Gikan sa Among mga Magbabasa

Mga Artikulo Bahin sa mga Batan-on Ako 12 anyos, ug ganahan kaayo kong mobasa sa inyong mga magasin. Sa wala pa ko magbasa sa inyong mga magasin, nalisdan kaayo kong makig-uban sa akong mga higala tungod kay silang tanan mas magulang nako. Apan human mabasa ang mga artikulo sa “Mga Batan-on Nangutana . . . ,” gisayonan na ako sa pagpakig-uban kanila. Salamat sa inyong mga magasin. Dako kaayong tabang kini.

N. I., Rusya

Pagtuon ug Pinulongan Salamat sa mapuslanong mga sugyot diha sa artikulong “Buot ba Nimong Makakat-on ug Usa ka Langyawng Pinulongan?” (Enero 8, 2000) Nagsugod ko sa pagtuon ug Kinatsila duha ka tuig kanhi, ug ang akong kahibalo niining pinulongana napamatud-ang mapuslanon kaayo. Panahon sa di pa dugayng internasyonal nga kombensiyon, nakatabang ko sa daghang isigka-Kristohanon gikan sa ubang mga nasod.

K.L.R., Brazil

Nagtuon kog Pranses sulod na sa tulo ka tuig karon, ug gusto nakong ipahayag ang akong pasalamat tungod sa maong artikulo. Makapadasig kaayo kini! Nadugangan ang akong determinasyon sa pagpadayon sa akong pagtuon, ug ako naglaom ug nag-ampo nga moabot ra ang adlaw nga akong magamit ang akong mga katakos sa pagsultig langyawng pinulongan diha sa usa ka bahin sa Kristohanong ministeryo.

L. C., Tinipong Bansa

Dunay daghang langyaw dinhi sa Bavaria. Bisan pag ang kadaghanan makasultig Aleman, mas mamati sila sa maayong balita sa Bibliya kon ila kining madungog sa ilang lumad nga pinulongan. Sanglit daghan ang gikan sa Rusya, nakahukom ko sa pagtuon sa ilang pinulongan. Husto kamo sa pag-ingong lisod kini. Apan, akong nasagubang ang unang kababagan nga mao ang pagtuon sa alpabeto​—ug ang mga letra dili na lisod kaayong sabton.

B. K., Alemanya

Inyong gisugyot ang paggamit ug mga audiocassette sa pagtuon ug pinulongan samtang nagdrayb. Sa akong hunahuna dili maayong isugyot nga samtang nagdrayb magbuhat kitag butang nga nagkinahanglan ug konsentrasyon. Mahimo kining hinungdan sa aksidente.

K. S., Hapon

Among gipangutana ang ubay-ubayng organisasyon sa kahilwas sa pagdrayb ug sakyanan, ug walay usa nga makahatag ug bisan unsang panukiduki nga nagpakitang ang pagpaminaw sa edukasyonal nga mga audiocassette samtang nagdrayb mopahinabog mas dakong kapeligrohan kay sa pagpaminaw sa musika o pagpakig-estorya sa pasahero. Bisan pa, gipabilhan ug dako ang pahinumdom nga magmaampingon samtang nagdrayb.​—ED.

Walay-Dugo nga Operasyon Buot ko kamong pasalamatan tungod sa seryeng “Walay-Dugo nga Pagpanambal ug Operasyon​—Ang Nagdakong Panginahanglan.” (Enero 8, 2000) Nakatabang kini sa pagbungkag sa ubang mga pagpihig sa mga tawo batok sa mga Saksi ni Jehova. Ubay-ubayng magasin ang akong gidala sa akong opisina ug gitanyag kini ngadto sa akong mga kauban. Panahon sa tingpaniudto, akong namatikdan ang usa ka kauban sa trabaho nga maikagong nagbasa sa magasin. Sa ulahi iya kong giduol ug giingnan: “Wala gyod ko magdahom nga daghan diay kaayong makaiikag nga mga artikulo ang unod sa maong magasin!”

I. S., Republika sa Czech

Mga Insekto Salamat sa artikulong “Ang Katingalahang Kalibotan sa mga Insekto.” (Enero 8, 2000) Maayo kaayong pagkasulat ang impormasyon, nga way-duhaduhang resulta sa maayong pagpanukiduki. Gusto unta kong motan-aw ug TV, apan ako hinuong gibasa kana nga gula sa Pagmata! Human mabasa kining artikuloha, ako nahibalo nga wala ko masayop sa akong desisyon.

O. K., Pransiya

Tungod kay wala koy makataronganong katin-awan kon nganong naglungtad ang mga insekto, nakahinapos ko nga gibuhat sila ni Jehova aron paneguroon nga huptang hinlo sa mga tawo ang ilang mga balay. Apan gipakita kanako niining artikuloha nga ang mga insekto maoy laing panid sa basahon sa kalalangan, nga niana kita makakat-on ug daghan pa bahin sa atong halangdong Maglalalang.

A. A., Tinipong Bansa