Ang Lainlaing mga Dagway sa mga Biktima sa Gubat

“ANG mga gubat karon lahi niadtong sa nangagi . . . [Nagkadaghang] ordinaryong mga lungsoranon, inay mga sundalo,” ang nangabiktima, nagtaho ang “Perspective,” usa ka programa nga gisibya sa UN Radio. Pananglitan, sa unang gubat sa kalibotan, 5 porsiyento lamang sa tanang nakalas ang mga sibilyan. Apan, sa ikaduhang gubat sa kalibotan, ang gidaghanon sa nakalas nga mga sibilyan miusbaw ngadto sa 48 porsiyento. Ug karon, matod sa UN Radio, “halos tanang nakalas sa mga panaggubat maoy mga sibilyan​—90%​—ug kadaghanan niini mga babaye, mga bata ug mga tigulang.”

Sumala kang Olara Otunnu, kinsa maoy Special Representative for Children and Armed Conflict sa sekretaryo-heneral sa HK, “gibanabanang duha ka milyong bata ang nangamatay sa armadong mga panaggubat sukad sa 1987.” Mokabat kana ug kapin sa 450 ka bata nga mga biktima sa gubat kada adlaw sulod sa miaging 12 ka tuig! Dugang pa, nianang maong yugto, kapin sa unom ka milyong bata ang grabeng naangol o permanenteng nabaldado.

Usa ka paagi nga ang HK makabuntog sa nagkadaghang nakalas-sa-gubat nga mga bata, misugyot si G. Otunnu, maoy pinaagi sa pagpasiugda sa mga sona sa pakigdait. “Ang mga dapit nga daghag bata, sama sa mga tunghaan, mga ospital, ug mga dulaanan, kinahanglang isipon nga walay-gubat nga mga sona.” Apan, midugang ang UN Radio, “ang pagsanta sa mga gubat sa panguna” mao ang labing epektibong paagi nga maseguro sa HK nga ang ordinaryong mga lungsoranon dili makalas sa gubat. Sa pagkatinuod, aron walay makalas sa gubat gikinahanglan gayod nga wagtangon ang gubat mismo. Mahitabo ba gayod kana?

Tungod sa dugay nang pakiggubat sa tawo, kadaghanang tawo angayang mobati nga ang mga tawo dili gayod makapahinabog tibuok-yuta nga pakigdait. Apan, ang Pulong sa Diyos, ang Bibliya, nagsaad nga himoon kana ni Jehova nga Diyos: “Gipahunong niya ang mga gubat sa kinatumyan sa yuta.” (Salmo 46:9) Kanus-a kini mahitabo? Ug nganong makaseguro ka nga ang saad sa Diyos nga tibuok-kalibotang pakigdait mahitabo? Kon buot nimong makadawat ug tubag niining mga pangutanaha, palihog pagsulat sa mga magpapatik niining magasina, nga ginamit ang kinadul-ang direksiyon nga nalista sa panid 5, o teleponohi ang Kingdom Hall sa mga Saksi ni Jehova nga duol nimo. Walay obligasyon ug walay bayad​—madayganon lamang nga mga tubag.

[Picture Credit Line sa panid 31]

UN PHOTO 156450/J. Isaac