Si Jose ug Maria nagpabilin sa Betlehem imbes mouli sa Nasaret. Sa ikawalong adlaw human matawo si Jesus, siya gituli, sumala sa Balaod sa Diyos sa Israel. (Levitico 12:2, 3) Naandan usab nga hatagag ngalan ang batang lalaki nianang adlawa. Ginganlan nilag Jesus ang ilang anak kay kanay giingon sa anghel nga si Gabriel.

Kapig usa ka bulan ang milabay, 40 ka adlaw na ang edad ni Jesus. Asa siya dad-on sa iyang ginikanan? Sa templo sa Jerusalem, nga distansiyag pipila ka kilometro gikan sa ilang gipuy-an. Ang Balaod nag-ingon nga sa ika-40 nga adlaw sukad ipanganak ang batang lalaki, ang inahan kinahanglang moadto sa templo aron maghatag ug halad sa pagputli.—Levitico 12:4-7.

Gihimo kana ni Maria. Nagdala siyag duha ka gagmayng langgam aron ihalad. Nagpakita ni nga pobre si Jose ug Maria. Sumala sa Balaod, nating karnero ug langgam ang angayng ihalad. Pero kon dili kaya sa inahan nga maghalad ug karnero, duha ka tukmo o salampati ang ihalad. Mao ra nay kayang ihalad ni Maria.

Sa templo, dunay tigulang nga lalaki nga miduol kang Jose ug Maria. Siya si Simeon. Gipadayag sa Diyos kaniya nga iyang makita ang gisaad ni Jehova nga Kristo, o Mesiyas, sa dili pa siya mamatay. Nianang adlawa, si Simeon gigiyahan sa balaang espiritu sa pag-adto sa templo, diin iyang nakita si Jose ug Maria ug ang batang si Jesus. Gikugos ni Simeon ang bata.

Samtang nagkugos kang Jesus, si Simeon nagpasalamat sa Diyos: “Karon, Soberanong Ginoo, ang imong ulipon mahimo nang mamatay nga malinawon sumala sa imong gipahayag, kay nakita na nako ang imong paagi sa pagluwas nga imong giandam aron makita sa tanang katawhan. Siya ang kahayag nga magakuha sa kangitngit nga nagatabon sa kanasoran ug ang himaya sa imong katawhan nga Israel.”—Lucas 2:29-32.

Pagkadungog niini, nahibulong si Jose ug Maria. Gipanalanginan sila ni Simeon ug gisultihan si Maria nga ang iyang anak gipadala aron “daghan sa Israel ang mapukan ug ang uban bangonon,” ug si Maria maguol nga samag gidunggab sa hait nga espada.—Lucas 2:34.

Didto sab ang 84 anyos nga propetisa, si Ana. Presente siya kanunay sa templo. Niana mismong orasa, miduol siya kang Jose, Maria, ug sa batang si Jesus. Dayon, si Ana nagpasalamat sa Diyos ug nagsulti bahin kang Jesus sa tanang namati.

Seguradong nalipay pag-ayo si Jose ug Maria sa maong mga panghitabo sa templo! Kining tanan nagpamatuod gayod nga ang ilang anak mao ang Usa nga gisaad sa Diyos.