Sa dili madugay, ang bag-ong gobyerno sa Diyos sa langit magmando sa tanang katawhan. Makapalipay unya ang kinabuhi sa yuta nianang panahona. Ang mga tawo may kalinaw ug panaghiusa ug ang tanan dunay maayo ug makapalipay nga trabaho. Si Jesu-Kristo ang gitudlo sa Diyos nga magmando sa tibuok yuta. Dili sama sa daghang magmamando karon, kanunayng himoon ni Jesus kon unsay makaayo sa iyang mga sakop. Sa iyang pagmando, siya kanunayng magpakitag gugma, ug makasalig ta nga siya buotan, maluluy-on, ug patas nga Hari.—Isaias 11:4.

Ang mga tawo sa tibuok yuta dili na magkabahinbahin tungod sa nasod o rasa. Ang katawhan magkahiusa na. (Pinadayag 7:9, 10) Ang tanang tawo sa yuta magmahal sa Diyos ug sa ilang isigkatawo, ug sila malinawong magtinabangay sa pagtuman sa orihinal nga katuyoan sa Diyos nga atimanon ang ilang puy-anan, ang yuta.—Salmo 115:16.

Dihang magmando na sa yuta ang Gingharian sa Diyos, bug-os na niyang kontrolahon ang klima aron dili na kini magpahinabog kadaot. (Salmo 24:1, 2) Sa dinhi pa si Jesus sa yuta, dali ra niyang gipahunong ang kusog kaayo nga unos, nga nagpakita sa gahom nga gihatag sa Diyos kaniya. (Marcos 4:39, 41) Ubos sa pagmando sa Kristo, mawala na ang mga kalamidad nga gikahadlokan sa mga tawo. Dihang magmando na ang Gingharian sa Diyos, ang mga tawo magpuyo na nga malinawon uban sa mga hayop ug dili na magpahinabog kadaot sa kinaiyahan.—Oseas 2:18.

Ang tanan hingpit nag panglawas. Wala nay masakit, matigulang, o mamatay. (Isaias 35:5, 6) Ang mga tawo mag-enjoy sa nindot ug hinlo nga palibot sama sa nasinatian ni Adan ug Eva sa hardin sa Eden. Sa bag-ong kalibotan, sama sa Eden, ang yuta magpatunghag abundang pagkaon ug ang tanang tawo matagbaw. (Genesis 2:9) Sama sa karaang nasod sa Diyos nga mao ang Israel, ang tanan sa Paraiso makapahimulos ug ‘abundang pagkaon.’—Levitico 26:4, 5.

Ubos sa gobyerno sa Diyos, ang tanang tawo duna nay kalinaw ug sila patas ug maayog pagtratar sa usag usa. Wala nay gubat, pag-abuso sa gahom, ug kakabos. Ang Bibliya nagsaad: “Sila manglingkod, ang tagsatagsa ilalom sa iyang punoan sa ubas ug sa iyang kahoyng igos, ug walay usa nga makapahadlok kanila.”—Miqueas 4:3, 4.

Ang matag pamilya dunay kaugalingong balay ug dili mahadlok nga mawala kana. Ang tanan natong himoon makapalipay nato. Sama sa giingon sa Bibliya, kadtong magpuyo sa bag-ong kalibotan sa Diyos ‘dili maghago sa wala lamay kapuslanan.’—Isaias 65:21-23.

Ang Bibliya nagsaad: “Ang yuta mapuno gayod sa kahibalo bahin kang Jehova.” (Isaias 11:9) Ang mga tawo nga magkinabuhi ubos sa Gingharian sa Diyos makakat-on sa dakong kaalam sa ilang Maglalalang, si Jehova, ug sa nindot nga mga butang nga iyang gibuhat. Dili nila gamiton ang ilang kahibalo sa paghimog armas o sa pagpahinabog kadaot sa uban. (Isaias 2:4) Hinuon, makakat-on sila kon unsaon pagkinabuhi nga may malinawong relasyon sa uban ug sa pag-atiman sa yuta.—Salmo 37:11.

Giandam pag-ayo sa Diyos ang yuta aron bug-os tang malipay kada adlaw. Katuyoan niya nga ang mga tawo mabuhi sa yuta hangtod sa hangtod. (Salmo 37:29; Isaias 45:18) Aron maposible kini, “lamyon [sa Diyos] ang kamatayon hangtod sa hangtod.” (Isaias 25:8) “Ang kamatayon mawala na, ug wala na unyay pagbangotan, pagtiyabaw, ug kasakit,” ang Bibliya nagsaad. (Pinadayag 21:4) Hatagan sa Diyos ang tanang tawo ug kahigayonan nga mabuhi hangtod sa hangtod, nga naglakip niadtong iyang luwason sa dihang laglagon niya kining daotang kalibotan ug niadtong iyang banhawon sa umaabot nga bag-ong kalibotan.—Juan 5:28, 29; Buhat 24:15.

 Minilyon karon sa tibuok kalibotan ang nangandam na sa pagkinabuhi ubos sa Gingharian sa Diyos nga hapit na kaayong moabot. Bisag dili hingpit, naningkamot sila nga mahimong klase sa tawo nga gusto sa Diyos nga papuy-on sa iyang bag-ong kalibotan. Sa unsang paagi? Pinaagi sa pagkat-on bahin kang Jehova nga Diyos ug sa iyang gipadala, si Jesu-Kristo.—Juan 17:3.

Sayra pag dugang kon unsaon nga maluwas ka sa kataposan niining kalibotana ug makapuyo sa mas maayong kalibotan nga hapit nang moabot. Dawata ang libreng interactive nga pagtuon sa Bibliya sa mga Saksi ni Jehova, gamit ang librong Mabuhi Ka Hangtod sa Hangtod!