1-3. (a) Unsay atong makat-onan sa paghagwahagwa sa ginikanan sa ilang bata? (b) Unsay sagad natong reaksiyon dihang dunay magpakitag gugma kanato, ug unsang hinungdanong pangutana ang atong ikasukna sa atong kaugalingon?

 MALIPAY ang mga ginikanan nga makakita nga ang ilang bag-ong natawo nga anak mopahiyom. Kasagarang ipaduol nila ang ilang nawong sa nawong sa bata ug hagwahagwaon kini. Eksayted silang makita kon unsay reaksiyon sa bata. Pagkataudtaod, ang kandiis mogawas diha sa aping sa bata, dayon makita ang iyang tam-is nga pahiyom. Pinaagi sa maong pahiyom, ang bata nagsugod sa pagpakitag gugma isip balos sa gugma sa iyang ginikanan.

² Ang pahiyom sa bata magpahinumdom kanato sa hinungdanong butang bahin sa mga tawo. Ang atong kinaiyanhong balos sa gugma maoy gugma. Ingon ana gyod ang pagkadisenyo nato. (Salmo 22:9) Samtang magtubo kita, mahimo kitang hamtong sa atong katakos nga mosanong sa gugma. Mahinumdom tingali ka gikan sa imong pagkabata kon sa unsang paagi gipakitaan kag gugma sa imong mga ginikanan, paryente, o mga higala. Sa imong kasingkasing miturok, mitubo, ug milambo ang mainitong pagbati para nila. Agig balos ikaw nagpakita sa imong gugma kanila. Ingon ana ba pod ang nagakahitabo sa imong relasyon kang Jehova nga Diyos?

³ Ang Bibliya nag-ingon: “Kita nahigugma, kay siya ang unang nahigugma nato.” (1 Juan 4:19) Sa Seksiyon 1 hangtod 3 niini nga publikasyon, gipahinumdoman ka nga si Jehova nga Diyos nagpasundayag sa iyang gahom, hustisya, ug kaalam sa mahigugmaong mga paagi alang  sa imong kaayohan. Ug sa Seksiyon 4, nasabtan nimo nga siya direktang nagpakita sa iyang gugma alang sa katawhan—ug alang kanimo sa personal—sa talagsaong mga paagi. Karon ang usa ka pangutana motungha. Tingali kini ang hinungdanon kaayong pangutana nga imong ikasukna sa kaugalingon: ‘Unsaon nako pagpakita nga gihigugma nako si Jehova?’

4. Nganong nalibog ang mga tawo sa kahulogan sa atong paghigugma sa Diyos?

⁴ Si Jehova, ang Tinubdan sa gugma, nahibalo gayod nga ang gugma dunay gahom sa pagpalihok sa mga tawo nga ipakita ang ilang maayo kaayong mga hiyas. Busa bisag gisalikway siya sa kadaghanang tawo, siya masaligon gihapon nga ang pipila ka tawo mapalihok sa paghigugma kaniya. Ug tinuod, milyonmilyon ang misanong. Apan makapasubo nga ang mga relihiyon niining daotang kalibotan nagtudlog sayop nga ideya bahin sa kahulogan sa paghigugma nato sa Diyos. Daghan ang moingon nga nahigugma sila sa Diyos, apan naghunahuna sila nga paigo na ang pag-ingon nga gihigugma nila ang Diyos. Ang paghigugma sa Diyos tingali magsugod sa maong paagi, sama ra nga ang gugma sa bata alang sa iyang ginikanan tingali unang makita pinaagi sa usa ka pahiyom. Apan sa mga tawong hamtong, labaw pa ang nalangkit sa paghigugma.

5. Unsay kahulogan sa paghigugma sa Diyos, ug nganong makahatag kana ug kaayohan kanato?

⁵ Si Jehova naghisgot sa kahulogan sa paghigugma kaniya. Ang iyang Pulong nag-ingon: “Kini ang kahulogan sa paghigugma sa Diyos, nga atong tumanon ang iyang mga sugo.” Ang atong paghigugma sa Diyos kinahanglang ipakita sa buhat. Tinuod, daghang tawo dili ganahan sa ideya sa pagkamasinugtanon. Apan ang samang bersikulo  midugang niining makapahupayng mga pulong: ‘Ug dili bug-at ang mga sugo sa Diyos.’ (1 Juan 5:3) Ang mga balaod ug prinsipyo ni Jehova gidisenyo aron makahatag kanatog kaayohan, dili aron mabug-atan kita. (Isaias 48:17, 18) Ang Pulong sa Diyos napunog mga prinsipyo nga makatabang kanato nga mas masuod kaniya. Sa unsang paagi? Atong hisgotan ang tulo ka bahin sa atong relasyon sa Diyos. Kini naglakip sa pagpakigsulti, pagsimba, ug pagsundog kaniya.

6-8. (a) Sa unsang paagi makapaminaw kita kang Jehova? (b) Sa unsang paagi mahimong buhi ang Kasulatan sa atong pagbasa niini?

⁶ Ang Kapitulo 1 nagsugod sa pangutana, “Makahanduraw ba ka nga nakig-estorya ka sa Diyos?” Atong nasabtan nga dili lamang kini imahinasyon. Sa pagkatinuod, si Moises nakahimo sa pagpakigsulti sa Diyos. Komosta man kita? Karon, si Jehova dili na magsugo sa iyang mga anghel sa pagpakigsulti sa mga tawo. Apan si Jehova dunay maayo kaayong paagi sa pagpakigsulti kanato karon. Sa unsang paagi makapaminaw kita kang Jehova?

⁷ Tungod kay “ang tibuok Balaang Kasulatan gisulat pinaagi sa paggiya sa Diyos,” kita naminaw kang Jehova pinaagi sa pagbasa sa iyang Pulong, ang Bibliya. (2 Timoteo 3:16) Busa ang salmista nagdasig sa mga alagad ni Jehova nga basahon kini “adlaw ug gabii.” (Salmo 1:1, 2) Ang paghimo niana nagkinahanglag dakong paningkamot. Apan mapuslanon ang tanang matang sa maong paningkamot. Sumala sa atong nasabtan sa Kapitulo 18, ang Bibliya samag usa ka bililhong sulat alang kanato gikan sa atong langitnong Amahan. Busa ang pagbasa niana dili angay nga usa ka bug-at nga rutina. Kinahanglan nga himoon natong buhi ang Kasulatan samtang magbasa niini. Sa unsang paagi mahimo nato kana?

 ⁸ Samtang magbasa ka sa Bibliya, imadyina kon unsay nagakahitabo sa kinabuhi sa karakter nga imong ginabasa. Paningkamoti nga masabtan ang ilang kagikan, kahimtang, ug motibo. Unya pamalandonga ang imong gibasa, ug pangutan-a ang imong kaugalingon: ‘Unsay gitudlo niini kanako bahin kang Jehova? Unsang mga hiyas ni Jehova ang gipakita dinhi? Unsang prinsipyo ang gusto ni Jehova nga akong mahibaloan, ug sa unsang paagi mapadapat nako kini sa akong kinabuhi?’ Basaha ug pamalandonga ang Pulong sa Diyos, ug ipadapat ang imong nakat-onan. Pinaagi niana, ang Pulong sa Diyos mahimong buhi alang kanimo.—Salmo 77:12; Santiago 1:23-25.

9. Kinsa “ang matinumanon ug maalamong ulipon,” ug nganong hinungdanon nga kita maminaw pag-ayo sa maong “ulipon”?

⁹ Si Jehova nakigsulti usab kanato pinaagi sa “matinumanon ug maalamong ulipon.” Sumala sa gitagna ni Jesus, ang gamayng grupo sa dinihogang mga brader gitudlo sa paghatag ug espirituwal nga “pagkaon sa hustong panahon” niining lisod nga panahon sa kataposang mga adlaw. (Mateo 24:45-47) Dihang magbasa tag mga publikasyon nga makatabang nato nga masabtan ang Bibliya ug dihang motambong tag Kristohanong mga tigom ug kombensiyon, kita gipakaon sa espirituwal nga paagi sa maong ulipon. Kay kini maoy ulipon sa Kristo, atong ipadapat ang mga pulong ni Jesus: “Angay mong mamati pag-ayo.” (Lucas 8:18) Kita mamati pag-ayo kay giila nato nga ang matinumanong ulipon mao ang gigamit ni Jehova sa pagpakigsulti kanato.

10-12. (a) Nganong ang pag-ampo maoy talagsaong regalo gikan ni Jehova? (b) Sa unsang paagi ang atong pag-ampo makapalipay kang Jehova, ug nganong makasalig kita nga iyang pabilhan ang atong mga pag-ampo?

¹⁰ Apan komosta man ang atong pagpakigsulti sa Diyos? Puwede ba tang makigsulti kang Jehova? Kulba gayod  ning hunahunaon. Kon ikaw mosulay sa pagduol sa labing gamhanang magmamando sa inyong nasod aron makigsulti bahin sa imong personal nga kabalaka, naa kahay posibilidad nga maestorya nimo siya? Sa pipila ka kahimtang, ang pagsulay sa paghimo niini basin peligroso pa gani! Sa panahon ni Ester ug Mardokeo, ang usa ka tawo mahimong patyon kon moatubang siya sa hari sa Persia bisag wala siya ipatawag sa hari. (Ester 4:10, 11) Karon handurawa nga moatubang ka sa Soberanong Ginoo sa uniberso. Kon itandi kang Jehova, bisan ang labing gamhanang mga tawo “samag mga apan-apan.” (Isaias 40:22) Angay ba usab kitang mahadlok nga moduol kaniya? Dili gayod!

¹¹ Gihatag ni Jehova ang bukas ug simple nga paagi sa pagduol kaniya—ang pag-ampo. Bisan ang usa ka bata nga may pagtuo kang Jehova makaampo kaniya, nga maghimo niana diha sa ngalan ni Jesus. (Juan 14:6; Hebreohanon 11:6) Bisan pa niana, ang pag-ampo makatabang nato sa pagsulti sa atong kinasulorang mga hunahuna ug pagbati—bisan ang mga butang nga sakit kaayong isulti. (Roma 8:26) Dili nimo mapabilib si Jehova pinaagi sa balaknong mga pulong o sa tag-as nga mga pag-ampo. (Mateo 6:7, 8) Sa laing bahin, si Jehova wala maghatag ug limitasyon kon unsa ka taas o kon kapila ta makigsulti kaniya. Gani, ang iyang Pulong nagdapit kanato sa “pag-ampo kanunay.”—1 Tesalonica 5:17.

¹² Hinumdomi nga si Jehova lamang ang gitawag ug “Tigpatalinghog sa pag-ampo,” ug siya mamati uban ang empatiya. (Salmo 65:2) Hasolan ba siyang maminaw sa mga pag-ampo sa iyang matinumanong mga alagad? Dili, malipay siya sa pagpaminaw niana. Ang iyang Pulong nagpakasama sa maong mga pag-ampo sa insenso. Kon sunogon ang insenso, mopatungha nig humot nga aso. (Salmo 141:2; Pinadayag 5:8; 8:4) Dili ba makahupay ang  paghunahuna nga ang atong sinserong mga pag-ampo makaabot sa Soberanong Ginoo ug makapalipay kaniya? Busa kon gusto nimong masuod kang Jehova, pag-ampo kaniya nga mapainubsanon kada adlaw. Isulti kaniya ang tanan nimong gibati. (Salmo 62:8) Isulti ang imong mga kabalaka, kalipay, pasalamat, ug pagdayeg ngadto sa imong langitnong Amahan. Ingong resulta, ang inyong panaghigalaay mas molig-on.

13, 14. Unsay kahulogan sa pagsimba kang Jehova, ug nganong haom nga ato kanang himoon?

¹³ Sa dihang kita makigsulti ug maminaw kang Jehova nga Diyos, dili kini sama sa atong ginahimo sa atong higala o paryente. Hinuon, usa ni ka paagi nga atong gipakita ang atong dakong pagtahod ug tibuok kalag nga gugma kang Jehova, ug atong gihatag kaniya ang pasidungog nga para lang kaniya. Makaapektar ni sa tibuok natong kinabuhi. Ug kini naghiusa sa tanang matinumanong alagad ni Jehova, sa langit man o sa yuta. Sa usa ka panan-awon, si apostol Juan nakadungog sa usa ka anghel nga nagsulti niini nga sugo: “Simbaha ang Usa nga naghimo sa langit ug sa yuta ug sa dagat ug sa mga tubod sa tubig.”—Pinadayag 14:7.

¹⁴ Nganong angay natong simbahon si Jehova? Hunahunaa ang mga hiyas nga ato nang nahisgotan, sama sa pagkabalaan, gahom, pagpugong sa kaugalingon, hustisya, kaisog, kaluoy, kaalam, pagkamapainubsanon, gugma, pagkamaunongon, ug pagkamaayo. Nasabtan nato nga si Jehova ang kinalabwang nagpakita niining bililhong mga hiyas. Dihang maningkamot ta nga masabtan ang tanan niyang hiyas, masabtan nato nga dili lang siya talagsaong Persona. Siya makapahingangha kaayo ug labaw kaayo kay kanato. (Isaias 55:9) Sa walay duhaduha, si Jehova mao  gayod ang atong Soberano, ug siya takos gayod sa atong pagsimba. Apan sa unsang paagi angay natong simbahon si Jehova?

15. Sa unsang paagi masimba nato si Jehova “sa espiritu ug kamatuoran,” ug unsay atong kahigayonan diha sa Kristohanong mga tigom?

¹⁵ Si Jesus miingon: “Ang Diyos maoy Espiritu, ug ang iyang mga magsisimba kinahanglang magsimba kaniya sa espiritu ug kamatuoran.” (Juan 4:24) Aron makaalagad kang Jehova “sa espiritu,” kinahanglan natong mabatonan ang iyang espiritu ug magpagiya niini. Ang atong pag-alagad kinahanglan usab nga nahiuyon sa kamatuoran, ang tukmang kahibalo nga makaplagan diha sa Pulong sa Diyos. Kita dunay bililhong kahigayonan sa pagsimba kang Jehova “sa espiritu ug kamatuoran” sa dihang kita makigtigom uban sa mga igsoon. (Hebreohanon 10:24, 25) Sa dihang kita moawit ug mga pagdayeg kang Jehova, magkahiusa sa pag-ampo kaniya, ug maminaw ug makigbahin sa mga panaghisgot sa iyang Pulong, gipakita nato ang atong gugma kaniya.

16. Unsa ang usa sa kinalabwang sugo nga gihatag ngadto sa tinuod nga mga Kristohanon, ug nganong mapalihok ta sa paghimo niana?

¹⁶ Nagsimba usab kita kang Jehova sa dihang sultihan nato ang uban bahin kaniya, ug niining paagiha gidayeg nato siya. (Hebreohanon 13:15) Sa pagkatinuod, ang pagsangyaw sa maayong balita sa Gingharian ni Jehova maoy usa sa kinalabwang sugo nga gihatag ngadto sa tinuod nga mga Kristohanon. (Mateo 24:14) Madasigon tang mohimo niini kay gihigugma nato si Jehova. Sa dihang maghunahuna kita kon sa unsang paagi “ang diyos niini nga sistema sa mga butang,” si Satanas nga Yawa, “nagbuta sa hunahuna sa mga dili magtutuo” ug nagpakaylap ug mga bakak bahin kang Jehova, dili ba gusto kaayo natong depensahan ang atong Diyos ingong iyang mga Saksi aron  pamatud-an nga bakakon si Satanas? (2 Corinto 4:4; Isaias 43:10-12) Ug sa dihang pamalandongon nato ang kahibulongang mga hiyas ni Jehova, dili ba madasig kaayo ta nga sultihan ang uban bahin kaniya? Sa pagkatinuod, wala nay mas dakong pribilehiyo kay sa pagtabang sa uban nga makaila ug mahigugma sa atong langitnong Amahan.

17. Unsay nalakip sa atong pagsimba kang Jehova, ug nganong kinahanglang simbahon nato siya sa bug-os nga kasingkasing?

¹⁷ Ang atong pagsimba kang Jehova naglakip ug daghan pa. Apektado niini ang tanang bahin sa atong kinabuhi. (Colosas 3:23) Kon si Jehova gyod ang atong Soberanong Ginoo, maningkamot kita sa pagbuhat sa iyang kabubut-on sa tanang butang—sa atong pamilyahanong kinabuhi, sekular nga trabaho, paagi sa pagtratar sa uban, ug dihang mag-inusara. Kita maningkamot sa pag-alagad  kang Jehova “sa bug-os nga kasingkasing.” (1 Cronicas 28:9) Ang maong pagsimba dili motugot sa kasingkasing nga nabahin o sa dobleng pagkinabuhi—ang pagpakaaron-ingnon nga nag-alagad kang Jehova samtang sekretong nagbuhat ug seryosong mga sala. Kon duna tay integridad, dili ta magpakaaron-ingnon; ang gugma motabang nato nga dumtan kana. Ang kahadlok sa Diyos makatabang usab. Gipakita sa Bibliya nga ang maong kahadlok nalangkit sa atong suod nga panaghigalaay kang Jehova.—Salmo 25:14.

18, 19. Nganong makaingon ta nga ang dili hingpit nga mga tawo makasundog gyod kang Jehova nga Diyos?

¹⁸ Ang kataposang kapitulo sa matag seksiyon niini nga publikasyon naghisgot kon unsaon nato ‘pagsundog ang Diyos, ingong minahal nga mga anak.’ (Efeso 5:1) Hinungdanon nga atong hinumdoman nga bisan pag kita dili hingpit, masundog gayod nato si Jehova sa iyang hingpit nga paagi sa paggamit sa gahom, pagpasundayag sa hustisya, paglihok nga maalamon, ug pagpakitag gugma. Giunsa nato pagkahibalo nga posible gayod nga masundog nato ang Labing Gamhanan? Hinumdomi nga ang kahulogan sa ngalan ni Jehova nagtudlo kanato nga mahimo siyang bisan unsa nga iyang gusto aron matuman ang iyang katuyoan. Angay kitang mahingangha sa maong katakos, apan imposible ba gayod nga kita makasundog kang Jehova? Dili.

¹⁹ Kita gibuhat diha sa larawan sa Diyos. (Genesis 1:26) Busa ang mga tawo lahi kay sa ubang linalang sa yuta. Molihok ta dili tungod sa kinaiyanhong katakos (o instinct), napanunod nga kinaiya, o sa impluwensiya sa mga tawo sa atong palibot. Si Jehova naghatag kanatog bililhong  gasa—ang kagawasan sa pagpili. Bisan pa sa atong mga limitasyon ug pagkadili-hingpit, kita may kagawasan sa pagpili kon unsa tang matanga sa tawo. Dugang pa, hinumdomi nga ang ngalan sa Diyos nagpasabot sab nga puwede niyang ipahinabo nga ang iyang mga alagad mahimong bisan unsa sumala sa iyang gusto. Busa gusto ba nimo nga mahimong mahigugmaon, maalamon, ug matarong nga tawo nga naggamit sa gahom sa hustong paagi? Sa tabang sa espiritu ni Jehova, mahimo gyod na nimo! Hunahunaa ang maayong butang nga imong mahimo tungod niana.

20. Unsang maayong butang ang atong mahimo dihang sundogon nato si Jehova?

²⁰ Mapalipay nimo ang kasingkasing sa imong langitnong Amahan. (Proverbio 27:11) Mahimo pa gani nga ‘bug-os nimong mapalipay’ si Jehova, kay siya nakasabot sa imong mga limitasyon. (Colosas 1:9, 10) Ug samtang magpadayon ka sa pag-ugmad sa maayong mga hiyas agig pagsundog sa imong minahal nga Amahan, makabaton kag talagsaong pribilehiyo. Diha sa ngitngit nga kalibotan nga nahimulag sa Diyos, mahimo kang tigdala sa kahayag. (Mateo 5:1, 2, 14) Masabwag nimo ang kahayag ngadto sa uban pinaagi sa pagsundog sa mahimayaong personalidad ni Jehova. Talagsaon gayod kana nga pribilehiyo!

21, 22. Unsa ang samag dili matapos nga biyahe ang mabatonan sa tanan nga nahigugma kang Jehova?

²¹ Ang simpleng pagdasig nga narekord sa Santiago 4:8 dili samag usa ka destinasyon. Kini samag usa ka biyahe. Basta magpabilin tang matinumanon, dili gayod matapos ang maong biyahe. Kita dili gayod mohunong sa pagpakigsuod kang Jehova. Sa pagkatinuod, daghan pa gyod  ang atong makat-onan bahin kaniya. Dili gayod kita magdahom nga kini nga publikasyon nagtudlo sa tanan nga angay natong masayran bahin kang Jehova. Ang tinuod, nagsugod pa lang kita sa paghisgot sa tanan nga gisulti sa Bibliya bahin sa atong Diyos! Ug bisan ang Bibliya wala maghisgot sa tanan nga puwede natong masayran bahin kang Jehova. Si apostol Juan nagtuo nga kon isulat ang tanan nga gibuhat ni Jesus panahon sa iyang ministeryo sa yuta, “ang kalibotan dili paigo nga kabutangan sa masulat nga mga linukot nga basahon.” (Juan 21:25) Kon tinuod kana bahin sa Anak, labaw na gyod kanang tinuod bahin sa Amahan!

²² Bisag mabuhi ta hangtod sa hangtod, dili matapos ang atong pagkat-on bahin kang Jehova. (Ecclesiastes 3:11) Busa hunahunaa ang atong madahom sa umaabot. Human sa pagkinabuhig ginatos, linibo, minilyon, bisan binilyong katuigan, mas daghan pa ang atong masayran bahin kang Jehova nga Diyos kay sa atong nasayran karon. Apan bation gihapon nato nga duna pay daghan kaayong kahibulongang mga butang nga ato pang makat-onan.  Ug gusto tang makakat-on ug dugang pa! Bation unya nato ang sama sa gibati sa salmista, kinsa miawit: “Maayo alang kanako ang pagduol sa Diyos.” (Salmo 73:28) Dili gayod mahanduraw kon unsa ka nindot ang kinabuhing walay kataposan—ug ang pagpakigsuod kang Jehova mao unya ang kinanindotang bahin niana.

23. Unsay determinado nimong buhaton?

²³ Hinaot balosan nimo ang gugma ni Jehova karon, pinaagi sa paghigugma kaniya sa tibuok nimong kasingkasing, kalag, hunahuna, ug kusog. (Marcos 12:29, 30) Hinaot ang imong gugma maunongon ug lig-on. Hinaot ang mga desisyon nga imong himoon sa matag adlaw, gikan sa kinagamyan ngadto sa kinadak-an, kanunayng giyahan sa imong tinguha nga makabaton ug mas lig-ong relasyon sa imong langitnong Amahan. Labaw sa tanan, hinaot nga kanunay kang makigsuod kang Jehova, ug hinaot nga kanunay siyang makigsuod kanimo—hangtod sa hangtod!