Makakat-on Ta Bahin sa Diyos Gikan sa Iyang mga Propeta
Sa karaang panahon, gihatagan sa Diyos ang iyang mga propeta ug importanteng mga mensahe para sa katawhan. Unsay atong makat-onan sa Diyos gikan sa iyang mga propeta? Sayra kon unsay atong makat-onan sa tulo ka matinumanong propeta.
ABRAHAM
Ang Diyos dili mapihigon ug gusto niyang panalanginan ang tanang tawo.
Ang Diyos nagsaad kang propetang Abraham: “Ang tanang banay sa yuta seguradong mapanalanginan pinaagi kanimo.”—Genesis 12:3.
Unsay atong makat-onan? Gimahal ta pag-ayo sa Diyos ug gusto niyang panalanginan ang tanang pamilya—mga lalaki, babaye, ug bata—nga masinugtanon kaniya.
MOISES
Ang Diyos maluluy-on ug panalanginan niya kadtong naningkamot nga makaila kaniya.
Gihatagan sa Diyos si Moises ug gahom sa paghimog dagkong milagro. Pero si Moises miampo: “Palihog pahibaloa ko sa imong mga dalan, aron mailhan ti ka ug padayon ko nimong uyonan.” (Exodo 33:13) Ang Diyos nalipay sa hangyo ni Moises ug Iyang gipanalanginan siya pinaagi sa paghatag kaniyag dugang kahibalo bahin sa Iyang mga paagi ug mga hiyas. Pananglitan, nakat-onan ni Moises nga ang Maglalalang usa ka “Diyos nga maluluy-on ug mabination.”—Exodo 34:6, 7.
Unsay atong makat-onan? Gusto sa Diyos nga panalanginan tang tanan—mga lalaki, babaye, ug bata—kon maningkamot ta nga mas mailhan siya. Iyang gipadayag sa Balaang Kasulatan kon unsaon nato siya pagsimba, kon unsa ta niya ka mahal, ug nga gusto ta niyang panalanginan.
JESUS
Tungod sa kaluoy, giayo ni Jesus ang tanang klase sa sakit
Madawat nato ang walay kataposang panalangin sa Diyos kon mokat-on ta bahin kang Jesus ug sa iyang gihimo ug gitudlo.
Ang Pulong sa Diyos dunay daghang detalye bahin sa kinabuhi ni Jesus ug sa iyang gitudlo. Gihatagan sa Diyos si Jesus ug gahom sa paghimog daghang milagro, sama sa pag-ayog mga buta, amang, ug baldado. Nagbanhaw pa gani siyag mga patay. Ang gihimo ni Jesus nagpakita kon unsang mga panalangin ang ihatag sa Diyos sa tanang tawo sa umaabot. Iyang gisulti kon unsay atong himoon aron madawat ang maong mga panalangin: “Aron ilang mabatonan ang kinabuhing walay kataposan, kinahanglan silang makaila kanimo, ang bugtong matuod nga Diyos, ug sa imong gipadala, si Jesu-Kristo.”—Juan 17:3.
Si Jesus maluluy-on, mahigugmaon, ug buotan. Mailhan ni diha sa iyang pagdapit sa mga tawo: “Pagkat-on gikan kanako kay ako malumo ug mapainubsanon, ug kamo mobatig kahayahay.” (Mateo 11:29) Tungod niana, ang mga lalaki ug babaye, bata ug tigulang, ganahang moduol niya. Sa panahon ni Jesus, gimaltratar sa uban ang mga babaye, pero lahi si Jesus kay iyang gimahal, girespeto, ug gipakitaag dignidad ang mga babaye.
Unsay atong makat-onan? Gimahal pag-ayo ni Jesus ang mga tawo, ug nagpakita siyag maayong ehemplo kon unsaon nato pagtratar ang usag usa.
SI JESUS DILI MAO ANG DIYOS
Ang Balaang Kasulatan nagtudlo nga “sa pagkatinuod dunay usa lang ka Diyos” ug si Jesus maoy mapainubsanong mensahero sa Diyos. (1 Corinto 8:6) Klarong giingon ni Jesus nga ang Diyos labaw kay kaniya ug gipadala siya sa Diyos dinhi sa yuta.—Juan 11:41, 42; 14:28. *
^ par. 17 Aron mahibalog dugang bahin kang Jesu-Kristo, tan-awa ang seksiyon 8 ug 9 sa brosyur nga Tinuod nga Pagtuo—Imong Yawi sa Malipayong Kinabuhi sa www.dan124.com/ceb.
Basin Ganahan Pod Ka
TINUOD NGA PAGTUO—IMONG YAWI SA MALIPAYONG KINABUHI
Ang Gisaad sa Diyos Pinaagi sa mga Propeta
Mga panalangin para sa tanang nasod sa yuta!
TUBAG SA MGA PANGUTANA BAHIN SA BIBLIYA
Si Jesus ba ang Labing Gamhanan nga Diyos?
Unsay giingon ni Jesus bahin sa iyang posisyon kon itandi sa Diyos?
