Panahon na Bang Mopalit ug Bag-ong Katre?

SINULAT SA KORESPONSAL SA PAGMATA! SA BRITANYA

Kanunay ka bang dili mahimutang sa gabii, nga mag-alindasay ug maglisoliso sa paningkamot nga makakaplag ug komportableng posisyon, ug dayon inigkabuntag mobangon nga nanikig ug nanakit ang lawas? Kon mao, tingali ang problema mao ang imong katre.

KINI nga muwebles mahimong imong higala o imong kaaway. Kon ikaw nagpuyo sa usa ka nasod diin gigamit ang mga katre, lagmit gugolon nimo ang un-tersiya sa imong kinabuhi sa pagpahulay diha niini, apan ang imong katre dili molungtad sa walay kataposan. Ang imo bang katre karon nagsilbig maayo kanimo?

Nagkinahanglan Ka ba ug Bag-ong Katre?

Ang katre kasagarang makasilbig maayo sa mga napulo ka tuig. Mahimong mas daling makaguba ug katre ang mas bug-at nga tawo. Hinumdomi usab nga ang imong mga panginahanglan ug mga kagustohan mag-usab-usab samtang ikaw magkatigulang. Aron matino kon ikaw nagkinahanglan ba ug bag-ong katre, suknaa ang imong kaugalingon niining mga pangutanaha. ‘Sa ako bang pagbangon manikig ang akong liog o manakit ang akong bukobuko? Ang ako bang katre gamay ra kaayo? Mabati ba nako ang mga espring o mga bugdo? Makadungog ba ako ug mga pag-igot o mga pagkuto sa dihang ako molihok? Namatikdan ba namong magtiayon nga kami maligid nga wala tuyoa ngadto sa usag usa? Ang patongan ba sa kutson dili na patag o nagyatyat na? Gubaon na ba ang mga tiil ug ligid niini?’ Ang imong mga tubag niining mga pangutanaha tingali motabang kanimo sa pagtino kon panahon na bang mopalit ug bag-ong katre.

Unsay Kinaiyahan sa Usa ka Maayong Katre?

Ang usa ka maayong katre komportable ug mosangga kanimo, nga mohaom sa imong partikular nga mga panginahanglan ug mga kagustohan. Ang kadaghanang katre dunay kutson ug kaha, apan ang kutson mao gayoy magpakomportable kanimo. Daghan kinig mga bahin. Una mao ang hapin, o ang putos, nga naghawid sa tanang bahin. Dayon gisundan kinig mga lut-od sa kutson nga mosangga nimo ug magpaalisngaw sa kaumog sa lawas. Ang ikatulong bahin, nga naghatag ug suporta ug kagahi, kasagarang dunay sinubhan nga mga espring nga puthaw. Adunay lainlaing mga matang sa pangsulod nga suporta, apan kasagaran, kon mas daghan ang espring ug mas baga ang gigamit nga mga alambre, mas maayo kining mosangga. Ang iladong kapilian karong panahona mao ang polyurethane o latex nga kutsong foam; mas gaan kini kay sa kutson nga dunay espring.

Bisan pa niana, ang usa ka maayong kutson moobra lamag maayo kon aduna kiniy haom nga patongan, kasagaran kanang gidisenyo alang niini. Ang katreng divan kasagarang ibaligya nga usa ka parisan, nga may kutson ug patongan. Ang baga, samag-kahon nga pundasyon niini magsilbi ingong usa ka dakong shock absorber, nga magtugot sa kutson nga makaginhawa ug busa modugaydugay ang serbisyo niini. Ang lain pang kapilian mao ang bedstead. Kini kasagarang adunay mga pirasong tabla  o puthaw nga patongan ug bukas sa ilalom, nga maghatag ug maayong bentilasyon sa haom nga kutson niini. Ang tibuok nga tabla magtaganag lig-ong pundasyon, samtang ang gitaorag espring nga mga piraso sa tabla nga sangga mas maunat-unat.

Pagpili sa Angayng Katre

Unsay angay nimong hinumdoman sa dihang mopalit ug katre? Ang segunda-mano nga katre nakatuhop na sa singot ug mga kaliskis sa laing mga tawo ug lagmit puno na kini ug mga bunhok nga mahimong hinungdan sa alerdyi, hubak, o yabon. Mahimong dili na usab kini makaabot sa mga sukdanan sa kahimsog ug kahilwas.

Sa dili ka pa mopalit ug bag-ong katre, girekomendar nga tinoon nimo kon unsay imong palabihon, sama sa presyo, mga butang labot sa panglawas, o ang kinatibuk-ang gidak-on. Sulayi ang paggahin ug taas nga panahon aron makaadto sa mga tindahan nga maayog reputasyon, ug ipangutana ang daghang impormasyon kutob sa mahimo bahin sa matag katre o kutson. Sanglit kasagarang mahal ang mga katre, ayaw pagdalidali sa imong pagdesisyon.

Tingali malisdan ka sa paghimo sa hustong pagpili kon ikaw lapoy. Pagsul-ob ug komportableng mga sinina. Ayawg kaulaw nga sulayan ang usa ka katre. Huboa ang imong amerkana ug sapatos ug higda sa matag katre sulod sa pipila ka minuto. Sulayi ang lainlaing mga posisyon sa pagkatulog, nga hatagag linaing pagtagad ang pagsangga niini sa imong mga abaga, mga bat-ang, ug ubos nga bahin sa bukobuko.​—Tan-awa ang kahon sa ubos.

Pag-atiman sa Imong Katre

Ang maayong pag-atiman sa imong katre tinong magpadugay sa serbisyo niini. Pangayog sugyot sa mga tindera, ug maggahin ug panahon sa pagbasa sa mga tugon sa pabrika maylabot sa pag-atiman niini. Sa dihang dad-on na nimo sa balay ang imong bag-ong katre, kuhaa dayon kon mahimo ang plastik nga putos niini. Magpahungaw kini sa alisngaw,  nga maoy makapaumog, makapaagup-op, ug makapadugta niini. Ania pay dugang pipila ka sugyot.

● Balibaliha ang bag-ong kutson nga may espring kas-a sa usa o duha ka semana sa unang pipila ka bulan ug human niana kada tulo ka bulan. Makatabang kini nga madasok ang materyales nga gisulod ug walay luna nga mag-ugdo. Kon duna kay sakit sa bukobuko, mas maayong pilion ang kutson nga foam, sanglit dili na kini kinahanglang balibalihon.

● Ayaw gayod pik-a, lukota, o yataki ang kutson. Aron dili madaot ang panapton nga putos niini, gamita ang mga hawiranan niini para lamang ipuwesto kini, dili sa pagbitbit niini.

● Matag buntag kuhaa ang mga hapin sa katre sulod sa labing menos 20 minutos aron mahanginan ang imong katre ug moalisngaw ang kaumog sa lawas.

● Hupting hinlo kanunay ang imong kutson pinaagi sa paggamit ug malabhang hapin nga proteksiyon niini. Regular nga hinloi ang kutson ug patongan ginamit ang bakyum aron matangtang ang bolobalhibo ug abog, ug trapohi dayon ang bisan unsang mga mansa ug likido nga nayabo niana ginamit ang dili-isog nga sabon ug bugnaw nga tubig.

● Paningkamoting dili lingkoran kanunay ang usa ka lugar lamang sa daplin sa kutson. Ayaw tugoti ang mga bata o si bisan kinsa nga magluksolukso sa katre.

Ang imong katre labaw pa kay sa pagpamuhonan lang ug salapi. Kini maoy pagpamuhonan sa un-tersiya sa imong kinabuhi​—nga mahimong dunay dayag nga epekto sa lain pang dos-tersiya. Kon maalamon nimong pilion ang imong nagasangga nga higala ug ampingan kini, atimanon kag maayo niini.

[Kahon sa panid 22]

Unsang Katreha ang Angay Alang Kanimo?

Pagkakomportable ug kagahi. Ang kutson dili kinahanglang ingon ka gahi sa tabla aron mahimong maayo alang kanimo. Sa pagkamatuod, gituohan nga ang gahi kaayong katre mahimong magpagrabe sa mga sakitsakit sa bukobuko. Pasagding ang imong lawas maoy mosulti kanimo kon unsay labing maayo. Higda nga naghayang. Kon ikasuksok nimo ang imong kamot sa haw-ang nga bahin sa imong bukobuko nga eksakto ug makatakilid ka dayon, husto ra alang kanimo ang kagahion sa kutson. Ang maayong mosangga nga kutson kinahanglang magtugot sa imong taludtod nga magpabiling tul-id kon motakilid ka. Ang mas bug-at nga tawo manginahanglan ug mas gahi nga katre.

Gidak-on. Pilia ang katre nga magtugot kanimo nga makalihoklihok. Kon duha ka tawo ang maghigda sa katre, timan-i nga kada usa sa duha ka dagko nga matulog sa katre nga alang sa duha ka tawo nga may kasarangang gidak-on adunay samang gidak-on sa luna sa usa ka masuso diha sa kuna.

Magkasibo nga mga parisan. Kon posible, palita ang kutson ug patongan nga magkasibo ug gidisenyo nga duyog nga mohatag kanimo ug kahayahay ug suporta. Ang daan na nga patongan mahimong makadaot sa bag-ong kutson ug makaapektar usab sa garantiya o warranty niini.

Bili. Kon pilay imong gibayad mao usay balor nga imong madawat, busa palita ang kinamaayohang kalidad sa katre nga maabot nimo.

Lugar. Kon ang lugar limitado, basin maayong mopalit ug usa ka Murphy bed, o katre nga mapatindog sa bungbong, nga mahipos sulod sa dakong kabinet. Ang laing posibilidad mao ang futon, usa ka almohadon nga hinimo sa mga lut-od sa mahunolhunol nga gapas nga daling ibukhad sa salog sa magabii. Ang mga futon mahimo usab nga ibaligya ingong mga katreng sopa nga may mga kaha nga gama sa mga piraso sa tabla o puthaw ug matangtang-tangtang.

Mga sakitsakit sa lawas. Kon ikaw dili komportable sa usa ka kasagarang katre, ang usa ka maadyas-adyas nga katre makapaarang kanimo sa paglainlain sa imong mga posisyon sa pagkatulog. Ang water bed mosangga ug moapod sa gibug-aton sa lawas sa timbang nga paagi, ug mahimo kining makatabang sa mga tawong nag-antos sa naipit nga ugat.

Mga tawong may alerdyi. Kon ikaw alerdyik sa abog o sa natural nga mga materyales nga nasulod sa kutson, maayo tingaling pilion nimo ang kutson nga dunay artipisyal nga mga lanot o foam. Maayo usab nga masayran nga ang mga butang nga makaalerdyik dili daling mapondo diha sa bedstead nga may patongan sa kutson nga pirasong tabla o puthaw o diha sa water bed.

Mga tigulang. Seguroa nga ang imong mga lapalapa makaabot sa salog kon naglingkod ka sa daplin sa imong katre. Ang patongan nga gahig daplin mas makapasayon sa imong paghigda ug pagbangon sa katre gikan niining naglingkod nga posisyon.

[Kahon sa panid 23]

Mga Sugyot sa Kahilwas

◼ Pagsul-ob ug sinina nga pangkatulog nga dili daling madutlan ug kalayo.

◼ Paneguroa nga ang mga panaptong hapin sa katre layo kaayo sa mga kalayo ug pangpainit sa balay.

◼ Susiha kanunay ang de-koryenteng habol alang sa gisi diha sa putos, lalom nga mga pinil-an, mga timailhan sa pagkasunog, ug nagasgas nga kordon sa koryente. Ayaw gayod gamita ang habol kon basa kini, apan pasagdi kining mouga sa natural nga paagi. Ayaw pagbutang ug bug-at nga mga butang diha sa katre kon gikonektar ang habol diha sa koryente.

◼ Ayaw sudli ug nagbukal nga tubig ang botelyang sudlanag ininit, ni gamiton kini dungan sa de-koryenteng habol. Kuhaa kini sa dili pa mohigda ang bata.

[Diagram sa panid 23]

(Alang sa aktuwal nga pagkahan-ay, tan-awa ang publikasyon)

Hapin, o putos

Deep-stitch diamond quilting

Microquilting

Pangpalig-on sa kutson

Mga lut-od sa kutson

Pangpalig-on sa ilalom

Foam

Walay-bugto nga mga espring

Nagdayag nga mga espring

Giputos nga mga espring

[Credit Line]

Reproduced by courtesy of the Sleep Council

[Picture Credit Line sa panid 21]

Reproduced by courtesy of the Sleep Council