Ang Hunahuna sa Bibliya

Kon Unsaon Pagsagubang ang Kawalay-Paglaom

ANG kawalay-paglaom maoy komon sa tanang tawo, labing menos sa usa ka sukod. Apan, alang sa pipila grabe ang gibating kawalay-paglaom nga ang kamatayon morag labi pang maayo kay sa kinabuhi.

Ang Bibliya nagpakita nga bisan ang matinumanong mga alagad sa Diyos dili kay dili-maapektohan sa mga suliran ug mga kapit-os nga motultol sa kawalay-paglaom. Tagda, pananglitan, si Elias ug si Job​—nga parehong nagpahimulos ug maayong relasyon uban sa Diyos. Human mokalagiw gikan kang Rayna Jezebel, si Elias “mihangyo [kang Jehova] nga ang iyang kalag mamatay unta.” (1 Hari 19:​1-4) Ang matarong nga tawong si Job nakasinatig sunodsunod nga mga trahedya, lakip ang makaluod nga sakit ug ang pagkamatay sa napulo ka anak. (Job 1:​13-19; 2:​7, 8) Ang iyang kawalay-paglaom nagpahinabo kaniyang moingon: “Palabihon kong mamatay tungod sa tanan kong pag-antos.” (Job 7:​15, The New English Bible) Tin-aw, hilabihan gayod ang kabalaka niining matinumanong mga tawo sa Diyos.

Alang sa pipila karon, ang kawalay-paglaom tingali maoy gumikan sa masakit nga mga epekto sa pagkatigulang, pagkamatay sa usa ka kapikas, o grabeng pinansiyal nga kalisdanan. Nakaplagan sa uban nga ang walay-hunong nga tensiyon, nagpabiling mga epekto sa masakit nga kasinatian, o mga problema sa pamilya naghimo kanila nga daw samang sila nanlimbasog paglangoy diha sa tunga sa dagat, nga ang matag balod nagpalisod sa ilang pag-abot sa baybayon. Usa ka tawo miingon: “Imong bation ang kawalay-pulos​—daw sama ra nga walay usa nga mohandom kanimo kon mamatay ka na. Ang kamingaw nga bation sa usa usahay dili maantos.”

Sa pipila ka kaso ang mga kahimtang moarang- arang, nga maghupay niining grabeng kapit-os. Apan komosta kon ang atong mga kahimtang dili mausab? Sa unsang paagi ang Bibliya motabang kanato sa pagsagubang sa kawalay-paglaom?

Ang Bibliya Makatabang

Si Jehova may katakos ug gahom sa pagpalig-on kang Elias ug Job latas sa ilang kalisdanan.  (1 Hari 19:​10-12; Job 42:​1-6) Pagkamakapahupay ang pagkahibalo nato niana karon! Ang Bibliya nag-ingon: “Ang Diyos maoy usa ka dalangpanan ug kusog alang kanato, usa ka katabang nga daling makaplagan panahon sa kagul-anan.” (Salmo 46:​1; 55:22) Bisan tingalig mosanap kanato ang pagbati sa kawalay-paglaom, si Jehova nagsaad nga siya mosangga kanato pinaagi sa iyang tuong kamot sa pagkamatarong. (Isaias 41:10) Sa unsang paagi mabatonan nato kini nga tabang?

Ang Bibliya nagsaysay nga pinaagi sa pag-ampo “ang kalinaw sa Diyos nga nagalabaw sa tanang panghunahuna magabantay sa [atong] mga kasingkasing ug sa [atong] mga gahom sa pangisip pinaagi kang Kristo Jesus.” (Filipos 4:​6, 7) Tungod sa atong kagul-anan, tingali wala kitay makitang solusyon sa atong problema. Apan, kon kita ‘molahutay sa pag-ampo’ si Jehova makahimo sa pagbantay sa atong mga kasingkasing ug mga hunahuna, nga magtagana kanato sa kusog nga atong gikinahanglan sa paglahutay.​—Roma 12:​12; Isaias 40:​28-31; 2 Corinto 1:​3, 4; Filipos 4:13.

Kita makabenepisyo pinaagi sa pagkaespesipiko diha sa atong mga pag-ampo. Bisan tingali kon lisod ipahayag ang atong mga hunahuna, angay kitang mobating gawasnon sa pagpakigsulti kang Jehova bahin sa kon unsay atong gibati ug kon unsay atong nasabtan nga maoy gamot sa problema. Kita kinahanglang mangaliyupo kaniya alang sa kusog nga magpalig-on kanato sa matag adlaw. Atong nabatonan ang pasalig: “Ang tinguha niadtong nangahadlok kaniya pagatumanon [ni Jehova], ug ang ilang pagpakitabang iyang pagadunggon, ug siya magaluwas kanila.”​—Salmo 145:19.

Dugang pa sa pag-ampo, kinahanglang pakigbisogan nato ang pagpalain. (Proverbio 18:1) Ang uban nalig-on sa paggamit sa ilang panahon ug kusog sa pagtabang sa uban. (Proverbio 19:​17; Lucas 6:38) Tagda ang usa ka babaye nga ginganlag Maria, * kinsa wala lamang makigbisog sa kanser kondili namatyan usab ug walo ka membro sa pamilya sa usa lamang ka tuig. Kinahanglang pugson ni Maria ang iyang kaugalingon nga mobangon ug mobalik sa iyang rutina. Halos matag adlaw siyang mogawas sa pagtudlo sa uban bahin sa Bibliya, ug siya regular nga nagtambongan sa Kristohanong mga tigom. Sa pagpauli sa balay, ang gibating kagul-anan ni Maria bug-os na usab nga mobalik. Apan, pinaagi sa pagsentro sa hunahuna kon sa unsang paagi siya makatabang sa uban, si Maria nakalahutay.

Apan komosta kon nalisdan kita sa pag-ampo o morag dili makalingkawas sa atong nahilain nga kahimtang? Nianang kasoha kinahanglang mangayo kitag tabang. Ang Bibliya nagdasig kanato sa pagdangop sa “mga ansiyano sa kongregasyon.” (Santiago 5:​13-16) Usa ka lalaki nga nagsagubang ug grabeng nagapadayong depresyon mipahayag: “Usahay ang pagpakigsulti sa usa ka tawo nga imong gisaligan motabang sa paghupay sa hunahuna ug pagpakalma sa espiritu, aron ang makataronganong panghunahuna mopatigbabaw.” (Proverbio 17:17) Siyempre, kon ang dugay ug grabeng kawalay-paglaom nagpadayag sa usa ka balatian, ang haom nga propesyonal nga tabang tingali gikinahanglan usab. *​—Mateo 9:12.

Bisan tuod walay daling mga solusyon, dili gayod nato pakamenoson ang katakos sa Diyos sa pagtabang kanato sa pagsagubang sa atong mga problema. (2 Corinto 4:8) Ang paglahutay diha sa pag-ampo, paglikay sa pagpalain, ug pagpangayog takos nga tabang motabang kanato sa pagbaton pag-usab ug kalig-on. Ang Bibliya nagsaad nga taposon sa Diyos sa bug-os ang pangunang mga hinungdan sa atong grabeng kawalay-paglaom. Ang mga Kristohanon determinadong mosalig kaniya samtang naghulat sa panahon sa dihang kining “unang mga butang dili na pagahinumdoman.”​—Isaias 65:​17; Pinadayag 21:4.

[Mga footnote]