1, 2. (a) Unsay nalakip sa “dili-mahubit nga walay bayad nga gasa” sa Diyos? (b) Unsang mga pangutana ang atong hisgotan niining artikuloha?

DIHANG gipadala ni Jehova ang iyang bugtong Anak dinhi sa yuta, Iyang gihatag kanato ang kinadak-ang gasa sa gugma! (Juan 3:16; 1 Juan 4:9, 10) Si apostol Pablo nagtawag niini ingong “dili-mahubit nga walay bayad nga gasa” sa Diyos. (2 Cor. 9:15) Nganong gigamit niya ang maong ekspresyon?

² Nahibalo si Pablo nga ang tanang nindot nga mga saad sa Diyos gigarantiyahan sa hingpit nga halad ni Kristo. (Basaha ang 2 Corinto 1:20.) Busa, ang “dili-mahubit nga walay bayad nga gasa” naglakip sa tanang kaayo ug maunongong gugma nga gipakita ni Jehova kanato pinaagi kang Jesus. Sa pagkatinuod, ang maong gasa kahibulongan kaayo nga dili kana mahubit sa paagi nga bug-os natong masabtan. Unsay angayng epekto kanato nianang talagsaong gasa? Ug sa unsang praktikal nga mga paagi nga kining maong gasa magpalihok kanato samtang mangandam kita sa pagsaulog sa Memoryal  sa kamatayon ni Kristo sa Miyerkoles, Marso 23, 2016?

3, 4. (a) Unsay imong bation kon hatagan kag gasa? (b) Sa unsang paagi tingali ang usa ka espesyal nga gasa makabag-o sa imong kinabuhi?

³ Dihang makadawat kag gasa, seguradong malipay ka. Apan ang pipila tingali ka gasa espesyal kaayo o makahuloganon nga makabag-o kini sa imong kinabuhi. Pananglitan, ibutang ta nga silotan ka nag kamatayon tungod kay nakahimo kag krimen. Sa kalit lang, usa ka tawo nga wala nimo mailhi ang miboluntaryo nga modawat sa silot nga para unta nimo. Andam siyang mamatay alang kanimo! Unsa kahay epekto kanimo nianang talagsaong gasa?

⁴ Ang maong dili mahakogong gugma seguradong magpalihok kanimo sa paghunahuna sa imong panggawi ug pag-usab pa gani sa imong paagi sa pagkinabuhi. Lagmit magpalihok kana kanimo sa pagkahimong mas mahinatagon ug mahigugmaon sa uban ug mapinasayloon kang bisan kinsa nga tingali nakasala kanimo. Sa tibuok nimong kinabuhi, may utang kabubut-on ka sa tawo nga namatay alang kanimo.

5. Nganong ang gasa sa Diyos nga lukat labaw pa kay sa bisan unsang gasa?

⁵ Apan ang gihatag ni Jehova kanato pinaagi kang Kristo mas labaw pa kay sa gasa nga gihubit niini nga pananglitan. (1 Ped. 3:18) Hunahunaa kon ngano. Tungod sa napanunod nga sala, kitang tanan nag-atubang sa silot nga kamatayon. (Roma 5:12) Sa kamahigugmaon, gihikay ni Jehova nga si Jesus moanhi sa yuta ug ‘makatilawg kamatayon alang sa matag tawo.’ (Heb. 2:9) Wala lang luwasa ni Jehova ang atong presenteng kinabuhi kondili naghimo siyag kahikayan aron mawagtang sa dayon ang hinungdan sa kamatayon. (Isa. 25:7, 8; 1 Cor. 15:22, 26) Ang tanan nga magpakitag pagtuo kang Jesus makadawat ug kinabuhing walay kataposan diha sa kalinaw ug kalipay ingong yutan-ong mga sakop sa Gingharian sa Diyos ubos sa pagmando ni Kristo o, para sa mga dinihogan, ingong kaubang mga magmamando ni Kristo. (Roma 6:23; Pin. 5:9, 10) Unsang ubang panalangin ang nalakip niining maong gasa gikan kang Jehova?

6. (a) Unsang mga panalangin sa gasa ni Jehova ang imong gikahinaman? (b) Sa unsang tulo ka paagi nga kita mapalihok sa gasa sa Diyos?

⁶ Ang gasa ni Jehova naglakip sa pag-ayo sa tanang sakit, paghimo sa yuta nga paraiso, ug pagbanhaw sa mga patay. (Isa. 33:24; 35:5, 6; Juan 5:28, 29) Gihigugma gayod nato si Jehova ug ang iyang minahal nga Anak tungod sa paghatag kanato sa “dili-mahubit nga walay bayad nga gasa.” Apan, ang pangutana nagpabilin, Ang gugma sa Diyos magpalihok kanato sa pagbuhat sa unsa? Atong tagdon kon sa unsang paagi ang gugma sa Diyos magpalihok kanato sa (1) pagsunod pag-ayo sa mga tunob ni Kristo Jesus, (2) pagpakitag gugma sa atong mga igsoon, ug (3) pagpasaylo sa uban nga kinasingkasing.

7, 8. Unsay angay natong bation labot sa gugma ni Kristo, ug angayng magpalihok kini kanato sa pagbuhat sa unsa?

⁷ Una, kinahanglang mapalihok kita sa pagkinabuhi alang kang Kristo Jesus. Si apostol Pablo miingon: ‘Ang gugma nga iya ni Kristo nagatukmod [o, nagpalihok] kanato.’ (Basaha ang 2 Corinto 5:14, 15.) Nahibalo si Pablo nga kon atong dawaton ang talagsaong gugma ni Kristo, kini magtukmod, o magpalihok, kanato sa pagkinabuhi alang kaniya. Dihang bug-os natong masabtan kon unsay nahimo ni Jehova alang kanato ug ang atong kasingkasing mapalihok sa iyang gugma, gusto natong tibuok kalag nga magkinabuhi alang kang Kristo Jesus. Unsaon nato pagpakita kana?

⁸ Kadtong nahigugma kang Jehova napalihok sa pagsundog kang Kristo, nga nagsunod  pag-ayo sa iyang mga tunob. (1 Ped. 2:21; 1 Juan 2:6) Pinaagi sa atong pagkamasinugtanon, atong gipamatud-an ang atong gugma alang sa Diyos ug kang Kristo. Si Jesus miingon: “Siya nga nakabaton sa akong mga sugo ug nagsunod niini, siya mao ang nahigugma kanako. Sa ingon usab siya nga nahigugma kanako higugmaon sa akong Amahan, ug ako mahigugma kaniya ug magpadayag sa akong kaugalingon ngadto kaniya.”—Juan 14:21; 1 Juan 5:3.

9. Unsang mga impluwensiya ang atong giatubang?

⁹ Panahon sa Memoryal, maayong pamalandongon nato ang atong paagi sa pagkinabuhi. Pangutan-a ang imong kaugalingon: ‘Sa unsang mga paagi nga ako nagasunod sa tunob ni Kristo Jesus? Unsa pay kinahanglan nakong pauswagon?’ Hinungdanon ang maong pagsusi kay kanunay kitang ginaimpluwensiyahan sa kalibotan sa pagsundog kanila. (Roma 12:2) Kon dili kita mag-amping, basin masundog nato ang makinaadmanong mga tawo sa kalibotan, artista, ug mga atleta. (Col. 2:8; 1 Juan 2:15-17) Sa unsang paagi masuklan nato ang ilang impluwensiya?

10. Unsang mga pangutana ang atong isukna sa kaugalingon niining panahon sa Memoryal, ug ang mga tubag niini mahimong magpalihok kanato sa pagbuhat sa unsa? (Tan-awa ang hulagway sa sinugdan sa artikulo.)

¹⁰ Ang panahon sa Memoryal maoy maayong kahigayonan nga susihon ang atong mga sinina, gipiling pelikula ug musika, apil na tingali ang sulod sa atong mga computer, cellphone, ug tablet. Pangutan-a ang imong kaugalingon: ‘Kon moadto ko sa usa ka lugar nga naa sab si Jesus, dili ba ko maulaw nga isul-ob ning sininaa?’ (Basaha ang 1 Timoteo 2:9, 10.) ‘Kon ako ning isul-ob, mailhan ba ko sa uban ingong sumusunod ni Kristo Jesus?’ Puwede sab nato nang ipangutana maylabot sa gipili natong mga pelikula ug musika. ‘Ganahan kahang motan-aw si Jesus niining salidaha o maminaw niining musikaha? Kon manghulam siya sa akong cellphone o tablet, dili ba ko maulaw sa iyang makita niini?’ Maylabot sa mga video game, pangutan-a ang imong kaugalingon: ‘Dili ba ko malisdan pagpatin-aw kang Jesus kon nganong ganahan ko niini?’ Ang atong gugma kang Jehova angayng magpalihok kanato nga wagtangon o ilabay ang bisan unsa nga dili angay sa usa ka tinun-an ni Kristo, bisag unsa pa kini ka mahal. (Buh. 19:19, 20) Dihang kita nagpahinungod, nanaad kita nga dili na magkinabuhi alang sa atong kaugalingon kondili alang kang Kristo. Busa, dili ta angayng magpanuko sa pagwagtang sa bisan unsa nga makapugong nato sa pagsunod pag-ayo sa mga tunob ni Kristo.—Mat. 5:29, 30; Filip. 4:8.

11. (a) Sa unsang paagi ang atong gugma kang Jehova ug kang Jesus magpalihok kanato diha sa pagsangyaw? (b) Sa unsang paagi ang atong gugma magpalihok kanato sa pagtabang sa uban diha sa kongregasyon?

¹¹ Ang atong gugma kang Jesus magpalihok usab kanato nga magmadasigon diha sa pagsangyaw ug paghimog mga tinun-an. (Mat. 28:19, 20; Luc. 4:43) Panahon sa Memoryal, kita may kahigayonan sa pag-oksilyare payunir, nga mogugol ug 30 o 50 ka oras sa pagsangyaw. Mapasibo ba nimo ang imong eskedyul aron mahimo kana? Usa ka 84 anyos nga biyudo ang mibati nga dili siya makaoksilyare payunir tungod sa iyang edad ug dili maayong panglawas. Bisan pa niana, gitabangan siya sa mga payunir sa ilang lugar. Gitagan-an nila siyag transportasyon ug nahiangayng teritoryo aron makab-ot niya ang iyang tumong nga 30 ka oras. Makahimo ka ba sa pagtabang sa usa ka igsoon sa inyong kongregasyon aron siya makaoksilyare payunir panahon sa Memoryal? Siyempre, dili tanan ang makaoksilyare payunir. Bisan pa niana, magamit nato ang atong panahon ug kusog sa pagpauswag sa atong halad sa pagdayeg kang Jehova. Sa pagbuhat niini, atong gipakita nga kita, sama kang Pablo, napalihok sa gugma ni Kristo. Unsa pay atong mahimo sa pagpakita nga kita gipalihok sa gugma sa Diyos?

12. Ang gugma sa Diyos magpalihok kanato sa pagbuhat sa unsa?

¹² Ikaduha, ang gugma sa Diyos magpalihok kanato sa pagpakitag gugma sa atong mga igsoon. Giila kini ni apostol Juan. Siya misulat: “Mga hinigugma, kon kita gihigugma sa Diyos niining paagiha, nan kita sa atong kaugalingon nailalom sa obligasyon nga maghigugmaay sa usag usa.” (1 Juan 4:7-11) Oo, aron higugmaon ta sa Diyos, kinahanglang ilhon nato ang atong obligasyon sa paghigugma sa atong mga igsoon. (1 Juan 3:16) Sa unsang paagi nato mapasundayag ang atong gugma sa praktikal nga mga paagi?

13. Unsang ehemplo ang gipakita ni Jesus maylabot sa paghigugma sa uban?

¹³ Tagda ang ehemplo ni Jesus. Panahon sa iyang ministeryo dinhi sa yuta, iyang gihatagag linaing pagtagad ang ubos nga mga tawo. Iyang giayo ang mga bakol, buta, bungol, ug amang. (Mat. 11:4, 5) Si Jesus nalipay sa pagtudlo niadtong gigutom sa espirituwal, kadtong giisip sa Hudiyong mga lider sa relihiyon ingong “tinunglong katawhan.” (Juan 7:49) Iyang gimahal kining ubos nga mga tawo ug naghago siya sa pagtabang kanila.—Mat. 20:28.

14. Unsay imong mahimo aron ikapakita ang imong gugma sa imong mga igsoon?

¹⁴ Ang panahon sa Memoryal maoy kahigayonan sa pagsundog kang Jesus ug paghunahuna kon sa unsang paagi makatabang ka sa mga igsoon sa inyong kongregasyon. Samtang buhaton nimo kana, seguradong duna kay makita nga puwede nimong pakitaag gugma. Tingali may tigulang nga mga igsoon nga nagkinahanglag tabang. Makaduaw ka ba niining minahal nga mga igsoon? Makahimo ka ba sa pagdalag pagkaon kanila, pagtabang sa ilang buluhaton sa balay, paghatod nila sa tigom, o pagpauban kanila sa pagsangyaw? (Basaha ang Lucas 14:12-14.) Ang gugma sa Diyos angayng magpalihok kanato sa pagtabang ug pagpakitag gugma sa atong mga igsoon.

15. Unsay angay natong ilhon?

¹⁵ Ikatulo, ang gugma ni Jehova angayng magpalihok kanato sa pagpasaylo sa atong mga igsoon. Ingong mga kaliwat ni Adan, kitang tanan nakapanunod ug sala ug sa silot niini, ang kamatayon. Walay makaingon, “Wala ko magkinahanglan sa lukat.” Bisan ang labing matinumanong alagad sa Diyos nagkinahanglan sa dili takos nga kalulot ni Jehova  pinaagi kang Kristo. Angayng ilhon sa matag usa kanato nga kita napasaylo sa usa ka dakong utang. Nganong importante kini? Ang tubag makita diha sa usa sa mga ilustrasyon ni Jesus.

16, 17. (a) Unsay angay natong makat-onan sa ilustrasyon ni Jesus bahin sa hari ug sa mga ulipon? (b) Human mapamalandong ang ilustrasyon ni Jesus, unsay determinado nimong buhaton?

¹⁶ Si Jesus nag-asoy kon giunsa pagpasaylo sa usa ka hari ang iyang ulipon sa dakong utang niini nga 10,000 ka talanton, o 60,000,000 ka denario. Apan, ang maong ulipon nga gipasaylo sa iyang dakong utang wala magpasaylo sa mas gamayng utang sa iyang isigkaulipon nga 100 ka denario. Nasuko ang hari dihang nahibaloan niya ang katig-a sa kasingkasing sa ulipon nga iyang gipasaylo. Ang hari miingon: “Daotan nga ulipon, gipapas ko ang tanan nimong utang sa nangaliyupo ka kanako. Dili ba, sa baylo, angay unta nga maluoy ka sa imong isigkaulipon, ingon nga ako naluoy usab kanimo?” (Mat. 18:23-35) Oo, ang dakong kaluoy sa hari angay untang magpalihok sa maong ulipon sa pagpasaylo sa iyang isigkaulipon. Sama sa hari, si Jehova nagpapas sa atong dakong utang pinaagi sa pagpasaylo sa atong mga sala. Kon mao, ang gugma ug kaluoy ni Jehova angayng magpalihok kanato sa pagbuhat sa unsa?

¹⁷ Ang panahon sa Memoryal maghatag kanatog kahigayonan sa pagsusi kon naghambin ba kitag kasuko sa atong igsoon. Kon mao, kini maoy maayong higayon sa pagsundog kang Jehova, kinsa “andam sa pagpasaylo.” (Sal. 86:5; Neh. 9:17) Kon atong pabilhan ang nahimo ni Jehova alang kanato sa pagpapas sa atong dakong utang, nan pasayloon nato ang uban nga kinasingkasing. Dili kita makadahom nga higugmaon ug pasayloon ta sa Diyos kon dili nato higugmaon ug pasayloon ang uban. (Mat. 6:14, 15) Tinuod nga kon atong pasayloon ang uban, dili mausab ang kamatuoran nga ila kitang gipasakitan, apan makatabang kini kanato nga magmalipayon sa umaabot.

18. Sa unsang paagi ang gugma sa Diyos nakatabang sa usa ka sister sa pagpailob sa kahuyangan sa laing sister?

¹⁸ Para sa kadaghanan kanato, lagmit dili sayon ang pagpailob sa kahuyangan sa atong mga igsoon. (Basaha ang Colosas 3:13, 14; Efeso 4:32.) Pananglitan, si Lily maoy usa ka dalaga nga sister nga kinabubut-ong mitabang sa biyuda nga si Carol. ^[1] Si Lily nagtagana kang Carol ug transportasyon, namalit alang kaniya, ug naghatag ug ubang praktikal nga tabang. Bisan pa niana, si Carol magsige lag reklamo ug lisod ikauban. Apan, si Lily nagpokus sa maayong mga hiyas ni Carol. Siya padayong nagtabang kang Carol sulod sa daghang tuig hangtod nga kini grabeng nasakit ug namatay. “Bisan pa niana,” matod ni Lily, “naghinamhinam kong makita si Carol inigkabanhaw niya. Gusto nako siyang mailhan dihang hingpit na siya.” Oo, ang gugma sa Diyos mahimong magpalihok kanato sa pagpailob sa atong mga igsoon ug pagpaabot sa panahon dihang mawala na sa dayon ang pagkadili-hingpit.

19. Sa unsang paagi ang “dili-mahubit nga walay bayad nga gasa” sa Diyos magpalihok kanimo?

¹⁹ Kita nakadawat gayod ug “dili-mahubit nga walay bayad nga gasa” gikan kang Jehova. Hinaot nga dili nato pakamenoson kining bililhong gasa. Ilabina panahon sa Memoryal, hinaot nga atong pamalandongon ug pabilhan ang tanang nahimo ni Jehova ug ni Jesus alang kanato. Oo, hinaot ang ilang gugma magpalihok kanato sa pagsunod pag-ayo sa mga tunob ni Jesus, pagtabang ug pagpakitag gugma sa atong mga igsoon, ug pagpasaylo sa atong mga igsoon nga kinasingkasing.