Gikan sa Among mga Magbabasa

Kanhing Kriminal Kinahanglan akong mosulat aron isugid kon unsa ka dako ang akong pagpabili sa eksperyensiya ni Enrique Torres, Jr., nga nag-ulohang “Nagngulob nga Leyon nga Nahimong Maaghop nga Karnero.” (Agosto 8, 1999) Gipasiugda niini ang gugma ug kaluoy sa atong Diyos, si Jehova, ug kon unsa ka mapainubsanon siya kanato. Gipakita usab niini nga ingong mga ginikanan, kinahanglan dili gayod kita molunga sa atong mga anak, bisan kon unsa pa ka layo sila nga nahisalaag sa mga sukdanan sa Diyos.

J. F., Inglaterra

Gimatuto ako ingong Kristohanon, apan tungod sa daotang panag-ubanay, ako nalangkit sa droga ug kapintasan. Sa edad nga 18, ako gisentensiyahan ug 25-ka-tuig nga pagkabilanggo. Bisan kon ako napasig-uli ngadto sa Kristohanong kongregasyon, ako sagad mobating walay-bili. Apan, human mabasa kining artikuloha, ako nakasabot nga si Jehova dili halayo gikan niadtong nangita kaniya. Bisan kon ako ania pa sa bilanggoan, kining eksperyensiyaha nakadasig kanako sa pagbarog nga malig-on.

R. B., Tinipong Bansa

Mga Hummingbird Ang artikulong “Ang Langgam nga Manghalok ug mga Bulak” (Agosto 8, 1999) makapahingangha. Nakakita na ako ug mga hummingbird kaniadto, apan wala ako maghunahuna nga sila gamay diay kaayo. Pinaagi sa mga pulong ug mga hulagway, inyong gipukaw ang akong interes niining makalingaw nga mga linalang.

R. H., Alemanya

Ako nakadayeg sa impormasyon ug sa maanindot nga mga ilustrasyon. Panahon sa ting-init ang mga hummingbird sagad moduaw sa akong hardin. Makapalipay gayod ang pagtan-aw niining katingalahang mga langgam. Sa makadaghang panahon, ang pagtan-aw lamang niana igo nang makapalipay kanako.

C.S.S., Brazil

Kahilwas sa Hagdan Salamat sa artikulong “Paggamit ug mga Hagdan​—Naghimo Ka ba Niining mga Pagsusi sa Kahilwas?” (Agosto 8, 1999) Ako nahulog di pa dugay gikan sa hagdan ug, ingong resulta, kinahanglang operahan sa tuhod. Akong gipabilhan ang napulo ka sugyot nga inyong gihatag ug hinumdoman kini sa sunod higayon nga ako mogamit ug hagdan.

D. N., Mexico

Space Station Ako 16-anyos, ug ang pagsuhid sa kawanangan kanunayng nakadani kanako. Busa buot kong magpahayag sa akong pagpasalamat tungod sa artikulong “Ang International Space Station​—Usa ka Nagabiyo nga Laboratoryo.” (Agosto 22, 1999) Ang mga artikulong sama niini makapainteres kaayo kanako!

K. E., Tinipong Bansa

Inyong gihimaya kining space station nga walay usa ka pulong sa pagsaway. Ang Diyos wala maghisgot niini ingong bahin sa iyang plano alang sa tawo. Ug ang kantidad sa usa ka pagpalupad makauulaw, samtang ang minilyon nagutman. Wala ninyo pasidunggi ang Diyos sa dihang inyong gihimaya ang maong mga butang.

P.N.M., Inglaterra

Ang Bibliya nag-ingon nga ‘ang yuta gihatag sa mga anak sa mga tawo.’ (Salmo 115:16) Apan, walay pasikaranan sa Kasulatan ang pag-ingon nga sayop alang sa tawo nga maikag sa kawanangan. Sa pagkamatuod, ang Bibliya nagdasig sa mga tawo sa pagtuo sa pag-usisa sa mga langit ingong usa ka paagi sa pag-usisa sa kaalam ug gahom sa paglalang sa Diyos. (Salmo 8:​3, 4; 19:1) Bisan pa niana, dili namo tuyo nga himayaon ang giplanong space station; gitaho lamang namo ang bahin sa mga plano sa pagtukod niana. Kon kaha ang space station moresultag panukiduki nga magpakamatarong sa dakong kantidad niini o dili nagpabiling wala mahibaloi.​—ED.

Pagkalabang-Buhi sa Paglutos Mao pa lamay akong pagkatapos sa pagbasa sa artikulong “Nag-alagad sa Diyos Atubangan sa Kamatayon.” (Agosto 22, 1999) Tungod sa paglahutay sa mga igsoon sa Angola sulod sa kapin sa 17 ka tuig, ang yuta nga kas-a daw umaw sa espirituwal nga paagi ginapanalanginan na karon sa dagayang abot!

R. Y., Hapon