Konklusyon
“Mahimong mga tigsundog kanila nga pinaagi sa pagtuo ug pailob nagapanunod sa mga saad.”—HEBREOHANON 6:12.
1, 2. Nganong hinungdanon karon ang pagbaton ug pagtuo? Iilustrar.
PAGTUO. Nindot kini nga pulong, nga nagtumong sa usa ka madanihon kaayong hiyas. Apan, dihang madunggan o mabasahan nato kanang pulonga, maayong hunahunaon sab nato ang lain pang pulong: “Dinalian!” Kay kon wala kitay pagtuo, kinahanglang molihok dayon kita aron makabaton niini. Ug kon duna na kitay pagtuo, kinahanglan nato kining panalipdan ug palig-onon. Ngano?
2 Hunahunaa nga nagpanaw ka sa lapad kaayong desyerto. Nagkinahanglan na kaayo kag tubig. Dihang nakakuha ka na niini, ampingan gyod nimo kini nga dili mabulad sa adlaw. Ug kinahanglang dugangan nimo kini aron dili ka mahutdan hangtod nga makaabot ka sa imong destinasyon. Karon, kita nagpuyo sa espirituwal nga desyerto, usa ka kalibotan diin ang tinuod nga pagtuo—sama sa tubig—nihit ug mahimong mawala dayon kon dili madugangan ug maampingan. Gikinahanglan gayod nato kini; maingon nga dili kita mabuhi kon walay tubig, dili usab kita mabuhi sa espirituwal kon walay pagtuo.—Roma 1:17.
3. Unsang tabang ang gitagana ni Jehova aron makabaton kitag pagtuo, ug unsa ang duha ka butang nga kinahanglan natong buhaton?
3 Nahibalo si Jehova nga gikinahanglan gayod nato ang pagtuo, ug nasayod siya kon unsa ka lisod ang paghupot niana karon. Mao nay rason nga siya nagtaganag mga panig-ingnan nga atong masundog. Giinspirar ni Jehova si apostol Pablo sa pagsulat: “Mahimong mga tigsundog kanila nga pinaagi sa pagtuo ug pailob nagapanunod sa mga saad.” (Heb. 6:12) Tungod niana, ang organisasyon ni Jehova nagdasig kanato nga maningkamot sa pagsundog sa panig-ingnan sa matinumanong mga lalaki ug babaye, sama sa ato nang nahisgotan. Busa, unsay angay natong buhaton? Hinumdoman nato kining duha ka butang: (1) Kinahanglan nga padayon natong lig-onon ang atong pagtuo; (2) kinahanglang huptan natong buhi sa hunahuna ang atong paglaom.
4. Nganong ikaingon nga si Satanas kaaway sa pagtuo, apan nganong dili kita angayng mahadlok?
4 Padayong lig-ona ang imong pagtuo. Ang pagtuo may dakong kaaway—si Satanas. Gihimo sa magmamando sa kalibotan kining sistemaha sa mga butang nga morag desyerto diin lisod ang paghupot ug pagtuo. Mas gamhanan siya kay kanato. Angay ba kitang mahadlok nga basin dili nato maugmad ug mapalig-on ang atong pagtuo? Dili gayod! Si Jehova ang kinamaayohang Higala sa tanan nga gustong makabatog tinuod nga pagtuo. Siya nagpasalig nato nga sa Iyang tabang, atong masuklan ang Yawa, ug mahimo pa gani kining mokalagiw gikan kanato! (Sant. 4:7) Mahimo nato kini pinaagi sa pagpalig-on sa atong pagtuo adlaw-adlaw. Sa unsang paagi?
5. Sa unsang paagi ang matinumanong mga lalaki ug babaye sa Bibliya nakabatog pagtuo? Ipatin-aw.
5 Sa ato nang nakita, ang matinumanong mga lalaki ug babaye sa Bibliya wala matawo nga may pagtuo. Gipamatud-an sa ilang pagkinabuhi nga ang pagtuo maoy usa ka hiyas nga gipatungha sa balaang espiritu ni Jehova. (Gal. 5:22, 23) Sila nag-ampo alang sa tabang, ug si Jehova padayong naglig-on sa ilang pagtuo. Mao usab kanay atong himoon, ug dili gayod nato kalimtan nga si Jehova dagayang mohatag sa iyang espiritu niadtong mangayo niini ug molihok uyon sa ilang pag-ampo. (Luc. 11:13) Unsa pay lain natong himoon?
6. Sa unsang paagi kita bug-os makabenepisyo sa atong pagtuon sa mga asoy sa Bibliya?
6 Niining libroha, nahisgotan nato ang pipila lang ka maayong panig-ingnan sa pagtuo. Aduna pay daghan! (Basaha ang Hebreohanon 11:32.) Daghan kitag makat-onan sa matag usa kanila diha sa atong personal nga pagtuon. Kon kita magdalidali lag basa sa mga asoy sa Bibliya bahin kanila, dili gayod nato mapalig-on ang atong pagtuo. Aron bug-os makabenepisyo sa atong pagbasa, kita kinahanglang maggahin ug panahon sa pagsusi sa konteksto ug sa uban pang detalye sa mga asoy sa Bibliya. Kon kanunay natong hinumdoman nga kadtong dili-hingpit nga mga lalaki ug babaye “may pagbati nga sama kanato,” ang ilang panig-ingnan mahimong tinuod gayod kanato. (Sant. 5:17) Bation usab nato kon unsay ilang gibati dihang nag-atubang silag kalisdanan ug mga problema nga sama sa atong gisagubang karon.
7-9. (a) Unsa kahay pagbati sa matinumanong mga lalaki ug babaye sa Bibliya bahin sa pagsimba kang Jehova sama sa atong gihimo karon? (b) Nganong angay natong palig-onon ang atong pagtuo pinaagi sa mga buhat?
7 Mapalig-on usab nato ang atong pagtuo pinaagi sa atong mga buhat, kay “patay ang pagtuo nga walay binuhatan.” (Sant. 2:26) Handurawa ang kalipay nga bation sa mga lalaki ug babaye nga gihisgotan nato kon isugo kanila ang buluhaton nga sama sa gipabuhat ni Jehova kanato karon!
8 Pananglitan, unsa kaha kon giingnan si Abraham nga makasimba siya kang Jehova, dili diha sa mga halarang bato sa kamingawan, kondili kauban sa organisadong grupo sa mga isigkamagtutuo diha sa nindot nga mga Kingdom Hall ug sa dagkong kombensiyon, diin ang mga saad nga iya lang nakita kaniadto “sa halayo” gihisgotan ug gipatin-aw sa detalyadong paagi? (Basaha ang Hebreohanon 11:13.) Ug unsa kaha kon giingnan si Elias nga ang iyang buluhaton, dili ang pagpatay sa mga propeta ni Baal samtang siya nag-alagad kang Jehova ubos sa pagmando sa daotan nga apostatang hari, kondili ang malinawong pagduaw sa mga tawo aron ihatod ang mensahe sa paghupay ug paglaom? Dili kaha dawaton dayon sa matinumanong mga lalaki ug babaye sa Bibliya ang asaynment sa pagsimba kang Jehova sama sa atong gihimo karon?
9 Busa padayon natong lig-onon ang atong pagtuo pinaagi sa mga buhat. Sa paghimo niana, atong masundog ang panig-ingnan sa matinumanong mga lalaki ug babaye nga anaa sa Bibliya. Sama sa gihisgotan sa Introduksiyon, mas masuod kita kanila ingong mga higala. Ug sa dili na madugay, personal na nato silang mahimong higala.
10. Unsang kalipay ang atong masinati sa Paraiso?
10 Hupting buhi sa hunahuna ang imong paglaom. Ang matinumanong mga lalaki ug babaye napalig-on kanunay sa paglaom nga gihatag sa Diyos kanila. Ikaw ba usab? Pananglitan, handurawa ang bationg kalipay nga mahimamat ang matinumanong mga alagad sa Diyos sa “pagkabanhaw sa mga matarong.” (Basaha ang Buhat 24:15.) Unsay gusto nimong ipangutana kanila?
11, 12. Sa bag-ong kalibotan, unsay lagmit nimong ipangutana kang (a) Abel? (b) Noe? (c) Abraham? (d) Ruth? (e) Abigail? (f) Ester?
11 Kon mahimamat nimo si Abel, pangutan-on ba nimo siya bahin sa iyang mga ginikanan? O kaha mangutana ka: “Naestorya ba nimo ang mga kerubin nga nagbantay sa Eden? Mitubag ba sila?” Makapangutana sab ka kang Noe: “Nahadlok ka ba sa mga Nepilim? Giunsa nimo pag-atiman ang tanang mananap sa arka sulod sa usa ka tuig? Kon makita nimo si Abraham, lagmit mangutana ka: “Nagkita ba mo ni Sem? Kinsay nagtudlo nimo bahin kang Jehova? Nalisdan ba ka sa pagbiya sa Ur?”
12 Hayan gusto sab nimong mangutana sa binanhaw nga matinumanong mga babaye. “Ruth, unsay nakadani nimo nga mahimong magsisimba ni Jehova?” “Abigail, nahadlok ba ka sa pagsulti kang Nabal nga imong gitabangan si David?” “Ester, unsay nahitabo nimo ug ni Mardokeo pagkahuman sa asoy sa Bibliya bahin kaninyo?”
13. (a) Unsay lagmit ipangutana kanimo sa mga binanhaw? (b) Unsay imong pagbati bahin sa paglaom nga mahimamat ang matinumanong mga lalaki ug babaye sa karaang panahon?
13 Siyempre, ang maong mga lalaki ug babaye lagmit daghan sab ug ipangutana kanimo. Makalilipay gayod ang pagsulti kanila bahin sa kataposang mga adlaw ug kon sa unsang paagi gipanalanginan ni Jehova ang iyang katawhan sa malisod nga panahon! Walay duhaduha nga sila matandog gayod kon giunsa pagtuman ni Jehova ang tanan niyang saad. Niana unyang panahona, dili na kita maglisod paghanduraw sa maunongong mga alagad sa Diyos nga gihisgotan sa Bibliya kay sila kauban na nato, sa Paraiso! Busa himoa ang tanan sa pagsinati kanila aron mahimo silang tinuod kanimo. Padayong sundoga ang ilang pagtuo. Hinaot magmalipayon ka sa pag-alagad kang Jehova uban kanila ingong suod nimong mga higala hangtod sa hangtod!
