1, 2. Nganong makaingon ka nga espesyal nga regalo ang pag-ampo, ug nganong kinahanglang mahibalo ta sa gitudlo sa Bibliya bahin niini?

KON itandi sa uniberso, gamay ra kaayo ang yuta. Dihang motan-aw si Jehova sa yuta, ang tanang tawo sa tanang nasod sama rag tinulo gikan sa timba. (Salmo 115:15; Isaias 40:15) Bisag gamay kaayo ta kon itandi sa uniberso, ang Salmo 145:18, 19 nag-ingon: “Si Jehova duol sa tanang nagatawag kaniya, sa tanang nagatawag kaniya sa kamatuoran. Iyang tagbawon ang tinguha sa mga nahadlok kaniya; iyang dunggon ang ilang pagtuaw alang sa tabang ug luwason sila.” Pagkadakong pribilehiyo! Si Jehova, ang labing gamhanang Maglalalang, gustong masuod kanato ug interesadong mamati sa atong mga pag-ampo. Oo, ang pag-ampo usa ka pribilehiyo, espesyal nga regalo nga gihatag ni Jehova sa matag usa kanato.

² Apan si Jehova mamati lang nato kon makigsulti ta niya sa paagi nga iyang giuyonan. Busa susihon nato kon unsay giingon sa Bibliya bahin sa pag-ampo.

3. Nganong angay kang moampo kang Jehova?

³ Gusto ni Jehova nga moampo, o makig-estorya, ka kaniya. Giunsa nato pagkahibalo? Palihog basaha ang Filipos 4:6, 7. Hunahunaa ang maong pagdapit. Ang Magmamando sa uniberso interesado kaayo nimo ug gusto niyang sultihan nimo siya sa imong gibati ug mga problema.

4. Sa unsang paagi ang regular nga pag-ampo makapasuod nimo kang Jehova?

 ⁴ Ang pag-ampo motabang nato nga mahimong suod nga higala ni Jehova. Kon ang managhigala regular nga mag-estorya bahin sa ilang gihunahuna, gikabalak-an, ug gibati, mas masuod sila sa usag usa. Sama usab niana ang pag-ampo kang Jehova. Pinaagi sa Bibliya, gisulti niya kanimo ang iyang hunahuna ug pagbati ug kon unsay iyang himoon sa umaabot. Puwede nimong isulti niya kon unsa gyoy naa sa imong kasingkasing pinaagi sa regular nga pag-ampo kaniya. Kon himoon nimo kini, mas masuod ka kang Jehova.​—Santiago 4:8.

5. Giunsa nato pagkahibalo nga dili tanang pag-ampo pamation ni Jehova?

⁵ Pamation ba sa Diyos ang tanang pag-ampo? Dili. Sa panahon ni propetang Isaias, si Jehova miingon sa mga Israelinhon: “Bisan pag kadaghan mo moampo, dili ko mamati; ang inyong mga kamot puno ug dugo.”  (Isaias 1:15) Kon dili ta mag-amping, makahimo tag mga butang nga makapahilayo nato kang Jehova ug tungod niana dili niya pamation ang atong mga pag-ampo.

6. Nganong importante kaayo ang pagtuo? Unsaon nimo pagpakita nga duna kay pagtuo?

⁶ Aron pamation ni Jehova ang atong mga pag-ampo, kinahanglang duna tay pagtuo kaniya. (Marcos 11:24) Si apostol Pablo miingon: “Kon walay pagtuo imposible nga mapalipay ang Diyos, kay kadtong moduol sa Diyos kinahanglang motuo nga siya buhi ug nga siya maoy tigganti sa mga sinserong nangita kaniya.” (Hebreohanon 11:6) Apan dili lang igo ang pag-ingon nga duna tay pagtuo. Kinahanglan natong pamatud-an kini pinaagi sa pagsunod kang Jehova kada adlaw.​—Basaha ang Santiago 2:26.

7. (a) Nganong kinahanglang mapainubsanon ug matinahoron ta dihang moampo kang Jehova? (b) Unsaon nato pagpakita nga sinsero ta dihang moampo?

⁷ Kinahanglang mapainubsanon ug matinahoron ta dihang moampo. Ngano? Kon makig-estorya tag hari o presidente, magmatinahoron ta. Si Jehova ang Labing Gamhanang Diyos, busa dili ba angay nga mas magmatinahoron ta ug magpaubos dihang makig-estorya niya? (Genesis 17:1; Salmo 138:6) Kinahanglan sab nga sinsero ta ug kinasingkasing nga moampo kang Jehova, nga dili balikbalikon ang samang mga pulong.​—Mateo 6:7, 8.

8. Kon naa tay iampo, unsay angay natong buhaton?

⁸ Kon naa tay iampo, kinahanglang paningkamotan natong molihok uyon niini. Pananglitan, kon mag-ampo ta kang Jehova alang sa adlaw-adlawng panginahanglan, dili ta angayng magtinapolan ug unya magdahom nga tagan-an ni Jehova ilabina kon duna pa tay mahimo. Magkugi ta ug dawaton ang bisan unsang trabaho nga atong makaya. (Mateo 6:11; 2 Tesalonica 3:10) O kon mag-ampo ta nga atong maundang ang dili maayong  buhat, kinahanglang likayan nato ang mga situwasyon nga makatental nato. (Colosas 3:5) Konsiderahon nato ang pipila ka pangutana bahin sa pag-ampo.

9. Kang kinsa ta angayng moampo? Unsay gitudlo kanato sa Juan 14:6 bahin sa pag-ampo?

⁹ Kang kinsa ta angayng moampo? Gitudloan ni Jesus ang iyang mga sumusunod sa pag-ampo sa atong ‘Amahan nga anaa sa mga langit.’ (Mateo 6:9) Miingon sab siya: “Ako ang dalan ug ang kamatuoran ug ang kinabuhi. Walay makaadto sa Amahan kon dili pinaagi kanako.” (Juan 14:6) Busa kang Jehova lang ta angayng moampo pinaagi kang Jesus. Unsay ipasabot nga moampo ta pinaagi kang Jesus? Aron dawaton ni Jehova ang atong pag-ampo, kinahanglang tahoron nato ang espesyal nga asaynment nga gihatag ni Jehova kang Jesus. Sa ato nang nakat-onan, si Jesus mianhi sa yuta aron luwason ta gikan sa sala ug kamatayon. (Juan 3:16; Roma 5:12) Gitudlo sab ni Jehova si Jesus ingong Hataas nga Saserdote ug Maghuhukom.​—Juan 5:22; Hebreohanon 6:20.

10. Kinahanglan ba ang partikular nga posisyon dihang moampo? Ipatin-aw.

¹⁰ Kinahanglan ba ang partikular nga posisyon dihang moampo? Dili. Wala ta sugoa ni Jehova nga magluhod, maglingkod, o magtindog dihang moampo. Sumala sa Bibliya, puwede tang makig-estorya kang Jehova sa bisan unsang posisyon nga nagpakitag pagtahod. (1 Cronicas 17:16; Nehemias 8:6; Daniel 6:10; Marcos 11:25) Mas importante kang Jehova ang atong motibo ug paagi sa pagpakig-estorya niya, dili ang atong posisyon dihang moampo. Puwede tang moampo nga kusog o hilom, bisan asa ug bisan kanus-a, adlaw man o gabii. Kon moampo ta kang Jehova, makasalig ta nga makadungog  siya nato bisag dili ta madungog sa uban.​—Nehemias 2:1-6.

11. Unsay puwede natong iampo kang Jehova?

¹¹ Unsay puwede natong iampo? Bisan unsa nga dalawaton kang Jehova. Ang Bibliya nag-ingon: “Bisan unsay atong pangayoon uyon sa iyang kabubut-on, maminaw siya nato.” (1 Juan 5:14) Puwede ba natong iampo ang personal nga mga butang? Oo. Kon moampo ta kang Jehova kinahanglan nga mora tag nakig-estorya ug suod nga higala. Mahimo natong isulti kaniya ang bisan unsa nga naa sa atong hunahuna ug kasingkasing. (Salmo 62:8) Makaampo ta nga hatagan ta niyag balaang espiritu aron tabangan ta sa paghimog husto. (Lucas 11:13) Makapangayo sab ta niyag kaalam sa paghimog maayong mga desisyon ug kusog sa pag-atubang sa mga kalisdanan. (Santiago 1:5) Angay tang mangayog pasaylo kang Jehova sa atong mga sala. (Efeso 1:3, 7) Iampo sab nato ang uban, apil ang atong pamilya ug mga igsoon sa kongregasyon.​—Buhat 12:5; Colosas 4:12.

12. Unsay angay natong unahon sa atong pag-ampo?

¹² Unsay angay natong unahon sa atong pag-ampo? Si Jehova ug ang iyang kabubut-on. Kinahanglang kinasingkasing tang magpasalamat sa tanan niyang gihimo kanato. (1 Cronicas 29:10-13) Nahibalo ta ani kay sa dinhi si Jesus sa yuta, iyang gitudloan ang iyang mga tinun-an kon unsaon pag-ampo. (Basaha ang Mateo 6:9-13.) Siya miingon nga kinahanglang unahon nato pag-ampo nga mabalaan ang ngalan sa Diyos, sa ato pa, isipong sagrado o balaan. Dayon gipakita ni Jesus nga angay natong iampo nga moabot ang Gingharian sa Diyos ug matuman ang kabubut-on ni Jehova sa tibuok yuta. Si Jesus miingon nga human nato iampo kining importante kaayong mga butang ayha pa nato iampo ang atong panginahanglan.  Kon unahon nato si Jehova ug ang iyang kabubut-on diha sa atong pag-ampo, atong gipakita kon unsay pinakaimportante kanato.

13. Unsay angayng gitas-on sa atong pag-ampo?

¹³ Unsay angayng gitas-on sa atong pag-ampo? Walay giingon ang Bibliya. Ang atong pag-ampo puwedeng taas o mubo, depende sa situwasyon. Pananglitan, puwede tang moampog mubo sa dili pa mokaon pero puwede natong tas-on dihang magpasalamat kang Jehova  o mosulti sa atong mga kabalaka. (1 Samuel 1:12, 15) Dili nato tas-on ang atong pag-ampo aron lang dayegon, sama sa gihimo sa uban sa panahon ni Jesus. (Lucas 20:46, 47) Dili malipay si Jehova niana. Ang importante kang Jehova mao ang pag-ampo nga kinasingkasing.

14. Kapila ta angayng mag-ampo, ug unsay atong makat-onan niini bahin kang Jehova?

¹⁴ Kapila ta angayng moampo? Gidapit ta ni Jehova nga regular nga makig-estorya niya. Ang Bibliya nag-ingon nga angay tang ‘magpadayon sa pag-ampo,’ ‘dili mohunong sa pag-ampo,’ ug ‘mag-ampo kanunay.’ (Mateo 26:41; Roma 12:12; 1 Tesalonica 5:17) Si Jehova andam kanunayng mamati kanato. Puwede tang magpasalamat kaniya kada adlaw tungod sa iyang gugma ug pagkamahinatagon. Makapangayo sab ta niyag giya,  kusog, ug paghupay. Kon gipabilhan gyod nato ang pribilehiyo nga makaampo kang Jehova, makig-estorya ta niya sa tanang higayon.

15. Nganong angay tang moingon ug “amen” inigkahuman ug ampo?

¹⁵ Nganong angay tang moingon ug “amen” inigkahuman ug ampo? Ang pulong “amen” nagpasabot ug “segurado” o “matuman kana.” Pagpakita kini nga sinsero ta sa atong gipanulti diha sa atong pag-ampo. (Salmo 41:13) Ang Bibliya nagtudlo nga maayong moingon sab tag “amen,” sa hilom man o sa kusog, inigkahuman sa publikong pag-ampo aron ipakita nga miuyon ta sa giampo.​—1 Cronicas 16:36; 1 Corinto 14:16.

16. Tubagon ba gyod ni Jehova ang atong pag-ampo? Ipatin-aw.

¹⁶ Tubagon ba gyod ni Jehova ang atong pag-ampo? Oo. Ang Bibliya nagtawag niya nga “Tigpatalinghog sa pag-ampo.” (Salmo 65:2) Si Jehova mamati ug motubag sa sinserong pag-ampo sa minilyong tawo, ug himoon niya kana sa lainlaing paagi.

17. Giunsa paggamit ni Jehova ang mga anghel ug ang iyang mga alagad sa yuta aron tubagon ang atong pag-ampo?

¹⁷ Si Jehova naggamit sa mga anghel ug sa iyang mga alagad sa yuta aron tubagon ang atong pag-ampo. (Hebreohanon 1:13, 14) Daghan ang nag-ampo nga makasabot sa Bibliya ug unya gibisitag Saksi ni Jehova. Gipakita sa Bibliya nga ang mga anghel dunay bahin sa pagsangyaw sa “maayong balita” sa tibuok yuta. (Basaha ang Pinadayag 14:6.) Daghan sab kanato ang nag-ampo kang Jehova bahin sa usa ka problema o panginahanglan ug dayon gitabangan ta sa mga igsoon sa pagtuo.​—Proverbio 12:25; Santiago 2:16.

18. Giunsa paggamit ni Jehova ang iyang balaang espiritu ug ang Bibliya sa pagtubag sa atong pag-ampo?

 ¹⁸ Gigamit ni Jehova ang iyang balaang espiritu aron tubagon ang atong pag-ampo. Dihang moampo ta nga tabangan ta sa atong problema, mahimong gamiton niya ang iyang balaang espiritu aron giyahan ug palig-onon ta. (2 Corinto 4:7) Gigamit sab ni Jehova ang Bibliya aron tubagon ang atong pag-ampo ug tabangan tang makahimog hustong desisyon. Dihang basahon nato ang Bibliya, makabasa tag mga teksto nga makatabang nato. Panahon sa tigom, puwedeng palihokon ni Jehova ang usa ka igsoon sa paghatag ug komento nga haom sa atong situwasyon. O palihokon Niya ang ansiyano sa kongregasyon aron ipaambit kanato ang usa ka punto gikan sa Bibliya.​—Galacia 6:1.

19. Nganong usahay morag wala tubaga ni Jehova ang atong pag-ampo?

¹⁹ Pero usahay basig makapangutana ta, ‘Nganong wala pa man tubaga ni Jehova ang akong pag-ampo?’ Hinumdomi, nahibalo siya kon kanus-a ug sa unsang paagi tubagon ang atong pag-ampo. Nahibalo siya sa atong gikinahanglan. Tingali kinahanglan tang magpadayon pa sa pag-ampo aron ipakita nga tininuod ang atong gihangyo ug naa gyod tay pagtuo niya. (Lucas 11:5-10) Usahay tubagon ni Jehova ang atong pag-ampo sa paagi nga wala nato damha. Pananglitan, nag-ampo ta bahin sa usa ka problema, pero imbes wad-on kini, lagmit hatagan ta niyag kusog aron makalahutay.​—Basaha ang Filipos 4:13.

20. Nganong angay tang moampo kanunay kang Jehova?

²⁰ Pagkadakong pribilehiyo nga makaampo ta kang Jehova! Makasalig ta nga mamati siya nato. (Salmo 145:18) Ug kon kanunay tang moampo nga kinasingkasing kang Jehova, mas masuod ta kaniya.