Gipakita sa miaging mga artikulo nga hapit nang taposon sa Diyos ang dili diyosnong mga tawo, apil na ang tanang problema. Makaseguro ta nga mahitabo gyod ni. Ngano? Kay ang Pulong sa Diyos, ang Bibliya, nagsaad:

“Ang kalibotan nagakahanaw.”—1 JUAN 2:17.

Makaseguro ta nga dunay maluwas kay ang teksto nagsaad sab:

“Siya nga nagabuhat sa kabubut-on sa Diyos magpabilin hangtod sa hangtod.”

Busa, kinahanglan natong buhaton ang kabubut-on sa Diyos aron maluwas. Aron mahibalo kon unsa ang kabubut-on sa Diyos, kinahanglang makaila una ta niya.

Si Jesus miingon: “Aron ilang mabatonan ang kinabuhing walay kataposan, kinahanglan silang makaila kanimo, ang bugtong matuod nga Diyos.” (Juan 17:3) Aron maluwas ug mabuhi hangtod sa hangtod, kinahanglang “makaila” ta sa Diyos. Nagpasabot ni nga dili lang kay basta motuo ta nga dunay Diyos o naa tay nahibaloan bahin niya. Kinahanglang mahimo tang iyang mga higala. Sama nga mogahin tag panahon sa atong mga higala aron masuod ta kanila, kinahanglang mogahin pod tag panahon aron masuod ta sa Diyos. Konsideraha ang pipila ka importanteng kamatuoran diha sa Bibliya nga makatabang nato sa pagbaton ug pagmentinar ug suod nga relasyon sa Diyos.

Regular tang mokaon aron magpabiling buhi. Pero si Jesus miingon: “Ang tawo mabuhi, dili sa tinapay lamang, kondili sa matag pulong nga magagula sa baba ni Jehova.”—Mateo 4:4.

Karon, atong mabasa ang mga pulong ni Jehova diha sa Bibliya. Samtang imong tun-an kining sagradong basahon, imong makat-onan ang importanteng mga kamatuoran kon unsay gihimo sa Diyos sa miagi, sa iyang ginahimo karon, ug sa iyang himoon sa umaabot.

Unsay imong himoon kon gusto nimong sundon ang Diyos pero nalisdan ka sa paghunong sa mga buhat nga iyang giingon nga sayop? Makatabang nimo kon mailhan nimo pag-ayo ang Diyos.

Tagda pananglitan ang babaye nga tawgon natog Sakura. Imoral siyag kinabuhi kaniadto. Dihang nagtuon siyag Bibliya, iyang nakat-onan ang sugo sa Diyos nga “kalagiw gikan sa seksuwal nga imoralidad.” (1 Corinto 6:18) Nag-ampo siya sa Diyos alang sa kusog ug nahunong niya kining daotang buhat. Pero kinahanglan gihapon niyang suklan ang mga tentasyon. “Kon makahunahuna kog imoral,” siya miingon, “moampo ko kang Jehova kay nahibalo ko nga dili nako ni masuklan sa kaugalingon lang nga paningkamot. Tungod sa pag-ampo, mas nasuod ko kang Jehova.” Sama ni Sakura, minilyon na ang nakaila sa Diyos. Siya naghatag kanilag kusog nga gikinahanglan aron magbag-o ug magkinabuhi sa paagi nga makapalipay niya.—Filipos 4:13.

Dihang mas mailhan nimo ang Diyos, mas ilhon ka niya ingong iyang minahal nga higala. (Galacia 4:9; Salmo 25:14) Dayon maluwas ka ug makapuyo sa bag-ong kalibotan sa Diyos. Unsa unyay kahimtang sa bag-ong kalibotan? Ipakita kana sa mosunod nga artikulo.