Mahitabo ba Kaha Pag-usab ang “Holocaust”?

TINAMPO SA MAGSUSULAT SA PAGMATA! SA SWEDEN

SA Enero 26-28, 2000, ang mga pangulo sa Estado ug ang mga hawas sa 48 ka kagamhanan gikan sa tibuok kalibotan nagtigom sa kaulohan sa Sweden alang sa Stockholm International Forum on the Holocaust. Ang pipila ka pahayag gikan sa plataporma nagpadayag sa kahadlok nga gihambin sa mga pangulo sa kalibotan bahin sa pagkabuhi pag-usab sa Nazismo. Ang kanhing Primer Ministro sa Israel nga si Ehud Barak miingon: “Kini nga komperensiya nanawag ug usa ka unibersal nga mensahe: Dili na gayod tugotan pag-usab, sa bisan asang dapit sa nawong sa yuta, ang usa ka rehimen nga magpahinabog kadaotan ug pagbuno ug pagpihigpihig taliwala sa mga tawo tungod sa ilang relihiyon, rasa o bulok.”

Dili Lamang Usa ka Butang nga Gikabalak-an sa mga Hudiyo

Daghang tawo sa tibuok kalibotan naglangkit sa terminong “Holocaust” ngadto lamang sa mga Hudiyo. Apan, ang uban mga biktima usab. Sa usa ka seremonyas nga gihatagag dakong publisidad ingong paghandom sa Holocaust sa mga Hudiyo nga gihimo didto sa Great Synagogue of Stockholm panahon sa katigoman, ang primer ministro sa Sweden misugyot nga himoon ang usa ka panaad nga ang tanang tipiganan sa mga dokumento sa tibuok kalibotan pagabuksan aron malamdagan ang publiko bahin sa Holocaust. “Ang katawhan angayng masayod,” matod niya, “bahin sa pagpuo [sa mga Gypsy] sa Roma, sa pinakyaw nga pagpatay sa inutil nga mga tawo ug sa paglutos ug pagbuno sa mga homoseksuwal, sa mga magsusupak ug sa mga Saksi ni Jehova.”

Ang kagamhanan sa Sweden nagpatik ug usa ka libro bahin sa Holocaust nga nag-ulohang Tell Ye Your Children, nga gipang-apod-apod nga libre sa tibuok nasod ngadto sa tanang panimalay nga may mga anak. Kini nga publikasyon naghisgot nga ang mga Saksi ni Jehova “midumili sa pagpanumpa sa pagkamaunongon ngadto kang Hitler ug sa Nazing Alemanya. Ang maong pagdumili talagsaon kaayo tungod kay ang pagpirma lang sa usa ka dokumento nga nagpahayag sa ilang pagkamaunongon magtapos na unta sa ilang  paglutos​—apan pipila lang ang mipili sa pagbuhat niini.”

Ang Holocaust ug ang mga Saksi ni Jehova

Niadtong 1933, dihay mga 25,000 ka Saksi ni Jehova sa Alemanya. Libolibo kanila ang naapil sa unang mga tawo nga gipamalhog sa mga kampo ug mga bilanggoan sa Nazi. Ilang gipakita ang ilang pagkaneyutral ingong mga Kristohanon diha sa tanang matang sa politikal ug militaryo nga kalihokan. Sila wala mobayaw kang Hitler. Sila midumili sa pagsagop sa rasistang ideolohiya sa Nazi ug sa pagpakigbahin sa politikal ug militaryo nga organisasyon ni Hitler. Mga 2,000 ang nangamatay, kapin sa 350 kanila ang gipatay.

Dugang pa, gitabangan sa binilanggong mga Saksi ang mga isigkabinilanggo aron makalahutay, lakip ang mga Hudiyo ug ang uban. Gibuhat nila kana pinaagi sa pagpatisok diha kanila sa pinasukad-sa-Bibliya nga paglaom ug pinaagi sa pagpakig-ambit ngadto sa mga masakiton ug sa mga maluyahon sa bisan unsang pagkaon nga anaa kanila, nga sagad nagtanyag sa bahin sa ilang kataposang piraso sa tinapay. Panahon sa unang mga tuig sa paglutos sa Nazi, nagpayuhot usab sila ug mga impormasyon bahin sa paglungtad sa mga kampo konsentrasyon ug bahin sa kon unsay nagakahitabo diha niana. Sukad niadto, diha sa ilang mga magasin nga giapod-apod sa tibuok kalibotan, Ang Bantayanang Torre ug Pagmata!,  nagpatik sila ug daghang artikulo nga naghisgot bahin sa kabangis sa Nazi ug sa mga sugilanon sa kinabuhi sa mga nangaluwas.

Ang kahadlok bahin sa pagkabuhi pag-usab sa Nazismo nadayag taliwala sa mga delegado sa Stockholm International Forum on the Holocaust. Si Propesor Yehuda Bauer, direktor sa International Center for Holocaust Studies sa Institute of Contemporary Jewry, Israel, mipahayag niana niining paagiha: “Tungod kay kini nahitabo kanhi, kini mahimong mahitabo pag-usab, dili sa samang paagi, dili gayod hinuon ngadto sa mao ra nga mga tawo, dili pinaagi sa mao ra nga mga tawo, apan ngadto kang bisan kinsa pinaagi kang bisan kinsa. Kadto walay sulondan, apan karon anaa na ang sulondan.”

[Hulagway sa panid 12]

Ang purpurang trianggulo nagpaila sa mga Saksi ni Jehova diha sa mga kampo

[Mga hulagway sa panid 12, 13]

1. Julius Engelhardt, usa sa mga Saksi ni Jehova, gipatay sa mga Nazi sa Brandenburg niadtong Agosto 14, 1944

2. Tulo sa mga Saksi ni Jehova nga mipauli human pagawasa sa Sachsenhausen, 1945

3. Elsa Abt, usa ka Saksi nga nahimulag sa iyang gamayng batang babaye ug nabilanggo sulod sa halos tulo ka tuig

[Credit Line]

Nordrhein-Westfälisches Hauptstaatsarchiv, Düsseldorf

[Mga hulagway sa panid 13]

Ang naluwas nga mga Saksi nag-asoy sa ilang mga sugilanon dinhi niini nga mga video