Daghan ang nag-ingon nga nagtuo sila sa Diyos. Pero kon pangutan-on kon kinsa ang Diyos, lainlain silag tubag. Para sa pipila, ang Diyos way kaluoy ug gusto lang mosilot sa mga tawo sa ilang sayop. Para sa uban, siya mahigugmaon ug mapinasayloon, bisag unsa pay ilang himoon. Pero duna poy nagtuo nga ang Diyos layo kaayo ug dili interesado nato. Base niining lainlaing opinyon, daghan tingali ang mibati nga imposibleng mailhan ang Diyos.

Importante ba nga makaila ka sa Diyos? Oo. Kon mas mailhan nimo ang Diyos, makahatag nag katuyoan ug kaayohan sa imong kinabuhi. (Buhat 17:26-28) Kon mas masuod ka sa Diyos, mas higugmaon ug tabangan ka niya. (Santiago 4:8) Labaw sa tanan, ang pagbaton ug tukmang kahibalo bahin sa Diyos motultol sa kinabuhing walay kataposan.—Juan 17:3.

Unsaon nimo pagkaila sa Diyos? Paghunahunag tawo nga nailhan nimo pag-ayo, usa ka suod nga higala. Nganong nahimo mong higala? Tingali nahibaloan nimo ang iyang ngalan, mga hiyas, mga gusto ug dili gusto, iyang mga nahimo ug planong himoon, ug uban pa. Ikaw nasuod sa maong tawo kay nailhan na nimo siya.

Kita makaila pod sa Diyos kon sayron nato ang tubag sa mga pangutanang:

• UNSAY NGALAN SA DIYOS?

• UNSAY IYANG MGA HIYAS?

• UNSAY MGA NAHIMO SA DIYOS?

• UNSAY IYANG HIMOON?

• UNSAY KAAYOHAN KON MAILHAN NIMO ANG DIYOS?

Kini nga magasin motubag nianang mga pangutanaha base sa Bibliya. Ang mga artikulo makatabang nimo dili lang aron makaila sa Diyos kondili mahibalo sab sa mga kaayohan samtang masuod ka kaniya.