LEKSIYON 49
Sa Unsang Paagi Magmalipayon ang Imong Pamilya?—Bahin 1
Ang mga bag-ong kasal manghinaot nga ang kalipay nga ilang gibati sa adlaw sa ilang kasal magpadayon hangtod sa hangtod. Ug posible na. Ang mga Kristohanon nga dugay nang minyo ug naningkamot nga ipadapat ang tambag sa Bibliya nahibalo nga posible na.
1. Unsay tambag sa Bibliya para sa mga bana?
Gitudlo ni Jehova ang bana ingong ulo sa pamilya. (Basaha ang Efeso 5:23.) Gidahom ni Jehova nga mohimo siyag mga desisyon nga makahatag ug kaayohan sa pamilya. Ang Bibliya nagtambag sa mga bana: “Padayong higugmaa ang inyong mga asawa.” (Efeso 5:25) Unsay gipasabot ana? Ang mahigugmaong bana buotan sa iyang asawa, sa balay man o sa publiko. Proteksiyonan niya ang iyang asawa ug maningkamot siya sa pagtagana sa iyang pisikal ug emosyonal nga panginahanglan. (1 Timoteo 5:8) Labaw sa tanan, manguna siya sa pagtagana sa espirituwal nga panginahanglan sa iyang asawa. (Mateo 4:4) Pananglitan, siya mag-ampo ug magbasag Bibliya uban sa iyang asawa. Kon mahigugmaong atimanon sa bana ang iyang asawa, magpabilin siyang higala ni Jehova.—Basaha ang 1 Pedro 3:7.
2. Unsay tambag sa Bibliya para sa mga asawa?
Ang Pulong sa Diyos nag-ingon nga ang asawa “angay nga dunay dakong pagtahod sa iyang bana.” (Efeso 5:33) Unsaon na niya paghimo? Hunahunaon niya ang maayong mga hiyas sa iyang bana ug ang paningkamot niini nga atimanon siya ug ang ilang mga anak. Ikapakita pod niya ang pagtahod pinaagi sa pagsuportar sa mga desisyon sa iyang bana. Dugang pa, buotan siyang makig-estorya sa iyang bana ug dili niya ni daoton bisan pag kini dili alagad ni Jehova.
3. Sa unsang paagi mapalig-on sa magtiayon ang ilang kaminyoon?
Ang Bibliya nag-ingon bahin sa mga magtiayon: “Silang duha mahimong usa ka unod.” (Mateo 19:5) Nagpasabot ni nga kinahanglan nilang suklan ang bisan unsa nga makapabugnaw sa ilang gugma. Mahimo nila ni pinaagi sa regular nga paggahin ug panahon sa usag usa ug sa pagsulti sa ilang hunahuna ug pagbati sa usag usa sa matinud-anon ug mahigugmaon nga paagi. Dili nila tugotan ang bisan unsa o si bisan kinsa—gawas kang Jehova—nga mahimong mas importante kay sa ilang kapikas. Mag-amping gyod sila nga dili sobrang masuod sa dili nila kapikas.
TUN-IG DUGANG
Sayra ang mga prinsipyo sa Bibliya nga magpalig-on sa imong kaminyoon.
4. Mga bana—higugmaa ug atimana pag-ayo ang inyong asawa
Ang Bibliya nag-ingon nga “angayng higugmaon sa mga bana ang ilang mga asawa sama sa ilang kaugalingong lawas.” (Efeso 5:28, 29) Unsay gipasabot ana? I-play ang VIDEO, ug dayon hisgoti ang mosunod nga pangutana:
-
Sa unsang paagi ikapakita sa bana nga iyang gihigugma ug giatiman ang iyang asawa?
Basaha ang Colosas 3:12, ug dayon hisgoti kini nga pangutana:
-
Unsaon pagpakita sa bana kini nga mga hiyas diha sa iyang kaminyoon?
5. Mga asawa—higugmaa ug tahora ang inyong bana
Ang Bibliya nagdasig sa asawa nga tahoron ang iyang bana, kini man alagad ni Jehova o dili. Basaha ang 1 Pedro 3:1, 2, ug dayon hisgoti kini nga mga pangutana:
-
Kon ang imong bana dili alagad ni Jehova, seguradong gusto nimo nga iyang simbahon si Jehova. Unsa kahay mas epektibo—sangyawan nimo siya pirme o pakitaan nimo siyag maayong panggawi ug pagtahod? Ngano?
Ang bana ug asawa mahimong magtinabangay sa paghimog maayong mga desisyon. Pero usahay ang asawa dili uyon sa iyang bana. Busa puwede niyang isulti ang iyang hunahuna sa kalmado ug matinahoron nga paagi, pero kinahanglan niyang ilhon nga ang responsibilidad sa pagdesisyon kon unsay pinakamaayo para sa pamilya gihatag ni Jehova sa bana. Angay siyang maningkamot nga suportahan ang desisyon sa iyang bana. Pinaagi ana, makatabang siya nga magmalipayon ang tibuok pamilya. Basaha ang 1 Pedro 3:3-5, ug dayon hisgoti kini nga pangutana:
-
Unsay bation ni Jehova dihang tahoron sa asawa ang iyang bana?
6. Kaya ninyong sulbaron ang mga problema sa inyong kaminyoon
Walay hingpit nga kaminyoon. Busa ang mga magtiayon kinahanglang magtinabangay sa pagsulbad sa mga problema. I-play ang VIDEO, ug dayon hisgoti ang mosunod nga mga pangutana:
-
Sa video, unsay mga ilhanan nga nagkabugnaw ang gugma sa magtiayon?
-
Unsay ilang gihimo sa pagpalig-on sa ilang kaminyoon?
Basaha ang 1 Corinto 10:24 ug Colosas 3:13. Human mabasa ang matag teksto, hisgoti kini nga pangutana:
-
Nganong ang pagpadapat niini nga tambag makapalig-on sa kaminyoon?
Ang Bibliya nag-ingon nga angay natong pasidunggan ang usag usa. Apil ani ang pagtratar sa uban sa buotan ug matinahoron nga paagi. Basaha ang Roma 12:10, ug dayon hisgoti kini nga mga pangutana:
-
Angay ba nga ang bana o asawa maghulat nga pakitaan siyag pasidungog ayha pa siya magpakita ana sa iyang kapikas? Nganong kanay imong tubag?
ANG UBAN MOINGON: “Sa una, suod mi sa akong kapikas. Pero karon dili na.”
-
Unsaon nimo pagpakita nga makatabang nila ang Bibliya?
SUMARYO
Ang bana ug asawa magmalipayon kon sila maghigugmaay, naay pagtahod sa usag usa, ug magpadapat sa mga prinsipyo sa Bibliya.
Review
-
Unsay himoon sa bana aron magmalipayon ang iyang kaminyoon?
-
Unsay himoon sa asawa aron magmalipayon ang iyang kaminyoon?
-
Kon minyo ka, unsang prinsipyo sa Bibliya ang makatabang aron molig-on ang imong kaminyoon?
SUSIHA
Sayra ang praktikal nga mga sugyot nga makatabang nga magmalipayon ang imong pamilya.
Tan-awa ang music video nga nagpakita sa mga panalangin kon ipadapat ang tambag sa Diyos diha sa kaminyoon.
Susiha kon unsay gipasabot sa pagpasakop sa pagkaulo sa bana.
“Mga Babaye, Nganong Angay Kamong Magpasakop?” (Ang Bantayanang Torre, Mayo 15, 2010)
Giunsa pagsagubang sa usa ka magtiayon ang ilang lisod nga mga problema, apil na ang ilang pagdiborsiyo?
Basin Ganahan Pod Ka
KOMON NGA MGA PANGUTANA
Unsa ang Bible Study Program nga Gina-offer sa mga Saksi ni Jehova?
Sa libreng interactive program nga gina-offer sa mga Saksi ni Jehova, puwede nimong gamiton ang bisan unsang bersiyon sa Bibliya. Puwede nimong paapilon ang tibuok pamilya o mga amigo o amiga.
