Ang Hunahuna sa Bibliya

Kinsa ba ang Usa ka Ministro?

SA GABII una pa sa haladnong kamatayon ni Jesus, ang iyang kinasuorang mga higala nalangkit sa mainit nga panaglalis. Sumala sa Lucas 22:​24, dihay ‘nahitabong mainit nga panaglalis taliwala kanila bahin sa kon kinsa kanila ang gihunahuna nga labing dako.’ Dili kini ang unang higayon nga ang maong panaglalis misilaob taliwala sa mga apostol ni Jesus. Diha sa labing menos duha ka nangaging mga okasyon, kinahanglang tul-iron ni Jesus ang ilang panghunahuna.

Pagkamakapaguol nga niining kritikal nga gabii, kinahanglan silang pahinumdoman pag-usab ni Jesus kon unsa ba gayod sa tinuoray ang pagkahimong Kristohanong ministro. Siya miingon: “Siya nga labing dako kaninyo magpahimong kamanghoran, ug ang nagalihok ingon nga pangulo ingong ang usa nga nagaalagad.”​—Lucas 22:26.

Dili gayod makapatingala kanato nga ang mga apostol may sayop nga ideya bahin sa kahinungdanon sa posisyon ug kabantog. Una pa kang Jesus, ang ilang pangunang panig-ingnan maylabot sa relihiyosong pagkapangulo gitagana sa mga eskriba ug mga Pariseo. Inay kay hatagan ang katawhan ug espirituwal nga giya ug pagtultol, kining mini nga mga ministro nagduso ug estriktong mga tradisyon ug mga kalagdaan nga “nagatak-op sa gingharian sa mga langit atubangan sa mga tawo.” Sila maoy hangol-sa-posisyon, nagtinguhag-kabantog, mabalak-on lamang sa kaugalingon nga mga tawo kinsa naghimo sa ilang mga buhat “aron tan-awon sa mga tawo.”​—Mateo 23:​4, 5, 13.

Bag-ong Matang sa Ministro

Hinunoa, si Jesus naghatag ug usa ka bag-ong ideya sa espirituwal nga pagministeryo ngadto sa iyang mga tinun-an. Siya nagtudlo: “Ayaw kamo pagpatawag nga Rabbi, kay usa ang inyong magtutudlo, samtang tanan kamo mga igsoon. Dugang pa, ayaw ninyo tawgang amahan ang bisan kinsa dinhi sa yuta, kay usa ra ang inyong Amahan, ang langitnong Usa. . . . Apan ang labing dako taliwala kaninyo kinahanglan nga maoy inyong alagad.” (Mateo 23:​8-11) Ang mga tinun-an ni Jesus dili angayng mosundog sa relihiyosong mga lider sa ilang panahon. Kon buot nilang mahimong tinuod nga mga ministro, kinahanglang sundogon nila si Jesus. Unsang matanga sa panig-ingnan ang iyang gibilin?

Ang Bibliya sagad nga naggamit sa Gregong pulong di·aʹko·nos alang sa “ministro.” Ang The Encyclopedia of Religion nagsaysay nga kining pulonga naghawas “dili sa posisyon kondili sa nagaalagad nga relasyon sa ministro ngadto sa usa nga gialagaran: ang pagsunod sa panig-ingnan ni Kristo . . . mao ang labing hinungdanong  bahin sa Kristohanong pagsabot sa ministeryo.”

Uyon sa hustong kabatbatan sa pulong “ministro,” gihatag ni Jesus ang tanan niyang nabatonan aron tabangan ang uban. “Ang Anak sa tawo mianhi,” siya misaysay nga mapailobon, “dili aron alagaran, kundili sa pag-alagad ug sa paghatag sa iyang kalag nga usa ka lukat baylo sa daghan.” (Mateo 20:28) Gigamit ni Jesus sa dili-mahakogong paagi ang iyang panahon, kusog, ug katakos sa pagtabang sa uban sa pisikal ug espirituwal nga paagi. Ngano? Tungod kay siya naluoy sa gimaltratar sa espirituwal nga mga panon nga mihugop sa pagpakigkita kaniya. Buot niyang motabang. Ang mahinatagong gugma mao ang nagtukmod sa iyang ministeryo, ug buot niyang ang iyang mga tinun-an magpakitag samang mahinatagong tinamdan.​—Mateo 9:36.

Sa tibuok niyang dalan sa kinabuhi, si Jesus naghatag ug sumbanan alang sa umaabot nga mga ministro. “Dako ang anihon,” siya miingon, “apan diyutay ang mga mamumuo. Busa, pangamuyo kamo sa Agalon sa pag-ani nga magpadalag mga mamumuo ngadto sa iyang pag-ani.” (Mateo 9:​37, 38) Oo, ang mga ministro ni Kristo angayng mahimong mga mamumuo sa kinadak-ang buluhaton nga nakita sukad sa kalibotan​—pagtaganag espirituwal nga kahupayan sa tanang tawo pinaagi sa pagsangyaw ug pagtudlo sa maayong balita sa Gingharian sa Diyos.​—Mateo 28:​19, 20.

Kining pagtumong sa pagtagad diha sa paghatag ug sa pag-alagad sa mga panginahanglan sa uban mao ang naghimo sa paagi sa pag-alagad ni Kristo nga lahi kaayo. Iyang gitudloan ang iyang mga ministro nga mahimong mga mamumuo, espirituwal nga mga mangingisda ug mga magbalantay, dili mga tawong misteryoso ug edukado nga may espesyal nga sapot ug emblema.​—Mateo 4:​19; 23:​5; Juan 21:​15-17.

Ang Hunahuna sa Bibliya

Ikasubo, sulod sa kasiglohan natuis kining maayo, dili-mahakogong ideya bahin sa mga ministro ingong nagsakripisyo-sa-kaugalingong mga magwawali ug magtutudlo. Ang nagsugod ingong Kristohanong ministeryo nahimong pormal, herarkiyang institusyon. Ang mga orden ug mga ranggo mitungha, ug sila gihatagan ug kadungganan ug gahom ug sagad nga nakatigom ug dakong bahandi. Nakamugna kinig mga pagkabahinbahin. Ang klero nga matang mitungha nga sa panguna gideboto sa pagdumala sa relihiyosong mga sakramento ug pagtambag sa nakasala. Ang unang-siglong Kristiyanidad nausab sa misunod nga mga siglo gikan sa aktibong relihiyon diin ang matag usa maoy usa ka ministro ngadto sa dili-aktibong relihiyon diin pipila lamang sa linaing nabansay ug inuyonan nga mga tawo ang makawali ug makatudlo.

Apan, ang Bibliya nagpaila sa usa ka Kristohanong ministro, dili pinaagi sa linaing sapot, magarbohong rituwal, suweldo, o dekreto sa estado, kondili pinaagi sa iyang dili-mahakogong paghago. Gilaraw ni apostol Pablo ang tinamdan nga angayng ipasundayag sa Kristohanong mga ministro. Gidasig niya sila nga ‘dili mobuhat ug unsa man tungod sa pagpakaimportante sa kaugalingon kondili uban sa pagpaubos sa hunahuna.’​—Filipos 2:3.

Dayag nga gibuhat ni Pablo kon unsay iyang gisangyaw. Kay nagsunod pag-ayo sa sumbanan ni Kristo, siya wala gayod magtinguha sa iyang “kaugalingong kaayohan kundili nianang sa daghan, aron nga sila maluwas.” Iyang nasabtan ug dulot nga gibati ang iyang responsabilidad sa ‘pagpaabot sa maayong balita nga walay bayad,’ sumala sa iyang giingon, “sa katuyoan nga dili ko maabusaran ang akong awtoridad sa maayong balita.” Wala siya ‘magtinguhag himaya gikan sa mga tawo.’​—1 Corinto 9:​16-18; 10:​33; 1 Tesalonica 2:6.

Pagkatalagsaong sumbanan sa matuod nga Kristohanong ministro! Kadtong mosundog sa iyang maayo kaayong mga panig-ingnan ug molakaw diha sa dili-mahakogong sumbanan nga gihatag ni Jesu-Kristo, nga madagayaong maghatag sa ilang kaugalingon sa pagtaganag espirituwal nga tabang ug paghupay sa maayong balita ngadto sa uban, nagpakita sa ilang kaugalingon nga matuod nga mga ministro sa Diyos.​—1 Pedro 2:21.