1, 2. (a) Unsay morag imposible alang sa daghan, apan unsay gipasalig kanato sa Bibliya? (b) Unsay pag-isip ni Jehova kang Abraham, ug ngano?

 UNSAY imong bation kon ang Maglalalang sa langit ug sa yuta moingon bahin kanimo, “Kini siya maoy akong higala”? Alang sa daghan, kana morag imposible. Kon buot sabton, sa unsang paagi ang usa ka ordinaryong tawo makahimo sa pagpakighigala kang Jehova nga Diyos? Bisan pa niana, gipasalig kanato sa Bibliya nga kita mahimo gyod nga makigsuod sa Diyos.

² Si Abraham nakapahimulos sa maong panagsuod. Si Jehova nagpaila sa maong patriarka ingong “akong higala.” (Isaias 41:8) Oo, si Jehova nag-isip kang Abraham ingong iyang higala. Nabatonan ni Abraham ang maong suod nga relasyon kay siya “nagpakitag pagtuo kang Jehova.” (Santiago 2:23) Karon pod, si Jehova mangitag kahigayonan nga makigsuod niadtong nag-alagad kaniya ug ‘magpahayag sa iyang gugma’ ngadto kanila. (Deuteronomio 10:15) Ang iyang Pulong nag-awhag: “Duol sa Diyos, ug siya moduol kaninyo.” (Santiago 4:8) Kining mga pulonga dili lang pagdapit kondili usa pod ka saad.

3. Sa unsa ta gidapit ni Jehova, ug unsay gisaad niya nga iyang himoon?

³ Si Jehova nagdapit kanato nga moduol kaniya. Siya andam ug gustong modawat kanato ingong iyang mga higala. Sa samang higayon, siya nagsaad nga kon mohimo tag mga lakang aron masuod kaniya, siya makigsuod nato. Busa mabatonan nato ang usa ka butang nga bililhon kaayo—“suod nga panaghigalaay uban kang Jehova.”  (Salmo 25:14) Ang “suod nga panaghigalaay” dinhi nagpadayag sa ideya sa pagsultig kompidensiyal nga mga butang ngadto sa suod nga higala.

4. Unsa ang suod nga higala, ug giunsa pagpakita ni Jehova nga ingon ana siya nga klase sa higala niadtong makigsuod kaniya?

⁴ Duna ba kay suod nga higala nga imong kasuginlan ug kompidensiyal nga mga butang? Ang maong higala naghunahuna gyod kanunay sa imong kaayohan. Mosalig ka niya kay imong napamatud-an nga siya mounong gyod nimo. Mosamot ang imong kalipay dihang imong isulti niya ang mga butang nga nakapalipay nimo. Ang iyang pagpamati ug simpatiya makapagaan sa imong kaguol. Makasabot siya nimo bisan pag daw way laing makasabot nimo. Sa susama, sa dihang masuod ka sa Diyos, makabaton kag suod nga Higala nga nagpabili gyod nimo, naghunahuna sa imong kaayohan, ug nakasabot pag-ayo nimo. (Salmo 103:14; 1 Pedro 5:7) Isulti nimo kaniya kon unsa gyoy imong mga pagbati kay nahibalo ka nga siya maunongon sa mga maunongon kaniya. (Salmo 18:25) Pero kining espesyal nga panaghigalaay uban sa Diyos mabatonan lang nato kay iya kining gipaposible.

5. Unsay gihimo ni Jehova aron maposible nga masuod ta kaniya?

⁵ Kon walay tabang, dili gyod ta masuod sa Diyos kay kita makasasala. (Salmo 5:4) “Apan gipakita sa Diyos ang iyang gugma kanato sa pagkaagi nga, samtang kita makasasala pa, ang Kristo namatay para nato,” misulat si apostol Pablo. (Roma 5:8) Gipadala ni Jehova si Jesus sa yuta “sa paghatag sa iyang kinabuhi ingong lukat baylo sa daghan.” (Mateo 20:28) Ang atong pagtuo sa maong halad lukat magpaposible nga masuod ta sa Diyos. Kay ang Diyos ang “unang nahigugma nato,” mihimo siyag paagi aron kita mahimong iyang higala.—1 Juan 4:19.

6, 7. (a) Nganong gitudloan ta ni Jehova bahin sa iyang kaugalingon? (b) Sa unsang mga paagi si Jehova nagpadayag sa iyang kaugalingon?

 ⁶ Si Jehova naghimog laing lakang: Iyang gipadayag kanato ang iyang kaugalingon. Sa panaghigalaay, ang pagkasuod gibase sa imong tinuod nga pagkaila sa usa ka tawo, nga magpabili sa iyang mga hiyas ug panggawi. Busa kon wala ta tudloi ni Jehova bahin sa iyang kaugalingon, dili gyod ta masuod kaniya. Pero wala gyod niya itago ang iyang kaugalingon kay gusto niya nga makaila ta niya. (Isaias 45:19) Dugang pa, iyang gipadayag ang iyang kaugalingon ngadto sa tanan, bisan niadtong giisip sa kalibotan nga ubos.—Mateo 11:25.

⁷ Giunsa pagpadayag ni Jehova kanato ang iyang kaugalingon? Makita diha sa iyang gilalang ang pipila ka bahin sa iyang personalidad—ang iyang dako kaayong gahom, lalom nga kaalam, ug dakong gugma. (Roma 1:20) Pero gipadayag ni Jehova ang iyang kaugalingon dili lang pinaagi sa iyang mga gilalang. Mas daghan siyag gitudlo kanato bahin sa iyang kaugalingon diha sa iyang Pulong, ang Bibliya.

8. Nganong makaingon ta nga ang Bibliya maoy ebidensiya sa gugma ni Jehova kanato?

⁸ Ang Bibliya maoy ebidensiya sa gugma ni Jehova kanato. Diha sa iyang Pulong, siya nagpadayag sa iyang kaugalingon sa paagi nga atong masabtan—pamatuod dili lang sa iyang gugma kanato kondili sa iyang tinguha nga kita makaila ug mahigugma kaniya. Ang atong mabasa niini nga basahon makapasuod nato kaniya. (Salmo 1:1-3) Atong hisgotan ang pipila ka makapalipayng mga paagi sa pagpadayag ni Jehova sa iyang kaugalingon diha sa iyang Pulong.

9. Paghatag ug pipila ka teksto nga direktang naghisgot sa mga hiyas sa Diyos.

 ⁹ Daghan tag mabasa sa Bibliya nga direktang nagpaila sa mga hiyas sa Diyos. Matikdi ang pipila ka pananglitan. “Si Jehova nahigugma sa hustisya.” (Salmo 37:28) Ang Diyos “gamhanan kaayo.” (Job 37:23) “‘Ako maunongon,’ miingon si Jehova.” (Jeremias 3:12) “Siya maalamon.” (Job 9:4) Siya “Diyos nga maluluy-on ug mabination, dili daling masuko ug dagaya sa maunongong gugma ug kamatuoran.” (Exodo 34:6) “Ikaw, Oh Jehova, maayo ug andam sa pagpasaylo.” (Salmo 86:5) Ug sumala sa nahisgotan sa nag-unang kapitulo, ang usa ka hiyas nagpatigbabaw: “Ang Diyos gugma.” (1 Juan 4:8) Samtang imong palandongon kining nindot nga mga hiyas, dili ba ka madani niining way sama nga Diyos?

10, 11. (a) Unsay gilakip ni Jehova diha sa iyang Pulong, ug ngano? (b) Unsang pananglitan sa Bibliya ang makatabang nga masabtan nato kon giunsa paggamit sa Diyos ang iyang gahom?

¹⁰ Dugang pa sa pagsulti kanato kon unsa ang iyang mga hiyas, si Jehova mahigugmaong naglakip diha sa iyang Pulong ug tinong mga pananglitan sa iyang pagpasundayag niining mga hiyasa. Kon atong basahon kini nga mga asoy, maimadyin nato ang gihimo ni Jehova ug kana makatabang kanato nga mas tin-awng masabtan ang nagkadaiyang bahin sa iyang personalidad. Kana, sa baylo, makatabang kanato nga masuod kaniya. Tagda ang usa ka pananglitan.

 ¹¹ Ang Bibliya nag-ingon nga ang Diyos naay “makapahinganghang gahom.” (Isaias 40:26) Pero dihang mabasa nato kon giunsa niya pagluwas ang Israel latas sa Pulang Dagat ug pagtagana sa panginahanglan sa nasod didto sa kamingawan sulod sa 40 ka tuig, mahingangha ta kon giunsa paggamit ni Jehova ang iyang gahom. Maimadyin nimo ang pagkabahin sa nagbul-og nga katubigan. Maimadyin pod nimo ang nasod—tingali 3,000,000 tanan—nga naglakaw sa nauga nga dagat, nga ang natibuok nga katubigan nagbarog samag dagkong mga paril sa duha ka kiliran. (Exodo 14:21; 15:8) Imong makita ang ebidensiya sa pagpanalipod ug pag-atiman sa Diyos sa iyang katawhan didto sa kamingawan. Ang tubig mibuhagay gikan sa bato. Ang pagkaon, nga susamag mga puting liso, mitungha sa yuta. (Exodo 16:31; Numeros 20:11) Gipadayag ni Jehova nga dili lang kay aduna siyay gahom kondili gamiton pod niya kini sa kaayohan sa iyang katawhan. Dili ba makasalig ta nga ang atong mga pag-ampo makadangat ngadto sa gamhanang Diyos nga “mao ang atong kusog ug dangpanan, usa ka tabang nga daling makaplagan panahon sa kasakitan”?—Salmo 46:1.

12. Sa unsang paagi si Jehova nagtabang kanato sa “pagkakita” kaniya gamit ang mga termino nga atong masabtan?

¹² Si Jehova, kinsa usa ka Espiritu, daghan pag nahimo sa pagtabang kanato nga makaila kaniya. Ingong mga tawo, kita makakita lang sa pisikal nga mga butang, dili sa espirituhanong mga butang. Kon ipaila sa Diyos ang iyang kaugalingon ngari kanato sa espirituhanong mga termino kini mahisama sa pagpaningkamot nga ipatin-aw ang detalyadong mga bahin sa imong dagway, sama sa kolor sa imong mata o mga talumtom, ngadto sa usa nga natawong buta. Hinunoa, si Jehova malulotong nagtabang  kanato sa “pagkakita” kaniya diha sa mga termino nga atong masabtan. Usahay mogamit siyag mga ilustrasyon ug pagtandi, nga gipakasama ang iyang kaugalingon sa mga butang nga atong nahibaloan. Gipaila gani niya ang iyang kaugalingon nga samag adunay mga parte sa lawas sa tawo. a

13. Unsay giingon sa Isaias 40:11 bahin kang Jehova, ug unsay imong pagbati bahin niini?

¹³ Matikdi ang giingon bahin kang Jehova nga makaplagan sa Isaias 40:11: “Samag magbalantay sa karnero, iyang atimanon ang iyang panon. Pinaagi sa iyang bukton iyang tapokon ang mga nating karnero, ug iya silang kugoson.” Si Jehova gitandi sa usa ka magbalantay nga nag-alsa sa mga nating karnero pinaagi sa “iyang bukton.” Nagpasabot kini sa katakos sa Diyos sa pagpanalipod ug pagsuportar sa iyang katawhan, bisan ang mga luya. Kita mobatig kasegurohan diha sa iyang kusgang mga bukton, kay kon kita maunongon kaniya, siya dili gyod mobiya kanato. (Roma 8:38, 39) Kugoson sa Dakong Magbalantay ang mga nating karnero. Ang orihinal nga Hebreohanong pulong nga gihubad ug “kugoson” nagtumong sa luag nga mga pinilo sa pang-ibabaw nga besti, diin didto ibutang sa magbalantay ang bag-ong gipanganak nga nating karnero. Sa ingon kita makasalig nga si Jehova nagmahal ug mabinationg nag-atiman kanato. Busa natural lang nga gusto natong masuod kaniya.

14. Nganong ikaingon nga klaro kaayong gipadayag ni Jehova ang iyang kaugalingon pinaagi kang Jesus?

¹⁴ Diha sa iyang Pulong, klaro kaayong gipadayag ni Jehova ang iyang kaugalingon pinaagi sa iyang minahal nga Anak, si Jesus. Walay usa nga makasundog ug mas klaro nga makapatin-aw sa panghunahuna ug mga pagbati sa Diyos kay kang Jesus. Kon buot sabton, ang maong panganay nga Anak nagkinabuhi tupad sa iyang Amahan sa wala pa malalang ang ubang espiritung mga linalang ug ang pisikal nga uniberso. (Colosas 1:15) Si Jesus nakaila pag-ayo kang Jehova. Kanay hinungdan nga siya nakaingon: “Walay nakaila sa Anak gawas sa Amahan, ug walay nakaila sa Amahan gawas sa Anak ug niadtong buot tudloan sa Anak bahin sa Amahan.” (Lucas 10:22) Sa dinhi sa yuta ingong usa ka tawo, gipadayag ni Jesus ang iyang Amahan sa duha ka hinungdanong mga paagi.

15, 16. Unsa ang duha ka paagi nga gipadayag ni Jesus ang iyang Amahan?

¹⁵ Una, ang mga pagpanudlo ni Jesus makatabang kanato nga makaila sa iyang Amahan. Si Jesus nagpaila kang Jehova sa mga terminong makatandog sa atong kasingkasing. Pananglitan, aron isaysay ang maluluy-ong Diyos nga magdawat pag-usab sa mahinulsolong mga makasasala, gipakasama ni Jesus si Jehova sa usa ka mapinasayloong amahan nga naluoy pag-ayo pagkakita niya nga ang iyang mausikong anak mipauli mao nga siya midagan ug migakos sa iyang anak ug mapinanggaong mihalok kaniya. (Lucas 15:11-24) Si Jesus naghulagway usab kang Jehova ingong Diyos nga ‘magkabig’ sa mga tawong matarong ug kasingkasing tungod kay siya nahigugma kanila isip mga indibiduwal. (Juan 6:44) Siya mahibalo gani sa dihang ang gamay kaayong goryon mahulog sa yuta.  “Ayaw mog kahadlok,” mipatin-aw si Jesus, “mas labaw mog bili kay sa daghang goryon.” (Mateo 10:29, 31) Seguradong makabig kita sa maong matinagdanong Diyos.

¹⁶ Ikaduha, ang panig-ingnan ni Jesus nagpakita kanato kon sama sa unsa si Jehova. Hingpit kaayong gibanaag ni Jesus ang iyang Amahan nga siya nakaingon: “Kadtong nakakita kanako nakakita usab sa Amahan.” (Juan 14:9) Busa, sa dihang makabasa kita diha sa Mga Ebanghelyo bahin kang Jesus—ang mga pagbati nga iyang gipasundayag ug ang paagi sa iyang pagpakiglabot sa uban—sa usa ka diwa kita nakakitag buhing hulagway sa iyang Amahan. Si Jehova dili makahatag kanatog mas tin-awng pagpadayag sa iyang mga hiyas kay niana. Ngano man?

17. Iilustrar kon giunsa ta pagtabang ni Jehova nga masabtan kon unsa siyang klaseha sa persona.

¹⁷ Sa pag-ilustrar: Hunahunaa nga nagsulay ka nga ipatin-aw kon unsay pagkabuotan. Tingali ipatin-aw nimo kini pinaagig mga pulong. Apan kon  makapunting ka sa usa ka tawo nga aktuwal nga nagbuhat ug maayo ug moingon, “Kana maoy buotan,” ang pulong “pagkabuotan” makabaton ug dugang kahulogan ug mas sayon nga sabton. Gihimo ni Jehova ang susamang butang aron tabangan ta nga masabtan kon unsa siyang klaseha sa persona. Gawas nga gipaila niya ang iyang kaugalingon pinaagi sa mga pulong, iya pong gitagana ang buhing panig-ingnan sa iyang Anak. Ang mga hiyas sa Diyos makita diha kang Jesus. Pinaagi sa Mga Ebanghelyo nga naghubit bahin kang Jesus, si Jehova samag nag-ingon: “Ako sama niana.” Unsay giingon sa Bibliya bahin kang Jesus niadtong dinhi siya sa yuta?

18. Giunsa pagpasundayag ni Jesus ang gahom, hustisya, ug kaalam?

¹⁸ Gipasundayag ni Jesus ang upat ka pangunang hiyas sa Diyos. Siya may gahom nga wad-on ang sakit, gutom, ug bisan ang kamatayon. Bisan pa niana, lahi sa hakog nga mga tawo nga moabusar sa ilang gahom, siya wala gyod mogamit sa milagrosong gahom sa iyang kaugalingong kaayohan o sa pagdaot sa uban. (Mateo 4:2-4) Siya nahigugma sa hustisya. Ang iyang kasingkasing napunog matarong nga kasuko sa pagkakitag limbongang mga negosyante nga nagpahimulos sa katawhan. (Mateo 21:12, 13) Makiangayon ang iyang pagtagad sa kabos ug tinamay, nga nagtabang kanila nga “mobatig kahayahay.” (Mateo 11:4, 5, 28-30) Dili hitupngan ang kaalam nga gitudlo ni Jesus, kinsa “labaw pa kang Solomon.” (Mateo 12:42) Apan si Jesus wala gyod manghambog sa iyang kaalam. Ang iyang mga pulong nakatandog sa kasingkasing sa ordinaryong mga tawo, kay ang iyang mga pagpanudlo tin-aw, simple, ug praktikal.

19, 20. (a) Nganong si Jesus usa ka talagsaong panig-ingnan sa gugma? (b) Samtang atong basahon ug pamalandongon ang panig-ingnan ni Jesus, unsay angay natong hinumdoman?

¹⁹ Si Jesus usa ka talagsaong panig-ingnan sa gugma. Sa  tibuok niyang ministeryo, iyang gipasundayag kini sa lainlaing paagi. Pananglitan, naluoy kaayo siya sa mga tawo dihang nakita niya nga nag-antos sila. Ang maong kaluoy kanunayng nagdasig kaniya sa paglihok. (Mateo 14:14) Bisan pag iyang giayo ang masakiton ug gipakaon ang gigutom, si Jesus nagpahayag ug kahangawa diha sa labi pang hinungdanong paagi. Iyang gitabangan ang uban nga mahibalo, modawat, ug mahigugma sa kamatuoran mahitungod sa Gingharian sa Diyos, nga maoy magdalag permanenteng mga panalangin alang sa katawhan. (Marcos 6:34; Lucas 4:43) Labaw sa tanan, gipakita ni Jesus ang dakong gugma pinaagi sa kinabubut-ong pagtugyan sa iyang kinabuhi alang sa uban.—Juan 15:13.

²⁰ Katingad-an ba nga ang katawhan sa tanang pangedaron ug mga kahimtang sa kinabuhi nakabig sa maong tawo nga may dakong gugma ug kaluoy? (Marcos 10:13-16) Pero samtang atong basahon ug pamalandongon ang buhing panig-ingnan ni Jesus, kanunay natong hinumdoman nga gisundog pag-ayo sa maong Anak ang iyang Amahan.—Hebreohanon 1:3.

21, 22. Unsay nalangkit sa pagpangita kang Jehova, ug sa unsang paagi kini nga publikasyon makatabang nato sa paghimo niana?

²¹ Pinaagi sa pagpadayag nga tin-aw kaayo sa iyang kaugalingon diha sa iyang Pulong, si Jehova tin-awng nagpaila nga buot niyang kita masuod kaniya. Sa samang higayon, siya dili magpugos kanato nga mahimong iyang higala. Anaa lang kanato ang pagpangita kang Jehova “samtang makaplagan pa siya.” (Isaias 55:6) Ang pagpangita kang Jehova naglangkit sa pagkat-on bahin sa iyang  mga hiyas ug mga buhat nga gipadayag diha sa Bibliya. Ang publikasyon nga imo karong ginabasa gidisenyo aron motabang kanimo niining maong katuyoan.

²² Matikdi nga kining libroha gibahin sa mga seksiyon nga motumbas sa upat ka pangunang hiyas ni Jehova: gahom, hustisya, kaalam, ug gugma. Ang matag seksiyon sugdan pinaagig usa ka sumaryo sa maong hiyas. Ang sunod nga pipila ka kapitulo maghisgot kon giunsa pagpaila ni Jehova ang maong hiyas sa lainlaing paagi. Ang matag seksiyon naundan usab ug usa ka kapitulo nga magpakita kon sa unsang paagi gipakita ni Jesus ang maong hiyas, ingon man usa ka kapitulo nga maghisgot kon unsaon nato kini pagsundog.

23, 24. (a) Ipatin-aw ang espesyal nga bahin nga “Mga Pangutana nga Makatabang sa Pagpamalandong.” (b) Sa unsang paagi ang pagpamalandong makatabang nato nga mas masuod sa Diyos?

²³ Sugod niining kapituloha, adunay usa ka espesyal nga bahin nga nag-ulohang “Mga Pangutana nga Makatabang sa Pagpamalandong.” Pananglitan, tan-awa ang  kahon niini nga panid. Ang mga teksto ug mga pangutana  dili review sa kapitulo. Ang katuyoan niini mao ang pagtabang kanimo sa pagpamalandong sa topiko sa maong kapitulo. Sa unsang paagi epektibo nimong magamit kining bahina? Tan-awa ang matag usa sa gisitar nga mga teksto, ug basaha pag-ayo ang mga bersikulo. Unya tagda ang pangutana nga nag-uban sa matag gisitar nga teksto. Palandonga ang mga tubag. Mag-research. Isukna ang pipila ka dugang nga mga pangutana: ‘Unsay gisulti kanako niining impormasyona bahin kang Jehova? Unsaon nako kini pagpadapat? Sa unsang paagi magamit ko kini sa pagtabang sa uban?’

²⁴ Ang maong pagpamalandong makatabang kanato nga mas masuod kang Jehova. Ngano? Gipakita sa Bibliya nga ang pagpamalandong dakog epekto sa atong personalidad. (Salmo 19:14) Kon pamalandongon ug pabilhan nato ang atong nakat-onan bahin sa Diyos, ang impormasyon makasuhop sa atong simbolikong kasingkasing, diin makaapektar kini sa atong panghunahuna, makapukaw sa atong mga pagbati, ug sa kadugayan magdasig kanato sa paglihok. Ang atong gugma sa Diyos molalom, ug kanang gugmaha, sa baylo, magdasig kanato sa pagtinguha nga pahimut-an siya ingong atong kinasuorang Higala. (1 Juan 5:3) Aron makabaton niana nga relasyon, kinahanglang kita mahibalo sa mga hiyas ug mga buhat ni Jehova. Apan, ato unang hisgotan ang usa ka bahin sa kinaiyahan sa Diyos nga naghatag ug puwersadong katarongan sa pagpakigsuod kaniya—ang iyang pagkabalaan.