efeso 6:2, 3; Hebreohanon 13:17.

¹¹ Kon masabtan nato kon nganong gusto ni Jehova nga motahod ta sa uban, mas sayon ang paghimo niana. Hisgotan pa natog dugang kon sa unsang paagi ta makapakitag pagtahod sa tulo ka bahin sa atong kinabuhi.

12. Unsaon pagpakita sa bana nga nagtahod siya sa awtoridad?

¹² Si Jehova ang naghimo sa pamilya ug naghatag ug papel sa matag membro. Kon ang matag membro  makasabot kon unsay gusto ni Jehova nga iyang himoon, ang pamilya magkahiusa ug ang tanan makabenepisyo. (1 Corinto 14:33) Gihimo ni Jehova ang bana ingong ulo sa pamilya. Sa ato pa, gusto ni Jehova nga atimanon sa bana ang iyang asawa ug mga anak ug giyahan sila sa mahigugmaong paagi. Busa manubag siya kang Jehova kon giunsa niya sila pag-atiman. Ang Kristohanong bana buotan ug mahigugmaon ug nagtratar sa iyang pamilya sama sa pagtratar ni Jesus sa kongregasyon. Kon himoon kini sa bana, iyang gitahod si Jehova.​—Efeso 5:23; tan-awa ang Endnote 13.

13. Unsaon pagpakita sa asawa nga nagtahod siya sa awtoridad?

¹³ Ang Kristohanong asawa dunay importante ug dungganong papel. Iyang suportahan ang iyang bana, kinsa naningkamot nga mahimong maayong ulo sa  pamilya. Motabang siya sa iyang bana sa responsabilidad nga bansayon ang mga anak. Usa ka paagi nga matudloan niya sila nga magmatinahoron maoy pinaagi sa iyang panig-ingnan. (Proverbio 1:8) Motahod siya sa iyang bana ug mokooperar sa desisyon niini. Bisag dili siya mouyon sa iyang bana, iyang ipatin-aw ang iyang mga pagbati sa maayo ug matinahorong paagi. Kon dili Saksi ang bana, mas lisod ang kahimtang sa Kristohanong asawa. Pero kon padayon niyang higugmaon ug tahoron ang iyang bana, basig sa ulahi makadesisyon ang bana nga mokat-on bahin kang Jehova ug mosimba Niya.​—Basaha ang 1 Pedro 3:1.

14. Unsaon pagpakita sa mga anak nga nagtahod sila sa awtoridad?

¹⁴ Bililhon kang Jehova ang mga bata, ug nagkinahanglan silag proteksiyon ug giya. Kon sundon sa mga anak ang ilang ginikanan, malipay ang ilang ginikanan. Ug labaw sa tanan, ilang mapakita nga gitahod nila si Jehova ug mapalipay nila siya. (Proverbio 10:1) Sa daghang pamilya, usa ra ka ginikanan ang nagpadako sa mga anak. Lisod kaayo ni para sa ginikanan ug sa anak. Pero kon sundon ug suportahan sa mga anak ang ilang ginikanan, moarang-arang ang situwasyon sa pamilya. Bisan unsa pay situwasyon, walay hingpit nga pamilya. Pero ang pamilya magmalipayon kon sundon sa matag membro ang giya ni Jehova. Mahimaya niini si Jehova, ang naghimo sa tanang pamilya.​—Efeso 3:14, 15.

15. Unsaon nato pagpakita nga nagtahod ta sa awtoridad diha sa kongregasyon?

¹⁵ Si Jehova naggiya kanato pinaagi sa Kristohanong  kongregasyon, ug gihatagan niya si Jesus ug bug-os nga awtoridad diha niini. (Colosas 1:18) Gihatagan sab ni Jesus “ang matinumanon ug maalamong ulipon” ug responsabilidad sa pag-atiman sa katawhan sa Diyos dinhi sa yuta. (Mateo 24:45-47) Karon, “ang matinumanon ug maalamong ulipon” mao ang Nagamandong Lawas. Sila nagtagana sa atong panginahanglan sa hustong panahon aron magpabiling lig-on ang atong pagtuo. Ang mga ansiyano, ministeryal nga alagad, ug tigdumala sa sirkito nagsuportar sa mga kongregasyon sa tibuok kalibotan ug gihatagan ug mga instruksiyon sa Nagamandong Lawas. Silang tanan dunay responsabilidad sa pag-atiman kanato. Manubag sila kang Jehova kon giunsa nila kini pagtuman. Busa kon tahoron nato sila, atong gitahod si Jehova.​—Basaha ang 1 Tesalonica 5:12; Hebreohanon 13:17; tan-awa ang Endnote 14.

16. Nganong makaingon ta nga ang mga ansiyano ug ministeryal nga alagad gitudlo pinaagi sa balaang espiritu?

¹⁶ Ang mga ansiyano ug ministeryal nga alagad motabang aron magpabiling matinumanon ug nagkahiusa ang kongregasyon. Siyempre, dili sila hingpit sama nato. Busa giunsa sila pagpili? Kinahanglang naabot nila ang mga kuwalipikasyon diha sa Bibliya. (1 Timoteo 3:1-7, 12; Tito 1:5-9) Pinaagi sa balaang espiritu, gitabangan ni Jehova ang mga magsusulat sa Bibliya aron ipatin-aw kini nga mga kuwalipikasyon. Ang mga ansiyano mag-ampo kang Jehova alang sa iyang balaang espiritu dihang maghisgot kon kinsay itudlo nga ansiyano o ministeryal nga alagad. Klaro, gigiyahan ni Jesus ug Jehova ang kongregasyon. (Buhat  20:28) Ang mga lalaking gitudlo aron suportahan ug atimanon ta maoy mga gasa gikan sa Diyos.​—Efeso 4:8.

17. Aron ipakita ang pagtahod, unsay kinahanglang himoon usahay sa usa ka sister?

¹⁷ Usahay walay ansiyano o ministeryal nga alagad nga makadumala sa usa ka asaynment diha sa kongregasyon. Ang ubang bawtismadong brader puwedeng motabang. Pero kon wala, sister ang mohimo sa asaynment nga sagad ginahimo sa bawtismadong brader. Sa maong kahimtang, ang sister magpandong, puwedeng gamit ang bandana o kalo. (1 Corinto 11:3-10) Ang paghimo niana nagpakita nga gitahod niya ang kahikayan ni Jehova sa pagkaulo diha sa pamilya ug sa kongregasyon.​—Tan-awa ang Endnote 15.

18, 19. (a) Unsay atong makat-onan sa Roma 13:1-7? (b) Unsaon nato pagpakita nga nagtahod ta sa gobyerno?

¹⁸ Karon, gitugotan ni Jehova ang mga gobyerno nga makabaton ug awtoridad, ug angay nato silang tahoron. Ilang gidumala ang mga nasod ug komunidad aron hapsay kini ug matagan-an ang mga tawo sa gikinahanglang mga serbisyo. Gisunod sa mga Kristohanon ang instruksiyon sa Roma 13:1-7. (Basaha.) Atong gitahod ang “labaw nga mga awtoridad” ug gisunod ang mga balaod sa atong nasod o komunidad. Kini nga mga balaod mahimong makaapektar sa atong pamilya, negosyo, o propidad. Pananglitan, mobayad tag buhis ug mohatag sa mga impormasyon nga gikinahanglan sa gobyerno. Pero unsaon man kon ang gipangayo sa gobyerno supak sa balaod sa Diyos?  Si apostol Pedro miingon: “Kinahanglan namong sugton ang Diyos ingong magmamando imbes ang mga tawo.”​—Buhat 5:28, 29.

¹⁹ Kon makiglabot ta sa usa ka opisyales sa gobyerno, sama sa huwes o polis, kinahanglang matinahoron ta. Ang Kristohanong mga batan-on motahod sa ilang mga magtutudlo ug sa mga empleyado sa eskuwelahan. Sa atong trabahoan, tahoron nato ang atong amo, bisag dili motahod ang ubang empleyado. Kon ato ning himoon, atong gisundog si apostol Pablo, kinsa matinahoron sa mga opisyales bisag usahay lisod kadto. (Buhat 26:2, 25) Bisag dili ta tarongon pagtratar sa uban, magmatinahoron gihapon ta.​—Basaha ang Roma 12:17, 18; 1 Pedro 3:15.

20, 21. Unsay maayong mga resulta kon tahoron nato ang uban?

²⁰ Sa tibuok kalibotan, ang mga tawo wala na kaayoy pagtahod. Pero lahi ang mga alagad ni Jehova. Naningkamot tang tahoron ang tanan. Atong gisunod ang giingon ni apostol Pedro: “Pasidunggi ang tanang klase sa tawo.” (1 Pedro 2:17) Kon tahoron nato ang uban, ila kining mamatikdan. Si Jesus miingon: “Palamdaga ang inyong kahayag atubangan sa mga tawo aron ilang makita ang inyong maayong mga buhat ug himayaon ang inyong Amahan.”​—Mateo 5:16.

²¹ Kon magpakita tag pagtahod diha sa atong pamilya, kongregasyon, ug sa ubang bahin sa atong kinabuhi, magdasig kini sa uban nga mokat-og dugang bahin kang Jehova. Ug kon gitahod nato ang uban, gitahod nato si Jehova. Kini makapalipay kang Jehova ug nagpakita nga gihigugma nato siya.