Ang Torre sa Crest

TINAMPO SA MAGSUSULAT SA PAGMATA! SA PRANSIYA

ANG makasaysayanhong mga torre adunay nagkalainlaing mga porma ug mga gidak-on ug gigamit sa daghang katuyoan. Ang pipila gitukod ingong depensa sa estratehikong mga lokasyon sa militar, ug ang uban gigamit nga mga bilanggoan; apan karon, ang kadaghanan gihimong mga duawanan sa turista. Ang torre nga nagbuntaog sa mga tampi sa Suba sa Drôme sa gamayng lungsod sa Crest sa habagatan-sidlakang Pransiya gigamit niining tulo ka katuyoan.

Ang talagsaong gidak-on sa Torre sa Crest nagpahinabo niini nga makita gikan sa halayo. Tungod sa amihanan-sidlakang bahin niini nga may sukod nga 52 metros, kini maoy usa sa kinahabogan sa Pransiya. Gikan sa itaas, ang talan-awon sa tiilan sa mga bungtod sa Vercors, ang mga bukid sa Ardèche, ug ang walog sa Rhone maoy maanindot kaayo.

Ang sinugdanan sa torre wala matino, apan sa sinugdan kini gigamit ingong usa ka kuta. Panahon sa Krusadang Albigensiano sa ika-13ng siglo, ang Katolikong mga tropa ni Simon de Montfort, nga gibuligan sa Katolikong mga obispo, miilog niana nga kastilyo. Sukad niadto gigamit kini nga base-militar sa pagpakig-away batok sa mga Albigensis.

Panahon sa mga Gubat sa Relihiyon (1562-​98), ang kastilyo giatake sa mga Protestante sa daghang higayon apan wala gayod mailog. Ang torre hapit nang magun-ob niadtong 1633 sa dihang ang tanan gawas sa pinakalig-on ug pinakaluwas nga bahin niini gilumpag pinaagi sa sugo ni Haring Louis XIII. Sukad niadto, kini gigamit nga bilanggoan alang sa ordinaryong mga kriminal, mga magsusupak sa monarkiya ug usab alang sa mga Huguenot. Ang pagbilanggo niining mga Protestanteng Pranses naatol sa panahon sa dihang ang Balaod sa Nantes, nga sa usa ka sukod naghatag ug relihiyosong pagtugot sa Pransiya, sa inanay gisalikway. Makita gihapon sa mga paril sa bilanggoan ang mga kuriskuris sa pipila niining mga tawong binilanggo tungod sa relihiyon.

Karong adlawa ang Torre sa Crest maoy usa ka makasaysayanhong monumento nga nag-abiabi, sa aberids, ug 30,000 ka bisita matag tuig. Niadtong 1998 kini gilakip sa mga programa sa pagsaulog sa ika-400 nga anibersaryo sa Balaod sa Nantes. Ang mga paril niini maoy mangil-ad nga handomanan kon unsa ang mahitabo kon tugotang maugmad ang nangibabawng impluwensiya sa relihiyosong pagkadili-matinugoton.