Kaon ug Utan!

TINAMPO SA MAGSUSULAT SA PAGMATA! SA BRAZIL

“Pait na.” “Lain na ug lami.” “Wala pa ko makatilaw ana.”

PIPILA lamang kini sa mga katarongan kon nganong daghan ang dili mokaon ug utan. Ikaw komosta? Adlaw-adlaw ka bang mokaon ug utan? Ang Pagmata! nanginterbiyo aron sa pagsuta kon nganong ang pipila ka tawo lamian ug utan ug kon nganong ang uban dili.

Kadtong mokaon ug utan miingon nga gitudloan sila sa ilang mga ginikanan sa pagkahinungdanon sa pagkaon ug utan ug prutas. Sa kasukwahi, daghan niadtong dili gustog utan wala maanad sa pagkaon niini sa bata pa. Hinunoa, mas gusto silang mokaon ug mga pagkaong lamian apan walay sustansiya. Apan, bisan pa niana, sila miuyon nga ang utan importante aron makabaton ug maayong panglawas.

Mga ginikanan, tudloi ang inyong mga anak sa pagkaon ug utan! Sa unsang paagi? Ang Facts for Life, gipatik sa United Nations Children’s Fund, nagsugyot nga labing menos kas-a sa usa ka adlaw human sa normal nga pagpasuso o pagpasuso pinaagig beberon, ang mga bata nga mga unom ka bulan angayng pakan-on ug utan nga gisun-ad, gipanitan, ug dayon gidugmok. Kon mas daghang klase sa pagkaon, mas maayo kini alang sa bata. Si Dr. Vagner Lapate, usa ka espesyalistang doktor sa bata sa Brazil, nag-ingon nga samtang ang gatas mao gayoy pagkaon alang sa unang duha ka tuig, ang paghatag ug ubang mga pagkaon “magdasig sa bata sa pagtilaw ug bag-ong lami sa pagkaon.”

Diha sa librong Medicina​—Mitos y Verdades (Medisina​—Mga Sugilambong ug mga Kamatuoran), si Carla Leonel nagsugyot nga ang diyutayng duga sa orens, purong duga sa mga prutas (sama sa saging, mansanas, ug kapayas), cereal, ug sabaw sa utan mahimong ipakaon sa bata nga mas sayo pa kay sa giingon sa ibabaw. Siyempre, sanglit ang mga hunahuna bahin niini magkalahi, maalamon nga mokonsulta ka sa imong pedyatrisyan.