Sumala sa Bibliya, kanus-a ug nganong angayng magpandong sa ulo ang usa ka Kristohanong babaye? Atong hisgotan ang inspiradong gisulat ni apostol Pablo bahin niini. Mihatag siyag giya aron makahimo kitag hustong mga desisyon nga makapasidungog sa Diyos. (1 Corinto 11:3-16) Gipadayag ni Pablo ang tulo ka butang nga angayng palandongon: (1) ang mga kalihokan, (2) ang mga kahimtang, ug (3) ang mga motibo nga angayng magpandong ang babaye.

Ang mga kalihokan. Naghisgot si Pablo ug duha: pag-ampo ug pagpanagna. (Bersikulo 4, 5) Siyempre, ang pag-ampo maoy masimbahong pagpakigsulti kang Jehova. Ang pagpanagna karon mao ang gipasukad-sa-Bibliya nga pagpanudlo sa usa ka Kristohanong ministro. Apan, gipasabot ba ni Pablo nga ang usa ka babaye angayng magpandong sa iyang ulo sa dihang mag-ampo o magtudlog kamatuoran sa Bibliya? Wala. Ang kahimtang maoy magtino kon magpandong ba o dili ang usa ka babaye samtang siya mag-ampo o magtudlo.

Ang mga kahimtang. Duha ka kahimtang ang gihisgotan ni Pablo​—ang pamilya ug ang kongregasyon. Siya nag-ingon: “Ang ulo sa usa ka babaye mao ang lalaki . . . Ang matag babaye  nga nagaampo o nagapanagna nga walay pandong sa iyang ulo nagapakaulaw sa iyang ulo.” (Bersikulo 3, 5) Sa kahikayan sa pamilya, ang bana mao ang gitudlo ni Jehova nga ulo sa babaye. Gawas kon ilhon niya ang awtoridad sa iyang bana, pakaulawan sa babaye ang iyang bana kon siyay modumala sa mga responsabilidad sa iyang bana nga gihatag ni Jehova. Pananglitan, kon kinahanglang siya ang magdumala sa usa ka pagtuon sa Bibliya nga presente ang iyang bana, magpandong siya sa iyang ulo agig pag-ila sa awtoridad sa iyang bana. Iyang himoon kana bawtismado man o dili ang iyang bana, kay ang bana mao ang ulo sa pamilya. * Kon siya mag-ampo o magtudlo nga presente ang iyang menor-de-edad nga bawtismadong anak lalaki, magpandong usab siya sa iyang ulo, dili tungod kay ulo sa pamilya ang iyang anak lalaki, kondili tungod sa awtoridad nga gihatag ngadto sa bawtismadong mga brader sa Kristohanong kongregasyon.

Gihisgotan ni Pablo ang kahimtang sa kongregasyon nga nag-ingon: “Kon may tawo nga makiglalis alang sa lain pa nga kostumbre, kami wala nay lain pa, ni ang mga kongregasyon sa Diyos.” (Bersikulo 16) Sa Kristohanong kongregasyon, mga brader maoy magdumala. (1 Timoteo 2:11-14; Hebreohanon 13:17) Mga brader lamang ang itudlong mga ansiyano ug ministeryal nga alagad sa pag-atiman sa panon sa Diyos. (Buhat 20:28) Usahay may mga kahimtang nga sister ang magdumala sa usa ka katungdanan nga kasagarang gihimo sa kuwalipikadong brader. Pananglitan, sister tingali ang magdumala sa tigom sa dili pa mosangyaw sa kanataran kay walay presente nga kuwalipikadong brader. O tingali magdumala siyag gikasabotan nang pagtuon sa Bibliya nga presente ang usa ka brader. Kay mga kalihokan man kana sa Kristohanong kongregasyon, ang sister angayng magpandong sa iyang ulo agig pag-ila nga siya nagdumala sa katungdanan nga kasagarang gihatag sa brader.

Sa laing bahin, may daghang kalihokan sa pagsimba nga dili kinahanglang magpandong ang usa ka sister. Pananglitan, dili  siya magpandong sa dihang mokomento panahon sa mga tigom, magsangyaw sa balay-balay uban sa iyang bana o sa laing brader, o magtuon o mag-ampo uban sa iyang di-bawtismadong mga anak. Hinuon, may ubang mga pangutana nga tingali motungha, ug kon ang sister dili segurado bahin niana, siya dugang makapanukiduki. * Kon dili gihapon siya segurado ug kon diktahan siya sa iyang tanlag nga magpandong, kana dili gayod sayop, ingon sa gipakita sa hulagway.

Ang mga motibo. Sa bersikulo 10, adunay duha ka katarongan nga gustong sundon kanang sugoa sa usa ka sister: “Ang babaye angay magbaton ug timaan sa awtoridad diha sa iyang ulo tungod sa mga manulonda.” Una, matikdi ang ekspresyon, “timaan sa awtoridad.” Ang pagpandong sa ulo maoy usa ka paagi nga ipakita sa sister ang iyang pag-ila sa awtoridad nga gihatag ni Jehova sa mga brader diha sa kongregasyon. Busa, siya nagpahayag sa iyang gugma ug pagkamaunongon kang Jehova nga Diyos. Ang ikaduhang katarongan anaa sa mga pulong “tungod sa mga manulonda.” Sa unsang paagi maapektohan sa sister ang mga manulonda pinaagi sa pagpandong sa iyang ulo?

Gustong makita sa mga manulonda nga ang awtoridad gikan sa Diyos giila diha sa tibuok organisasyon ni Jehova, sa langit ug sa yuta. Makabenepisyo usab sila sa mga panig-ingnan sa dili-hingpit nga mga tawo bahin niini. Kon buot sabton, angay usab silang magpasakop sa kahikayan ni Jehova​—usa ka pagsulay nga daghang manulonda ang napakyas sa nangaging panahon. (Judas 6) Makakita tingali karon ang mga manulonda ug mga kahimtang nga ang usa ka sister mas eksperyensiyado, edukado, ug maalamon kay sa usa ka brader sa kongregasyon; bisan pa niana siya mapinasakopon sa awtoridad sa brader. Sa pipila ka  kahimtang, ang sister maoy dinihogan nga sa ulahi mahimong kaubang manununod ni Kristo. Mag-alagad siya unya sa mas taas nga katungdanan kay sa mga manulonda ug magmando uban ni Kristo sa langit. Pagkamaayong sulondan alang sa mga manulonda! Pagkatalagsaong pribilehiyo nga ipakita sa tanang sister ang pagkamapainubsanon ug pagkamasinugtanon pinaagi sa ilang maunongon ug mapinasakopong panggawi nga dayag sa milyonmilyon nga matinumanong mga manulonda!