Gipakita sa Bibliya nga aron matuman ang kabubut-on sa Diyos, may mga higayon nga gipanalipdan sa mga anghel ang matuod nga mga magsisimba. (Salmo 34:7) Pananglitan:

• Dihang gilaglag ni Jehova ang daotang mga siyudad sa Sodoma ug Gomora, gitabangan sa mga anghel ang matarong nga si Lot ug ang iyang pamilya sa pag-ikyas.​—Genesis 19:1, 15-26.

• Sa karaang Babilonya dihang ang tulo ka batan-ong Hebreohanon gitambog ngadto sa nagkalayong hudno, ang Diyos “nagpadala sa iyang manulonda ug nagluwas sa iyang mga alagad.”​—Daniel 3:19-28.

• Paglabayg usa ka gabii diha sa gahong sa gigutom nga mga leyon, ang matarong nga si Daniel miingon nga wala siya tukba kay ‘ang Diyos nagpadala sa iyang manulonda ug nagtak-om sa baba sa mga leyon.’​—Daniel 6:16, 22.

Dihay mga panahon nga ang mga anghel nga mga mensahero sa Diyos mitabang sa mga buluhaton sa unang Kristohanong kongregasyon alang sa katumanan sa katuyoan ni Jehova. Pananglitan:

• Gibuksan sa usa ka anghel ang mga ganghaan sa bilanggoan ug gisugo ang nabilanggong mga apostoles sa pagpadayon sa pagsangyaw diha sa templo.​—Buhat 5:17-21.

• Gipaadto sa usa ka anghel ang ebanghelisador nga si Felipe sa usa ka dalan sa desyerto nga nagtadlas sa Jerusalem paingon sa Gaza, ug gisugo siya nga sangyawan ang Etiopianhon nga miadto sa Jerusalem aron sa pagsimba.​—Buhat 8:26-33.

• Dihang miabot na ang gitakdang panahon sa Diyos nga mahimong Kristohanon ang mga dili Hudiyo, usa ka anghel nagpakita pinaagig panan-awon ngadto sa opisyal sa Romanong kasundalohan nga si Cornelio ug nagsugo kaniya sa pagpatawag kang apostol Pedro.​—Buhat 10:3-5.

• Sa gibilanggo si apostol Pedro, usa ka anghel nagpakita niya ug gitabangan siya sa paggawas sa bilanggoan.​—Buhat 12:1-11.

Walay pamatuod nga ang Diyos naggamit karon ug mga anghel sa pagtabang sa mga tawo sa milagrosong paagi nga sama nianang giingon sa Bibliya. Pero bahin sa atong panahon, si Jesus miingon: “Kining maayong balita sa gingharian igawali sa tibuok gipuy-ang yuta ingon nga pagpamatuod ngadto sa tanang kanasoran; ug unya moabot ang kataposan.” (Mateo 24:14) Nahibalo ka ba nga ang mga disipulo ni Kristo nagsangyaw ubos sa paggiya sa mga anghel?

Gipakita sa basahon sa Pinadayag nga ang mga anghel magkugi sa pagtabang sa mga tawo sa tibuok kalibotan sa pagkat-on bahin kang Jehova nga Diyos ug sa iyang katuyoan alang sa katawhan. Si apostol Juan misulat: “Nakita ko ang laing manulonda nga naglupad sa kinatung-an sa langit, ug siya adunay walay kataposang maayong balita nga ipahayag ingong makapalipay nga balita ngadto sa nanagpuyo sa yuta, ug ngadto sa matag nasod ug tribo ug pinulongan ug katawhan, nga sa makusog nga tingog nagaingon: ‘Kahadloki ninyo ang Diyos ug ihatag kaniya ang himaya, kay ang takna sa iyang paghukom miabot na, ug busa simbaha ninyo ang Usa nga maoy naghimo sa langit ug sa yuta ug sa dagat ug sa mga tuboran sa mga tubig.’” (Pinadayag 14:6, 7) Daghang kasinatian nagpamatuod nga ang mga anghel nagpaluyo sa tibuok kalibotang pagsangyaw sa Gingharian. Sa pagkatinuod, bisag usa lang ka makasasala ang maghinulsol ug mobalik kang Jehova, ang mga anghel sa Diyos manghugyaw sa kalipay.​—Lucas 15:10.

Unsay mahitabo kon matapos na ang buluhatong pagsangyaw? Niana unyang panahona ang mga anghel nga kasundalohan sa langit makigsangka uban kang Jesu-Kristo, ang Hari sa mga hari, diha sa “gubat sa dakong adlaw sa Diyos nga Labing Gamhanan” sa Armagedon. (Pinadayag 16:14-16; 19:14-16) Ang gamhanang mga anghel maoy magpahamtang sa silot nga gikan sa Diyos dihang ang Ginoong Jesus manimalos niadtong “wala magsunod sa maayong balita bahin sa atong Ginoong Jesus.”​—2 Tesalonica 1:7, 8.

Makaseguro ka nga ang mga anghel interesado gyod kanimo. Sila interesado sa kaayohan niadtong gustong moalagad sa Diyos, ug gamiton sila ni Jehova sa pagpalig-on ug pagpanalipod sa iyang mga alagad sa yuta.​—Hebreohanon 1:14.

Busa kinahanglan tang mamili. Mamati ba ta ug mosunod sa maayong balita nga ginasangyaw sa tibuok kalibotan? Ang mga Saksi ni Jehova sa inyong lugar malipay sa pagtabang nimo aron makapahimulos ka sa mahigugmaong paggiya sa gamhanang mga anghel sa Diyos.