ANG mga tawo nagsimbag daghang diyos. Apan ang Balaang Kasulatan nagtudlo nga dunay usa lamang ka matuod nga Diyos. Siya supremo, walay kasama, ug walay kataposan. Siya ang naglalang sa tanang butang sa langit ug sa yuta, ug siya ang naghatag kanatog kinabuhi. Busa, siya lamang ang takos natong simbahon.

Ang Diyos adunay personal nga ngalan—JEHOVA. Ang Diyos nag-ingon kang Moises: “Kini ang imong isulti sa mga anak sa Israel, ‘Si Jehova nga Diyos sa inyong mga katigulangan, ang Diyos ni Abraham, ang Diyos ni Isaac ug ang Diyos ni Jacob, nagpadala kanako nganhi kaninyo.’ Kini ang akong ngalan hangtod sa panahong walay tino, ug kini ang handomanan kanako hangtod sa sunodsunod nga mga kaliwatan.” (Exodo 3:15) Ang ngalang Jehova makitag mga 7,000 ka beses diha sa Balaang Kasulatan. Ang Salmo 83:18 nag-ingon bahin sa Diyos, “ikaw, kansang ngalan mao si Jehova, ikaw lamang ang Labing Hataas ibabaw sa tibuok nga yuta.”

Walay tawo nga nakakita sukad sa Diyos. Ang Diyos nagsulti kang Moises: “Dili ka arang makakita sa akong nawong, tungod kay walay tawo nga makakita kanako ug mabuhi pa.” (Exodo 33:20) Ang Diyos nagpuyo sa langit ug dili makita ni bisan kinsang tawo. Busa sayop ang paghimo o pag-ampo sa usa ka idolo, larawan, o simbolo sa Diyos. Si Jehova nga Diyos nagsugo kang propeta Moises: “Dili ka magbuhat alang kanimo ug usa ka linilok nga larawan o usa ka dagway nga sama sa bisan unsa nga anaa sa kalangitan sa itaas o anaa sa yuta sa ubos o anaa sa mga tubig ilalom sa yuta. Dili ka magyukbo kanila ni maaghat sa pag-alagad kanila, tungod kay ako si Jehova nga imong Diyos maoy Diyos nga nagapangayo ug bug-os nga pagkamahinalaron.” (Exodo 20:2-5) Sa ulahi, pinaagi kang propeta Isaias, ang Diyos miingon: “Ako mao si Jehova. Kana ang akong ngalan; ug dili ko ihatag kang bisan kinsa ang akong kaugalingong himaya, ni ang akong pagdayeg ngadto sa kinulit nga mga larawan.”—Isaias 42:8.

Ang pipila ka tawo nagtuo sa Diyos apan lagmit naghunahuna sila nga Siya dili mailhan ug dili maduolan, ug nga Siya kahadlokan imbes higugmaon. Unsay imong hunahuna? Interesado ba ang Diyos kanimo? Mahimo ba nimo siyang mailhan, nga masuod pa gani kaniya? Atong susihon kon unsay giingon sa Kasulatan bahin sa mga hiyas sa Diyos.