SA WALA pa buhata ni Jehova nga Diyos ang yuta, iyang gilalang ang mga anghel sa langit. Apan sa ngadtongadto, usa ka anghel ang nagtinguha sa pagsimba nga angay lamang sa Diyos. Aron matuman ang iyang tinguha, siya naghimo sa iyang kaugalingon nga Satanas, nga nagkahulogang “Magsusupak,” ang usa nga misupak sa Diyos. Sa unsang paagi si Satanas misupak sa Diyos?

Gilingla ni Satanas si Eva sa dili pagsunod sa Diyos. Iyang gipasabot kang Eva nga may maayong butang nga gihikaw si Jehova nga Diyos pinaagi sa pagdili kaniya sa pagkaon sa bunga sa usa ka kahoy. Sa kawalay tahod, iyang gitawag ang Diyos nga bakakon ug gipatuo si Eva nga angay niyang isalikway ang giya sa Diyos, sa pag-ingon: “Nasayod ang Diyos nga sa mismong adlaw nga kamo mokaon gikan niini ang inyong mga mata mangabuka ug kamo mahisama sa Diyos, nga mahibalo sa maayo ug sa daotan.” (Genesis 3:5) Sa kahungog, si Eva mituo sa mga bakak ni Satanas. Iyang gisupak ang balaod sa Diyos ug gidani si Adan sa pagbuhat usab niana. Sukad niadto, si Satanas maoy kaaway sa tanang may tinuod nga pagtuo. Ug padayon niyang gilingla ang mga tawo hangtod karon. Sa unsang paagi?

Si Satanas migamit sa pagsimbag idolo ug sa tawhanong mga tradisyon sa pagtuis sa pagtuo sa mga anak sa Israel. Si Jesus, ang Mesiyas, miingon ngadto sa ilang relihiyosong mga pangulo nga tungod kay sila nagtudlo “sa mga sugo sa mga tawo ingon nga mga doktrina,” ang ilang pagsimba walay kapuslanan. (Mateo 15:9) Sa dihang ang maong nasod nagsalikway sa Mesiyas, ang Diyos nagsalikway kanila. Si Jesus miingon kanila: “Ang gingharian sa Diyos pagakuhaon gikan kaninyo ug igahatag ngadto sa usa ka nasod nga magpatunghag mga bunga niini.” (Mateo 21:43) Dayon, ang mga sumusunod ni Jesus maoy nahimong pinaborang katawhan sa Diyos.

Sunod, naningkamot si Satanas sa paglingla sa mga sumusunod ni Jesus. Milampos ba siya? Pinaagi sa usa ka ilustrasyon, gitagna ni Jesus kon unsay mahitabo. Diha sa ilustrasyon, may tawo nga nagpugas ug maayong trigo sa usa ka uma. Sa ulahi, usa ka kaaway ang nagpugas ug bunglayon taliwala sa mga trigo. Ang maong mga binhi gipasagdang motubo hangtod sa ting-ani. Unya, ang bunglayon gilain gikan sa mga trigo ug dayon gisunog. Apan ang trigo gitigom sa balay-tipiganan sa tag-iya.

Dayon, gisaysay ni Jesus sa iyang mga tinun-an ang kahulogan sa ilustrasyon. Siya mismo mao ang Magpupugas. “Mahitungod sa maayong binhi,” siya miingon, “kini sila mao ang mga anak sa gingharian; apan ang mga bunglayon mao ang mga anak sa usa nga daotan, ug ang kaaway nga nagpugas kanila mao ang Yawa. Ang pag-ani mao ang kataposan sa sistema sa mga butang, ug ang mga mag-aani mao ang mga manulonda [o mga anghel].” (Mateo 13:38, 39) Gipakasama ni Jesus ang iyang tinuod nga mga tinun-an sa trigo. Apan si Satanas nagpugas ug mini nga mga tinun-an, samag mga bunglayon, taliwala sa tinuod nga mga sumusunod ni Jesus. Busa ingon sa gitagna ni Jesus, paglabay sa ginatos ka katuigan human sa iyang kamatayon, motungha ang mini nga mga tinun-an. Kini sila nagtudlog bakak nga mga pagtulon-an, sama sa Trinidad, ang doktrina nga ang Diyos adunay tulo ka persona. Ang mini nga mga tinun-an nagsugod usab sa pagsimbag mga idolo ug nag-apil-apil sa politika.  Diyutay lamang ang nagpabiling masinundanon sa mga pagtulon-an ni Jesus.

Apan, sumala sa gipatin-aw ni Jesus, may mahitabo nga kausaban. Lainon unya sa mga anghel sa Diyos kadtong walay tinuod nga pagtuo aron laglagon. Unya, kadtong adunay tinuod nga pagtuo mas dali nga mailhan. Sa kataposan, si Satanas nga Yawa, ang orihinal nga kaaway sa pagtuo, pagalaglagon usab. Oo, ang tinuod nga pagtuo magmadaogon gayod!

Apan, sa unsang paagi nimo mailhan ang mga tawo nga may tinuod nga pagtuo karon? Ang tubag niini ang sunod natong hisgotan.