Kon naa kay gustong makaila, ang una tingali nimong himoon mao ang pagpangutana, “Unsay imong ngalan?” Kon pangutan-on nimo ang Diyos niana, unsa kahay iyang tubag?

“Ako si Jehova. Kana ang akong ngalan.”—Isaias 42:8.

Importante sa Diyos ang iyang ngalan. Walay naghatag sa Diyos sa iyang ngalan; siya mismo ang mipili niini. Si Jehova miingon: “Kini ang akong ngalan hangtod sa hangtod, ug pinaagi niining ngalana nga ako pagahinumdoman sa sunodsunod nga henerasyon.” (Exodo 3:15) Sa Bibliya, mas kadaghan makita ang ngalan sa Diyos kay sa iyang mga titulo, sama sa Labing Gamhanan, Amahan, Ginoo, o Diyos, ug mas kadaghan sab makita kay sa ubang personal nga ngalan, sama sa Abraham, Moises, David, o Jesus. Gusto sab ni Jehova nga mailhan ang iyang ngalan. Ang Bibliya nag-ingon: “Ang katawhan makaila unta nga ikaw, kansang ngalan maoy Jehova, ikaw lamang ang Labing Hataas ibabaw sa tibuok yuta.”—Salmo 83:18.

Importante kang Jesus ang maong ngalan. Sa pag-ampo nga gitawag ug Amahan Namo o Pag-ampo sa Ginoo, gitudloan ni Jesus ang iyang mga sumusunod nga moampo sa Diyos pinaagi niining mga pulonga: “Balaanon unta ang imong ngalan.” (Mateo 6:9) Si Jesus mismo miampo sa Diyos: “Amahan, himayaa ang imong ngalan.” (Juan 12:28) Prayoridad ni Jesus ang paghimaya sa ngalan sa Diyos, mao nga miingon siya sa iyang pag-ampo: “Akong gipaila kanila ang imong ngalan ug padayon pa kining ipaila.”—Juan 17:26.

Importante niadtong nakaila sa Diyos ang maong ngalan. Nasabtan sa katawhan sa Diyos kaniadto nga ang ilang proteksiyon ug kaluwasan konektado sa talagsaong ngalan sa Diyos. “Ang ngalan ni Jehova maoy lig-ong torre. Didto modagan ang matarong ug siya mapanalipdan.” (Proverbio 18:10) “Ang matag  usa nga motawag sa ngalan ni Jehova maluwas.” (Joel 2:32) Gipakita sa Bibliya nga kadtong nag-alagad sa Diyos mailhan pinaagi sa iyang ngalan. “Kay ang tanang katawhan maglakaw, ang tagsatagsa sa ngalan sa iyang diyos, apan kita maglakaw sa ngalan ni Jehova nga atong Diyos hangtod sa kahangtoran.”—Miqueas 4:5; Buhat 15:14.

Kini lang ang ngalan nga nagpaila kon kinsa ang Diyos. Daghang eskolar ang miingon nga ang ngalang Jehova nagkahulogang “Siya Nagpahinabo nga Mamao.” Si Jehova naghatag ug ideya sa kahulogan sa iyang ngalan dihang gihisgotan niya ang iyang kaugalingon ngadto kang Moises pinaagi niining mga pulonga: “Mahimo Kong Bisan Unsa nga Gusto Nako.” (Exodo 3:14) Busa ang ngalan sa Diyos wala lang magpaila kaniya ingong Maglalalang nga naghimo sa tanang butang. Ang iyang ngalan nagpakita nga kaya niyang himoon ang iyang kaugalingon ug ang iyang linalang nga mahimong bisan unsa nga gikinahanglan aron matuman ang iyang katuyoan. Ang mga titulo sa Diyos nagpaila sa iyang posisyon, awtoridad, o gahom, pero ang iya lang ngalan nga Jehova ang nagrepresentar kon kinsa gyod siya ug kon unsay iyang mahimo.

Ang maong ngalan nagpaila nga interesado nato ang Diyos. Ang kahulogan sa ngalan sa Diyos nagpakita nga kanunay niyang gimahal ang iyang linalang, apil na ta. Dugang pa, kay gipaila sa Diyos ang iyang ngalan, kana nagpakita nga gusto niyang mailhan nato siya. Gani siya mismo ang nagpaila sa iyang ngalan kanato, bisan sa wala pa ta mahibalo nga puwede diay nato ning mailhan. Busa gusto sa Diyos nga isipon nato siya ingong tinuod nga Persona nga puwede natong masuod, dili ingong bathala nga misteryoso ug lisod duolon.—Salmo 73:28.

Ang paggamit sa ngalan sa Diyos nagpakita nga interesado ta niya. Sa pag-ilustrar, tingali hangyoon nimo ang gusto nimong mahigala nga tawgon ka sa imong ngalan. Unsay imong bation kon dili gyod ka niya tawgon sa imong ngalan? Sa ulahi makaingon ka nga morag dili niya gustong magkasuod mo. Ingon sab niana sa Diyos. Gisulti ni Jehova sa mga tawo ang iyang ngalan, ug gusto niya nga gamiton nato kini. Kon buhaton nato kana, atong gipakita kang Jehova nga gusto natong masuod kaniya. Iya pa ganing mamatikdan bisan kadtong “nagapamalandong sa iyang ngalan.”—Malaquias 3:16.

Ang pagkahibalo sa ngalan sa Diyos mao ang unang importanteng paagi aron mailhan siya. Pero dili lang diha kutob. Kinahanglan natong susihon kon kinsa gyod siya. Kinahanglan natong mailhan ang iyang mga hiyas.